Emoniseli 16:1-21
16 Mpe nayokaki mongongo moko ya makasi+ euti na esika mosantu elobi na baanzelu yango nsambo ete: “Bókende kosopa mabakuli nsambo ya nkanda+ ya Nzambe na mabele.”
2 Mpe oyo ya liboso+ akendaki asopi kibakuli na ye na mabele.+ Mpe mpota moko ya mabe mpe oyo elyaka nzoto+ ebimelaki bato oyo bazalaki na elembo ya nyama mabe+ wana mpe baoyo bazalaki kosambela elilingi na yango.+
3 Mpe oyo ya mibale+ asopaki kibakuli na ye na mbu.+ Mpe ekómaki makila+ lokola oyo ya moto oyo akufi, mpe milimo nyonso ya bomoi ekufaki, ɛɛ, biloko oyo ezalaki na mbu.+
4 Mpe oyo ya misato+ asopaki kibakuli na ye na bibale+ mpe na maziba ya mai. Mpe ekómaki makila.+
5 Mpe nayokaki anzelu ya mai alobi ete: “Yo Oyo ozali mpe ozalaki,+ Moto ya sembo,+ ozali moyengebene, mpo ozwi bikateli wana,+
6 mpo basopaki makila ya basantu mpe ya basakoli,+ mpe opesi bango makila+ bámɛla. Babongi na yango.”+
7 Mpe nayokaki etumbelo elobi ete: “Ɛɛ, Yehova Nzambe, Mozwi-ya-Nguya-Nyonso,+ bikateli ya lisambisi na yo ezali solo mpe boyengebene.”+
8 Mpe oyo ya minei+ asopelaki moi kibakuli na ye; mpe bapesaki moi nzela ya kozikisa+ bato na mɔtɔ.
9 Mpe bato bazikaki na molunge makasi, kasi bafingaki nkombo+ ya Nzambe, oyo azali na bokonzi+ likoló ya malɔzi wana, mpe babongolaki mitema te mpo bákumisa+ ye.
10 Mpe oyo ya mitano asopaki kibakuli na ye na kiti ya bokonzi ya nyama mabe.+ Mpe bokonzi na ye ekómaki molili,+ mpe babandaki komiswa lolemo na mpasi,
11 kasi bafingaki+ Nzambe ya likoló mpo na mpasi na bango mpe mpo na bampota na bango, mpe babongolaki mitema te, batikaki misala na bango te.
12 Mpe oyo ya motoba+ asopaki kibakuli na ye na ebale monene Efrate,+ mpe mai na yango ekaukaki,+ mpo nzela ebongisama mpo na bakonzi+ oyo bauti epai moi ebimaka.
13 Mpe namonaki maloba misato ya elimo ya mbindo+ oyo ezalaki lokola mbemba+ ezali kobima na monɔkɔ ya dragɔ+ mpe na monɔkɔ ya nyama mabe+ mpe na monɔkɔ ya mosakoli ya lokuta.+
14 Ya solo, yango ezali maloba oyo euti+ na bademo mpe ezali kosala bilembo,+ mpe ezali kokende epai ya bakonzi+ ya mabele mobimba esika bato bafandi,+ mpo na koyanganisa bango mpo na etumba+ ya mokolo monene+ ya Nzambe Mozwi-ya-Nguya-Nyonso.+
15 “Talá! Nazali koya lokola moyibi.+ Esengo na moto oyo alali mpɔngi te+ mpe azali kobatela bilamba na ye ya likoló, mpo atambola bolumbu te mpe bátala nsɔni na ye te.”+
16 Mpe bayanganisaki bango na esika oyo babengi na Ebre ete Har–Magedone.+
17 Mpe oyo ya nsambo asopelaki mopɛpɛ+ kibakuli na ye. Bongo mongongo moko ya makasi+ ebimaki na esika mosantu, euti na kiti ya bokonzi, elobi ete: “Esalemi!”
18 Mpe mikalikali ebimaki, mpe mingongo eyokanaki, mpe bankake ebɛtaki, mpe mabele eninganaki makasi mpenza+ na ndenge oyo esalemá naino te banda bato bazali na mabele,+ mabele eninganaki makasi,+ makasi mpenza.
19 Mpe engumba monene+ ekabwanaki na biteni misato, mpe bingumba ya bikólo ekweaki; mpe Nzambe akanisaki Babilone Monene,+ mpo na kopesa yango kɔpɔ ya vinyo ya nkanda na ye makasi.+
20 Lisusu, bisanga nyonso ekimaki, mpe bangomba emonanaki te.+
21 Mpe mbula ya mabanga ya monene,+ oyo libanga mokomoko ezalaki na kilo soki ya talanta* moko, eutaki na likoló ekiteli bato, mpe bato yango bafingaki+ Nzambe mpo na bolɔzi wana ya mbula ya mabanga,+ mpo bolɔzi yango ezalaki monene mpenza.
Maloba na nse
^ Pene na kilo 20,4.
