Limbuyoti ze Fita Maluwo

BO JON ne ba na ni mubeleko o munde hahulu mwa United States. Mane inge ba sa li banana, ne ba yanga mwa linaha inge ba panga mali a mañata. Bona ni basali ba bona ne ba na ni ndu ye nde mi ne ba pila bupilo bwa bumbombo. Batu ba bañata ne ba baa nga kuli ne ba fuyauzwi.

Ha mu nyakisise mutala o muñwi. Mwahalaa batu ba ba fitelela 5,000 ba ne ba kupile ku kena musebezi, bo Kostas * ne ba li ba bañwi ba batu ba 80 feela ba ne ba ketilwe kuli ba itutele musebezi mwa panga ye tumile hahulu mwa Europe. Mwahalaa lilimonyana feela ze ne fitile, bo Vassilis ne ba kuta-kutezi ku huliswa fa musebezi, mi hamulaho wa nako se ba ketiwa ku okamela likolo le lituna mwa panga ye ñwi. Ka nako ye ne ba tiloo tuhela musebezi wo ni ku kwalula kampani ya bona, ne ba panga mali a mañata mwa silimo si li siñwi a fitela kwahule e ba kona ku panga batu ba bañata mwahalaa bupilo bwa bona kaufela. Ne ba ikutwile ku fuyaulwa.

Niteñi, baana ba babeli ba, ba kozwi kuli ku na ni limbuyoti ze fitela kwahule sifumu. Ka mutala, bo Jon kacenu le, ba sebeza sina muitateli ya luta batu Bibele ili ku tusa batu ku sutelela ku Mulimu. Bo Jon ba bulela kuli: “Ni iponezi hande kuli sifumu ha si koni ku tahisa tabo. Ku ikataza ku si bata ku tokwisanga mutu nako ya ku eza lika ze ñwi. Kono ku pila ka likuka za Bibele ku kona ku  tahiseza mutu limbuyoti ze ñata ze cwale ka ku ba ni linyalo le li nde, mwangalwa, ni lizwalo le li nde.”

Bo Kostas ni bona ba li: “Mulimu ha tokwi kuli lu be ni lika ze ñata hahulu za kwa mubili. Ni lumela ka ku tiya kuli lika kaufela za lu fa Mulimu ze fitelela ze lu tokwa ka zazi, lu ka tokwa ku itusisa zona ka ku ya ka tato ya hae.” Cwanoñu fa, bo Kostas ni lubasi lwa bona ne ba kalisize ku ituta puo isili ka mulelo wa kuli ba kone ku luta batu ba bañata likuka za Bibele. Ba bulela kuli: “Lu itutile kuli ku na ni tabo ye tuna mwa ku fana ku fita ye mwa ku fiwa.”—Likezo 20:35.

Kaniti, bo Jon ni bo Kostas, ba itutile kuli limbuyoti za kwa moya ki za butokwa hahulu ku fita maluwo. Daniel Gilbert, muluti wa fa sikolo sa Harvard, u talusa kuli bocaziba ba za buikangulo bwa munahano “ba tandile lilimo ze ñata inge ba ituta swalisano ye mwahalaa sifumu ni tabo, mi ba fitile fa ku lumela kuli sifumu si ekezanga kwa tabo ya batu haiba si ba imulula ku zwa mwa ku sheba ko ku tulile tikanyo.” Kono cwale ba ekeza kuli: “Ha si ekezangi hahulu kwa tabo hasamulaho.”

Tuto ye Itutiwa ka ku Utwa Butuku

Munahanisisi yo muñwi naa ize: “Nto ye komokisa ki ya kuli mutu a sa zwa feela mwa bubotana, ni kwa ka ekelezwa mali a hola, haa na ku ba ni tabo.” Kwa makalelo a lilimo za mwanda wo felile, mubihi wa makande yo muñwi na suñilwe tuto ye ka nako ya na buhisana ni Andrew Carnegie, ya kile a abana mwa ku panga kampani ya lisipi, mi ili yo muñwi wa batu ba ne ba fumile hahulu mwa lifasi ka nako yeo. Carnegie naa mu bulelezi kuli: “Batu ha ba swaneli ku ni shwela muna. Sifumu sa ka si kona ku ni tusa cwañi? Se ni li wa lilimo ze 60 mi ha ni sa kona ku nuniswa ki lico ze ni ca. Ne ni ka fana mali a ka kaufela kambe kuli ne ni ka kutelwa ki bukulwani ni buikangulo bo bunde.”

 Mubihi wa makande u ekeza kuli: “Bo Carnegie ki ha ba fetuha, mi ka linzwi la mwataasi ni ka buhali ni ka maikuto a sa konwi ku taluswa hande, ba bulela kuli: ‘Ne ni ka lekisa lika kaufela kuli ni kone ku kutelwa ki bupilo bwa ka hape.’” Mutu yo muñwi ya naa na ni mali a mañata hahulu ya bizwa J. Paul Getty, na bulezi manzwi a, hasamulaho ili ku lumelelana ni ba bañwi, kuli: “Mali haa koni luli ku tahisa tabo. Mwendi mane a kona ku tokwisa mutu tabo.”

Mwendi mwa lumelelana ni muñoli wa Bibele ya na kupile kuli: “U si ke wa ni fa bubotana, nihaiba bufumu; u ni tuse buhobe bo bu ni likana. Kakuli ha ni ka atelwa, ni ka swana na ku latula, na li: [Muñ’a] Bupilo ki mañi? Mi ha ni ka ba mubotana ni ka swana na uzwa, mi na nyefulisa Libizo la Mulimu wa ka.”—Liproverbia 30:8, 9.

Mulena Solomoni wa Isilaele wa ikale na talusize kuli: “Na ba mutu yo muhulu, ya luwile ku fita mutu kaufela ya n’a pila mwa Jerusalema.” Kono naa ekelize kuli: “Kamukana n’e li za mbango, ni musebezi o si na tuso.” Solomoni hape naa bulezi kuli: “Ku fuyolwa ki [Muñ’a] Bupilo ku fumisa mutu; ku ipilaeza mwa pilu ha ku tusi se siñwi.”—Muekelesia 2:9-11; 5:12, 13; Liproverbia 10:22.

Mwa ku Fumanela Limbuyoti za ku ya ku Ile

Kaniti, lu kona feela ku fumana tabo ya niti ni ye ina ku ya ku ile ha se lu bile ni silikani ni Mulimu. Haiba lu beya Mulimu mwa sibaka sa pili, lu ka fumana kuli bupilo bwa luna kaufela bu ka ba bo bunde ni bo bu tabisa.

Lwa kona ku bulela kuli, ha lu tokwi ku ikalelwanga za mali nako kaufela. Bibele i lu kolwisa za bupilo bwa kwapili muta lipisinisi za buputeleli ni za buñwanyama li ka feliswa ku ya ku ile. (1 Joani 2:15-17) Lifasi la Mulimu le li nca le li taha li ka zamaiswa ka likuka za hae ze lukile. Lifasi li ka fetulwa paradaisi sina mwa na lelezi Mulimu kwa makalelo ha naa beile mwateñi bo muuna ni musali ba pili. Yeo i ka ba mbuyoti ye tuna luli ku bona lifasi kaufela ha li tala tabo, kozo, ni lilato!—Isaya 2:2-4; 2 Pitrosi 3:13; 1 Joani 4:8-11.

Bupilo ka nako yeo ha bu na ku nyikwisa. Kwandaa ku ba feela ni silikani se sinde ni Mulimu, yena u ka lu kapweka limbuyoti za kwa mubili ze ñata, sina feela ha ka taleleza mulelo wa hae wa kwa makalelo wa kuli batu ba pile ku ya ku ile mwa paradaisi fa lifasi. Kaufela luna lu sepisizwe kuli lu ka ba ni lico ze ñata, makundamo, ni misebezi ye tabisa. Bubotana bu ka tanyelwa mwa lifasi kaufela ku ya ku ile.—Samu 72:16; Isaya 65:21-23; Mika 4:4.

Mutu kaufela ya bonisa tumelo ku Jehova, Mulimu ya bulezwi mwa Bibele, ha na ku swabiswa. (Maroma 10:11-13) Kacwalo ki ko ku butali mwa nako ye, ku ndongwama limbuyoti ze fita maluwo!—1 Timotea 6:6-10.

[Litaluso za kwatasi]

[Manzwi a fa likepe 8]

Haiba lu beya Mulimu mwa sibaka sa pili, bupilo bwa luna bu ka ba bo bu tabisa hahulu

[Siswaniso se si fa likepe 8]

Ku sebelisa hande mali ku kona ku tahisa kuli lu ikole bupilo