Jesaja 38:1-22
38 Pefimbo olo, Hiskia okwa li ta ehama nokwa li e li pokufya.+ Omuprofeti Jesaja,+ omonamati waAmos, okwe uya, ndele ta ti kuye, “Jehova ota ti ngaha: ‘Yandja omalombwelo koukwaneumbo woye, molwaashi oto ka fya; ito ka veluka.’”+
2 Opo nee Hiskia okwa taalela mekuma, ndele ta hovele okwiilikana kuJehova ta ti:
3 “Akutu, Jehova, ohandi ku indile, alikana, dimbuluka+ nghee nde ku longela noudiinini nomutima aushe,+ nanghee nda longa osho shiwa momesho oye.” Na Hiskia okwa hovela okulila neenghono.
4 Opo nee ondjovo yaJehova oye uya kuJesaja tai ti:
5 “Shuna, ndele to lombwele Hiskia+ kutya, ‘Eshi osho Jehova, Kalunga kaDavid, xokulululwa, ta ti: “Onda uda eindilo loye.+ Onda mona omahodi oye.+ Paife ohandi ku wedele ko eedula 15 kokukalamwenyo* kwoye,+
6 nohandi ku xupifa nosho yo oshilando eshi momake ohamba yaAssiria, nohandi ka lwila oshilando eshi.+
7 Eli olo edidiliko la dja kuJehova, olo tali ku ulikile kutya Jehova ota ka wanifa po ondjovo oyo a popya:+
8 Paife, ohandi ka shunifa monima omudidimbe wetango, oo u li keetalapa* daAhas, u shune monima omanha omulongo.”’”+ Onghee etango ola shuna monima omanha omulongo keetalapa, opo la hangwa nale la pitilila.
9 Eshangelo* lohamba Hiskia yaJuda, eshi ya li tai vele, naashi ya veluka koudu wayo.
10 Onda ti: “Mounyasha wange,Ondi na okuya moivelo yOmbila.*
Ohandi ka anyenwa eedula dange, odo da xupa ko.”
11 Onda ti: “Itandi ka mona Jah,* Jah, medu lovanamwenyo.+
Itandi ka mona vali ovanhu,Eshi ndi li pamwe novakalimo vomonhele omo keshe shimwe sha xula po.
12 Onhele yange mwene oya hanaunwa po, nonde i kufwa+Ngaashi etwali lomufita.
Onda tonya onghalamwenyo yange ngaashi omunduluki woiyata;Okwa teta nge po ngaashi eengodi dokutunga oiyata.
Okudja omutenya fiyo oufiku, owa kala nokuxulifa nge po.+
13 Onde lidiinika fiyo ongula.
Ngaashi onghoshi, okwa kala nokuteyaula omakipa ange aeshe;Okudja omutenya fiyo oufiku, owa kala nokuxulifa nge po.+
14 Ngaashi okandiilili, ile tena,* osho nda kala nokusheketa;+Onda kala handi kwena ngaashi onghuti.+
Omesho ange otaa tale pombada a loloka:+
‘Akutu! Jehova, ondi li moudjuu munene;Kala omuyambididi wange!’*+
15 Ondi popye vali shike?
Okwa popya naame, nokwa katuka onghatu.
Ohandi ende nde lininipika* eedula dange adisheOmolwoudjuu wange munene.*
16 ‘O! Jehova, omunhu keshe oku na omwenyo omolwoinima ei,*Nomuyo omu na omwenyo womhepo yange.
Oto ka shunifa nge vali moukolele nokukaleka nge nomwenyo.+
17 Tala! Ponhele yombili, ondi na oudjuu munene;Ndele molwaashi owa hafela nge,*Owa xupifa nge melambo lehanauno.+
Owa kupulashi omanyono ange aeshe konima yoye.*+
18 Osheshi Ombila* itai dulu oku ku fimaneka,+Efyo itali dulu oku ku tanga.+
Ovo hava i melambo itava dulu okumona oudiinini woye.+
19 Ovanamwenyo, ovanamwenyo otava dulu oku ku tanga.Ngaashi ashike ame handi dulu nena eli.
Xe omudali ota dulu okuhonga ovanamati vaye kombinga youdiinini woye.+
20 Akutu! Jehova, xupife nge,Nohandi ka shika omaimbilo ange noishikomwa yeengodi+Omafiku etu aeshe okukalamwenyo meumbo laJehova.’”+
21 Opo nee Jesaja okwa tya: “Etelei nge oshikuki sheenghwiyu da kukutikwa, ndele tamu shi vaeke poshitumba, opo a dule okuveluka.”+
22 Hiskia okwa pula a ti: “Edidiliko lilipi tali ka ulika kutya ohandi ka ya keumbo laJehova?”+
Omashangelo opedu
^ Eln., “komafiku.”
^ Tashi dulika eetalapa, odo da li hadi longifwa okuvalula efimbo mokutala kutya omudidimbe ou li peni.
^ Ile “Eimbilo.”
^ Ile “yo-Sheol,” sha hala okutya, koufi. Tala Omafatululo oitya.
^ “Jah” exupipiko ledina Jehova.
^ Eln., “Kala omupopili wange.”
^ Ile tashi dulika, “ewanye.”
^ Ile “limwenenena.”
^ Ile “oululu womwenyo wange.”
^ Sha hala okutya, eendjovo noilonga yaKalunga.
^ Ile “kufa po omanyono ange aeshe koshipala shoye.”
^ Ile “omwenyo wange.”
^ Ile “o-Sheol,” sha hala okutya, koufi. Tala Omafatululo oitya.
