Jesaja 31:1-9
31 Woo, ovo hava i kuEgipiti va ka konge ekwafo,Ovo ve lineekela meenghambe,Ovo ve lineekela momatemba oita, molwaashi mahapu,Nomeenghambe doita,* molwaashi di na eenghono.
Ashike ihava kongo ekwafo kOmuyapuki waIsrael,Noihava kongo Jehova.
2 Ndele naye yo omunaendunge, nota ka eta oupyakadi,Noite ke lialuluka kwaasho a popya.
Ota ka fikama a kondjife eumbo lovalongi vowii.Nota ka kondjifa ovo hava kwafele ovo hava longo osho shii.
3 Osheshi Ovaegipiti ovanhu ashike ovo vehe kwete okufya, ndele kave fi Kalunga;Eenghambe davo odopambelela, ndele kadi fi dopamhepo.
Ngeenge Jehova okwa nane eke laye,Keshe oo ha yandje ekwafo ota ka punduka,Nakeshe oo a kwafelwa ota ka wila po;Otava ka xula po oshita.
4 Osheshi eshi osho Jehova a lombwela nge ta ti:
“Ngaashi ashike onghoshi, onghoshi onyasha inaenghono,* tai kumbile oshihakanwa shayo,Eshi ya ifanenwa ongudu aishe yovafita i ke i lwife,Inai tilifwa komawi avo,Ile i mbadapalekwe keuyaano lavo,Jehova womatangakwaita naye osho te ke uya kedu, a lwe oitaKOmhunda Sion nokoshikulundudu shaye.
5 Ngaashi eedila hadi kulukile poshi, Jehova womatangakwaita naye ota ka amena Jerusalem.
Ote ke mu popila, noku mu xupifa.
Ote ke mu amena, noku mu xupifa.”
6 “Shuneni kwaao mwa tukululila oshibofa owina, nye ovanhu vomuIsrael.
7 Osheshi mefiku olo, keshe umwe ota ka efa po ookalunga vaye vongaho voshisilveri, nookalunga vaye vehe na ekwafo lasha voshingoli, ovo mwa ninga nomake eni omolwoulunde.
8 NOvaassiria otava ka wila po keongamukonda, ndele kali fi lomunhu;Neongamukonda, olo lihe fi lomunhu, otali ke va hanauna po.
Otava ka ya onhapo omolweongamukonda,Novalumenhu vavo ovanyasha otava ka longifwa oilonga idjuu.
9 Emanya laye otali ka xula po omolwoumbada muhapu neenghono,Nomalenga aye otaa ka tilifwa omolwopala yedidiliko,” Jehova osho a ti,Oo ouyelele* waye u li muSion, naao ediko laye li li muJerusalem.
