Jesaja 53:1-12
53 Olyelye a itavela osho a uda kufye?*
Nolyelye a hololelwa eenghono dokwooko kwaJehova?
2 Ota holoka ngaashi oshitutumine koshipala shaye,* ngaashi omudi medu la notelwa.
Ke na efimano lasha, ile etumbalo;Nongeenge otwe mu mono, eholokepo laye itali tu nanene kuye.*
3 Okwa li a tondika, nokwa li ha henukwa kovanhu,Omulumenhu oo a mona* ouvela nokwa li e shii ouyahame.
Oshipala shaye osha li sha fa she tu holekwa.*
Okwa li a tondika, notwe mu tala ko ehe na oshilonga.
4 Oshoshili, ye mwene okwa humbata omauyahame etu,Nokwe lididimikila omauvela etu.
Ashike otwe mu tala ko a hepekwa, a dengwa kuKalunga, nokwa monifwa oixuna.
5 Ashike okwa tyuulwa omolwomatauluko etu;Okwa nyanyaulwa omolwomapuko etu.
Okwe lididimikila ehandukilo, opo tu kale tu na ombili,Notwa velulwa omolwoipute yaye.
6 Atushe otwa kala nokweelaela ngaashi eedi,Keshe umwe okwa ya nondjila yaye,Na Jehova okwa ningifa omapuko etu aeshe e uye kombada yaye.
7 Okwa hepekwa, nokwe liyandja a fininikwe,Ashike ina makula nande okanya kaye.
Okwa twalwa koshidipaelo ngaashi odi,Ngaashi odi yonghadi hai kala ya mwena ngeenge tai ka kululwa,Ashike ina makula nande okanya kaye.
8 Omolwengabeko* netokolo, okwa li a kufwa po;Nolyelye te lipula vali shi na sha nouyelele wonakudiwa yaye?*
Osheshi okwa li a xulifwa po medu lovanamwenyo;Okwa dengwa* omolwomatauluko ovanhu vange.
9 Nokwa li a pewa ombila* povakolokoshi,Ndele eshi a fya, okwa pakwa poipuna,*Nonande ina ninga sha sha puka,*Nomokanya kaye inamu dja oipupulu nandenande.
10 Ashike osha li ehalo laJehova,* a nyanyaulwe, nokwa efa a ehame.
Ngeenge okwa yandje omwenyo waye u li elivelombediyambo,Ota ka mona oludalo laye, ota ka hapupalifa omafiku aye,Nokupitila muye, ehalo* laJehova otali ka wanifwa.
11 Omolwoudjuu waye,* ota ka mona nota ka kala a wanenwa.
Omolweshiivo laye, omuyuki, omupiya wange,Ota ka kwafela ovanhu vahapu va kale ovayuki,Note ke lididimikila omatimba avo.
12 Omolwetomheno olo, ohandi ke mu pa oshitukulwa mokati kavahapu,Nota ka tukula oixuulwa* novanaenghono,Molwaashi okwa yandja omwenyo waye, nokuli fiyo omefyo,Nokwa li a valulilwa mokati kovanyoni;Okwa humbata omatimba avahapu,Nokwa ninga omupopiliko wovanyoni.
Omashangelo opedu
^ Ile tashi dulika, “mwaasho twa uda.”
^ “Ye” otashi dulika ta ulike komutalinomesho, ile kuKalunga.
^ Ile “eholokepo laye inali likalekelwa, opo tu kale twe mu hokwa.”
^ Ile “a uda ko.”
^ Ile tashi dulika, “Okwa li a fa omunhu oo ovanhu va alula ko oipala yavo.”
^ Ile “Omolwefininiko.”
^ Ile “nonghedi yaye yokukalamwenyo?”
^ Ile “dipawa.”
^ Ile “Naumwe ota ka yandja ombila yaye.”
^ Eln., “omulumenhu oshipuna.”
^ Ile “owii washa.”
^ Ile “Ashike Jehova okwa hokwa.”
^ Ile “ehafo.”
^ Ile “Omolwoupyakadi womwenyo waye.”
^ Ile “omaliko oo a xupa po konima yolwoodi.”
