1, 2. Eendjovo daJesus odo da popiwa muMateus 24:14 oda pendula omapulo elipi?

JESUS okwa xunganeka kutya momafiku axuuninwa onghundana iwa yOuhamba otai ka udifilwa ovanhu aveshe.(Mateus 24:14) Tu li Eendombwedi daJehova, otwa shiivikila oilonga yokuudifa mounyuni aushe. Ovanhu vamwe ove hole etumwalaka olo hatu udifa, ndele vamwe kave li hole. Ashike vamwe vomwaavo vehe hole etumwalaka letu, ove tu fimaneka omolwoilonga yetu. Ohatu lombwele ovanhu kutya ofye ashike hatu longo oshilonga osho Jesus a xunganeka. Osho otu shi shii ngahelipi kutya ofye hatu longo oshilonga osho? Otu na oumbangi ulipi oo tau ulike kutya oshilonga shetu shokuudifa osho sha li sha xunganekwa kuJesus?

² Omalongelokalunga mahapu ohaa ti kutya ohaa udifa metwokumwe nelombwelo laJesus. Ndele ohava udifa ashike meengeleka, kee-TV ile kointaneta, nohava lombwele ovanhu nghee ve lihonga kombinga yaJesus. Vamwe ohava kala ve  udite kutya oilonga yokuudifa oya kwatela mo okukwafela ovo ve na omhumbwe ile okuhakula ovanaudu nokuhonga ofikola oshali. Ndele mbela oilonga ya tya ngaho oyo ngoo oshilonga shokuudifa osho sha popiwa kuJesus?

3. PaMateus 28:19, 20, oinima ine ilipi ovashikuli vaJesus ve na okuninga?

³ Mbela Jesus okwa hala ovahongwa vaye va kale va teelela ovanhu ovo ve uye kuvo? Hasho. Konima eshi a nyumuka, Jesus okwa li a lombwela ovashikuli vaye omafele a ti: ‘Indeni ka ningeni ovanhu aveshe ovahongwa vange, noku va [ninginifa, NW], noku va honga okudiinina aishe ei nde i mu lombwela.’ (Mateus 28:19, 20) Onghee hano, tu li ovashikuli vaJesus otwa pumbwa okuninga oinima ine tai landula. Otu na okuninga ovanhu ovahongwa, oku va ninginifa noku va honga. Ashike otu na tete okuya kovanhu. Omuhongwanhu umwe wOmbiibeli okwa ti: “Okuya kovanhu oshi li oshinakuwanifwa shomwiitaveli keshe, kashi na neembudi kutya otai poushiinda ile okondje yomafuta.” — Mateus 10:7; Lukas 10:3.

4. Oshike sha kwatelwa mo mokuninga “ovayuli vovanhu”?

⁴ Jesus okwa li a teelela ovahongwa vaye va ninge shike? Mbela okwa li a hala va udife nopehe na ewiliko laye ile okwa li a hala va unganekwa ve li ongudu? Molwaashi omunhu umwe ita dulu okuudifila “ovanhu aveshe,” ovahongwa vaJesus ove na okukala va unganekwa ve li ongudu. Naasho osho Jesus a li a hala okutya ngaho eshi a lombwela ovahongwa vaye va ninge “ovayuli vovanhu.” (Lesha Mateus 4:18-22.) Jesus ka li ta popi omuyuli weeshi ta longifa ondjolo nokwa teelela eeshi di lye ko. Ponhele yaasho, okwa li ta popi kombinga yovayuli veeshi tava longifa eenete. Okukwata eeshi monghedi ya tya ngaho otaku pula oilonga youdiinini, okuunganekwa nosho yo elongelokumwe. — Lukas 5:1-11.

5. Omapulo ane elipi a pumbwa okunyamukulwa, nomolwashike?

⁵ Opo tu shiive kutya oolyelye tava udifa onghundana iwa kunena, otwa pumbwa okunyamukula omapulo ane taa shikula:

• Ovashikuli vaJesus ove na okuudifa etumwalaka lilipi?

• Ove na okukala ve na omalinyengotomheno elipi?

• Ove na okulongifa eenghedi dilipi?

• Oshilonga oshi na okulongwa fiyo openi, nofiyo onaini?

Omanyamukulo omapulo oo otae ke tu kwafela tu didilike mo kutya oolyelye tava longo oshilonga osho shokuxupifa eemwenyo naasho otashi ke tu twa omukumo tu twikile okuudifa. — 1 Timoteus 4:16.

6. Oshike tashi ulike kutya Eendombwedi daJehova ohadi udifa etumwalaka lashili?

⁶ Lesha Lukas 4:43. Jesus okwa li a udifila ovanhu “evangeli louhamba waKalunga,” nokwa hala ovahongwa vaye va ninge sha faafana. Ovanhu velipi hava udifile  ovanhu aveshe etumwalaka olo? Nopehe na omalimbililo, Eendombwedi daJehova ashike! Nokuli naavo vehe hole Eendombwedi daJehova ohave shi dimine. Pashihopaenenwa, diladila kwaasho omupristeri umwe omutumwa oo a kala moilongo ihapu ya yoolokafana a lombwela Ondombwedi yaJehova imwe. Moshilongo keshe omo a kala, omupristeri oo okwa pula Eendombwedi daJehova kutya etumwalaka lilipi hava udifa. Omupristeri okwa ti, “Aveshe kave na eendunge molwaashi ova pange enyamukulo la faafana kutya ohava udifa kombinga ‘yEvangeli lOuhamba waKalunga.’” Enyamukulo lEendombwedi odo itali ulike kutya fye omalai, ndele paulelalela otali ulike ashike kutya otwa hangana tu li Ovakriste vashili. (1 Ovakorinto 1:10) Kakele kaasho, Ouhamba waKalunga owo etumwalaka la fimana loshifo shOshungonangelo tai shiivifa Ouhamba waJehova. Oshifo osho ohashi nyanyangidwa momalaka 254, nohaku nyanayangidwa oupokati woshifo keshe 59 000 000 lwaapo. Osho otashi ulike kutya oshifo eshi osho unene hashi andjakanekwa mounyuni aushe.

7. Otu shi shii ngahelipi kutya ovafita veengeleka ihava udifa etumwalaka lashili?

⁷ Ovafita veengeleka ihava udifa kombinga yOuhamba waKalunga. Ngeenge tava popi kombinga yOuhamba, vahapu vomuvo ohava ti kutya oshinima shi li momutima womunhu. (Lukas 17:21) Ihava hongo ovanhu kutya Ouhamba waKalunga epangelo li li meulu olo tali pangelwa kuJesus. Ponhele yaasho, ohava popi ashike kombinga yaJesus pOkrismesa nosho yo pOpaasa. Ihava yelifile ovanhu kutya Ouhamba otau ka kandula po omaupyakadi aeshe ovanhu nonokutya mafiku otau ka hanauna po oukolokoshi aushe kombada yedu. (Ehololo 19:11-21) Oumbangi oo otau ulike kutya ovawiliki veengeleka kave shii osho Jesus ta ka ninga e li Ohamba yOuhamba waKalunga. Onghee hano, molwaashi kave udite ko etumwalaka laJesus, kave udite ko kutya omolwashike ve na okuudifa.

8. Elinyengotomheno li na sha noilonga yokuudifa lilipi la puka?

⁸ Ovahongwa vaJesus kave na okuudifa nelalakano lokulikola oimaliwa ile lokutungifa omatungo a denga mbada. Jesus okwa ti: “Onye mwa tambula oshali, yandjeni yo oshali.” (Mateus 10:8) Onghee hano, oilonga yokuudifa kai na okukala ongeshefa. (2 Ovakorinto 2:17) Ovahongwa vaJesus kave na okufutwa eshi tava udifa. (Lesha Oilonga 20:33-35.) Nonande elombwelo laJesus ola yela, eengeleka dihapu oda pwila mo ashike mokupula ongalo opo di file oshisho omatungo ado nokufuta ovafita novanailonga vavo. Osho osha ningifa ovafita veengeleka vahapu va ninge oipuna. — Ehololo 17:4, 5.

9. Eendombwedi daJehova ohadi ulike ngahelipi kutya ohadi udifa nelinyengotomheno la yuka?

⁹ Eendombwedi daJehova mbela ohadi umbu ongalo mOmalupale Ouhamba ile poyoongalele yado? Hasho! Oilonga yado ohai  yambididwa nomayambidido opashimaliwa ehalo liwa. (2 Ovakorinto 9:7) Omudo wa dja ko, oda longa hanga eevili omabiliyona avali tadi udifa onghundana iwa, noda ninga omakonakonombiibeli e dulife peemiliyona omuwoi omwedi keshe. Ihadi futwa omolwoilonga yado yokuudifa, ndele ohadi longifa oimaliwa yado nehalo liwa mokulonga oshilonga osho. Omukonakoni woinima umwe okwa popya shi na sha noilonga yEendombwedi daJehova a ti: “Elalakano lado okuudifa nokuhonga.” Okwa ti yo kutya kadi na ovafita hava futwa. Onghee hano, ngeenge ihatu udifa nelalakano lokulikola oimaliwa, ohatu udifa nelinyengotomheno lashike? Ohatu udifa nehalo liwa molwaashi otu hole Jehova novanhu vakwetu. Eliyambo la tya ngaho otali wanifa po exunganeko olo li li mEpsalme 110:3. (Lesha.)

10. Jesus novahongwa vaye ova li hava longifa eenghedi dilipi dokuudifa?

¹⁰ Jesus novahongwa vaye ova li va longifa eenghedi dilipi dokuudifa? Ova li hava i keshe opo tava hange ovanhu. Pashihopaenenwa, ova li hava udifa momapandavanda nopeenhele domalandifilo. Ova li yo hava i kovanhu momaumbo avo. (Mateus 10:11; Lukas 8:1; Oilonga 5:42; 20:20) Okuudifa eumbo neumbo oya li onghedi ya unganekwa yokuudifila ovanhu vomihoko adishe.

11, 12. Eenghendabala dEendombwedi daJehova dokuudifa onghundana iwa oda yooloka ko ngahelipi kwaado deengeleka?

¹¹ Mbela eengeleka ohadi udifa ngoo onghundana iwa ngaashi Jesus a li a ninga? Luhapu ovafita ohava futwa ngeenge tava udifile oilyo yavo. Ovafita va tya ngaho  ihava ka ninga ovanhu ovahongwa, ndele ohava kendabala okukaleka po ashike oilyo yavo oyo ve na nale. Pomhito imwe ova li va ladipika oilyo yavo i ka udifile ovanhu. Pashihopaenenwa momudo 2001, Omupapa John Paul II okwa li a shangela oilyo yongeleka yavo kutya oi na okuudifa evaengeli nokukala i na ouladi wa fa womuyapostoli Paulus, oo a ti: ‘Woo ame ngeenge itandi li udifa.’ Okwa ti vali kutya oilonga yokuudifa oi na okulongwa koilyo aishe yongeleka, ndele hakoohandimwe ashike ovo va deulilwa oilonga oyo. Ashike vamwe ova li va dulika keladipiko olo.

¹² Ongahelipi kombinga yEendombwedi daJehova? Odo adike hadi udifa kutya Jesus okwa hovela okupangela e li Ohamba okudja mo 1914. Ohadi dulika kuJesus noda lenga oilonga yokuudifa monghalamwenyo yado. (Markus 13:10) Embo Pillars of Faith—American Congregations and Their Partners, ola ti kutya Eendombwedi daJehova oda fimaneka oilonga yokuudifa neenghono. Ola ti yo kutya ngeenge oda hange ovanhu ve na ondjala, ve na owike ile tava vele, ohadi kendabala oku va kwafela, ashike ihadi dimbwa kutya elalakano lado la fimana okuudifa kombinga yexulilo lounyuni ou nokuhonga ovanhu kombinga yexupifo. Eendombwedi daJehova otadi twikile okuudifa etumwalaka olo nokuhopaenena eenghedi dokuudifa odo da li hadi longifwa kuJesus novahongwa vaye.

13. Oilonga yokuudifa oi na okukala ya kwatela mo shike?

¹³ Jesus okwa ti kutya ovashikuli vaye ove na okuudifa nokuhonga ovanhu onghundana iwa ‘mounyuni aushe.’ Ova lombwelwa va ninge ovanhu ‘vomoiwana aishe’ ovahongwa. (Mateus 24:14; 28:19, 20) Osho osha hala okutya onghundana iwa oi na okuudifilwa ounyuni aushe.

14, 15. Oshike tashi ulike kutya Eendombwedi otadi wanifa po exunganeko laJesus li na sha noilonga kutya oi na okulongwa fiyo openi? (Tala efano pehovelo loshitukulwa.)

¹⁴ Eendombwedi daJehova odo adike da wanifa po exunganeko laJesus olo kutya onghundana iwa oi na okuudifilwa ounyuni aushe. Omolwashike hatu tile ngaho? MoAmerika omu na ovaudifi vomeengeleka 600 000, ofimbo Eendombwedi daJehova di li mo 1 200 000 tadi udifa onghundana iwa. Mounyuni aushe omu na ovafita vaKatolika 400 000, ndele Eendombwedi odi li mo eemiliyona 8 nasha, tadi udifa onghundana iwa moilongo 240. Nopehe na omalimbililo, Eendombwedi daJehova otadi udifa onghundana iwa mounyuni aushe, oyo tai tumbalekifa Jehova. — Epsalme 34:2; 51:17.

¹⁵ Eendombwedi daJehova otadi lalakanene okuudifila ovanhu vahapu onghundana iwa ngaashi tashi dulika fimbo exulilo inali uya. Ndele opo di ninge ngaho, oda toloka noda nyanyangida omamiliyona omambo, oifo, oufo mwa kwatelwa vokushiva ovanhu koyoongalele nokEdimbuluko, momalaka e dulife 700. Oishangomwa ya tya ngaho ohatu i yandje kovanhu oshali. Momudo wa dja ko, otwa nyanyangida oishangomwa omabiliyona 4.5 lwaapo ye likolelela kOmbiibeli. Otwa nyanyangida yo Eembiibeli di dulife pomamiliyona 200 do-New World Translation of the Holy Scriptures momalaka e dulife 130. Nokepandja letu lokointaneta oku na omauyelele momalaka e dulife 750. Eendombwedi daJehova odo adike tadi longo oshilonga osho shikumwifi.

16. Otu shi shii ngahelipi kutya Eendombwedi daJehova odi na omhepo iyapuki yaKalunga?

 ¹⁶ Oilonga yokuudifa oi na okuudifwa fiyo onaini? Jesus okwa ti kutya onghundana iwa otai ka udifwa fiyo exulilo le uya. Tu li Eendombwedi daJehova, ohatu udifa nelididimiko momafiku aa axuuninwa kekwafo ashike lomhepo iyapuki yaJehova. (Oilonga 1:8; 1 Petrus 4:14) Ovanhu vamwe vomomalongelokalunga otashi dulika va tye:“Otu na omhepo iyapuki.” Ndele mbela otava dulu ngoo okulonga oshilonga osho tashi longwa kEendombwedi daJehova momafiku aa axuuninwa? Vamwe ova kendabala okuudifa ngaashi Eendombwedi daJehova, ndele ova xulila mounyengwi. Vamwe vali ohava kala va hala okuudifa, ndele ohave shi ningi ashike oule wokafimbo. Vamwe vali otashi dulika va kendabale okuudifa eumbo neumbo, ndele itava udifa onghundana iwa yOuhamba. Onghee hano, itava dulu okulonga oshilonga shokuudifa osho Jesus a li a hovela.

17, 18. (a) Omolwashike tu na oushili kutya Eendombwedi daJehova odo adike tadi udifa onghundana iwa yOuhamba waKalunga kunena? (b) Oshike hashi tu kwafele tu twikile okulonga oshilonga shokuudifa?

¹⁷ Oolyelye tava udifa onghundana iwa yOuhamba kunena? Eendombwedi daJehova odo ashike hadi udifa onghundana iwa. Osho otu shi shii ngahelipi? Omolwaashi ohatu udifa etumwalaka li li mondjila, onghundana iwa yOuhamba waKalunga. Ohatu ka konga ovanhu tu va udifile, nokungaho ohatu longifa onghedi oyo i li mondjila. Ohatu udifa molwaashi otu hole Jehova nosho yo ovanhu vakwetu, osho tashi ulike kutya ohatu udifa nomalinyengotomheno a yuka. Otashi ulike kutya ohatu udifa mounyuni aushe, molwaashi ohatu udifile ovanhu aveshe novomalaka aeshe. Onghee hano, ohatu twikile okuudifa onghundana iwa yOuhamba fiyo osheshi exulilo le uya.

¹⁸ Oshikumwifi neenghono shili okutala oshilonga shokuudifa onghundana iwa sha denga mbada osho tashi longwa koshiwana shaJehova momafiku aa axuuninwa. Ndele mbela oshike hashi tu kwafele tu dule okulonga oshilonga osho? Omuyapostoli Paulus okwa yelifa a ti: “Kalunga Oye tuu ha longo munye okuhala nokulonga pahokwe yaye.” (Ovafilippi 2:13) Jehova na twikile oku tu pa eenghono odo twa pumbwa opo tu ninge ngaashi hatu dulu tu twikile okuudifa onghundana iwa yOhamba waKalunga. — 2 Timoteus 4:5.