1, 2. (a) Eendombwedi daJehova oda tala ko ngahelipi Ombiibeli? (b) Embo lOmbiibeli lilipi u hole unene?

TU LI Eendombwedi daJehova, otu hole Ombiibeli molwaashi ohai tu hekeleke, hai tu pe eteelelo nosho yo omalombwelo oo hatu dulu okulineekela. (Ovaroma 15:4) Ombiibeli kai fi embo lounongo wopanhu ndele oi li “ondjovo yaKalunga.” — 1 Ovatessaloniki 2:13.

² Konyala atushe otu na omambo onhumba mOmbiibeli oo tu hole. Vamwe ove hole omambo Omavaengeli molwaashi okwa ulika omaukwatya aJehova a denga mbada okupitila muJesus. (Johannes 14:9) Vamwe vali ove hole omambo omaxunganeko ngaashi Ehololo olo le tu hololela oinima “ei i nokuningwa diva.” (Ehololo 1:1) Vamwe ohava hekelekwa ngeenge tava lesha Omapsalme, navamwe ohava hafele omayele taa kwafa oo e li mOmayeletumbulo. Onghee hano, ohatu dulu okutya Ombiibeli embo lakeshe umwe.

3, 4. (a) Otwa tala ko ngahelipi oishangomwa yetu? (b) Oishangomwa ilipi tu na ya nuninwa ovanhu vonhumba kondadalunde?

³ Molwaashi otu hole Ombiibeli, otu hole yo oishangomwa yetu shaashi oya kanghamena kEendjovo daKalunga. Omambo,  oumbo, oifo noileshomwa aishe oyo hatu mono oi li omafiloshisho a dja kuJehova. Ohai tu kwafele tu ehene popepi naye nokupameka eitavelo letu. — Titus 2:2.

⁴ Oishangomwa yetu ihapu ohai shangelwa Eendombwedi daJehova. Ashike ope na yo oishangomwa imwe oyo hai shangelwa ovanhu vonhumba ngaashi ovanyasha novadali. Oitukulwa ihapu nouvidio ovo ve li konhele yetu yokointaneta ova longekidilwa unene ovanhu ovo vehe fi Eendombwedi daJehova. Omafiloshisho aeshe oo otaa ulike kutya Jehova ina dimbwa eudaneko laye lokupa ovanhu aveshe eendja dopamhepo da wana. — Jesaja 25:6.

5. Otu na oushili kutya Jehova oha kala a hafa ngeenge hatu ningi shike?

⁵ Vahapu vomufye ohatu kala twa pumbwa efimbo lihapu tu leshe Ombiibeli noishangomwa yetu. Onghee hano, otashi dulika haalushe hatu tu mono efimbo lokukonakona oshishangomwa keshe hatu mono. Otu na oushili kutya Jehova oha kala a hafa ngeenge hatu longifa efimbo letu nawa mokulesha nomokukonakona Ombiibeli nosho yo oishangomwa yetu. (Ovaefeso 5:15, 16) Ashike, otu na okulungamena oshinima shimwe sha nyika oshiponga. Oshinima osho oshilipi mbela?

6. Oshike tashi dulu oku tu imba tu mone ouwa momafiloshisho aJehova?

⁶ Ngeenge inatu lungama otashi dulika tu diladile kutya oitukulwa imwe yOmbiibeli ile yoishangomwa yonhumba itai longo kufye. Pashihopaenenwa, ongahelipi ngeenge oshitukulwa shimwe shOmbiibeli otashi monika sha fa itashi longo kufye? Ile ongahelipi ngeenge ouyelele woshishangomwa shonhumba hafye wa nuninwa kondadalunde? Mbela ohatu lesha ouyelele wa tya ngaho hatu tondoka mo ashike ile tuhe u leshe nandenande? Ngeenge osho hatu ningi ngaho, ohatu dulu okupitililwa po noupu kouyelele wa fimanenena oo tau dulu oku tu etela ouwa. Ongahelipi hatu dulu okuhenuka oshinima sha tya ngaho sha nyika oshiponga? Otu na okudimbuluka kutya ouyelele aushe oo hatu mono owa dja kuJehova. Ombiibeli oya ti: “Aame Omwene Kalunga koye, ou handi ku longo eshi tashi ku wapalele.” (Jesaja 48:17) Moshitukulwa eshi ohatu ka kundafana oitwa yopatatu oyo tai ke tu kwafela tu mone ouwa momafiloshisho aeshe oo Jehova he tu pe.

7. Omolwashike tu na okulesha Ombiibeli nehalo lokushiiva?

⁷ Lesha nehalo lokushiiva. Oshoshili kutya omatukulwa amwe mOmbiibeli okwa li a shangelwa omunhu umwe kondadalunde ile ovanhu vonhumba. Ashike Ombiibeli oya popya kutya “Omishangwa adishe da yandjwa keenghono dOmhepo yaKalunga odi shii kulonga.” (2 Timoteus 3:16) Nomolwaasho twa pumbwa okukala hatu lesha Ombiibeli tu na ehalo lokushiiva. Omumwatate umwe oha kaleke momadiladilo kutya ota dulu okulihonga oilihongomwa ihapu mehokololo ashike limwe. Osho oshe mu kwafela a mone oilihongomwa oyo ihe li poluhaela. Onghee hano, fimbo inatu lesha Ombiibeli, otu na okupula Jehova e tu pe ehalo lokushiiva, nounongo wokuuda ko oilihongomwa oyo a hala tu lihonge. — Esra 7:10; lesha Jakob 1:5.

8, 9. (a) Omapulo elipi hatu dulu okulipula ngeenge hatu lesha Ombiibeli? (b) Oiteelelwa yovakulunhuongalo otai tu lombwele shike kombinga yaJehova?

⁸ Lipula omapulo. Ngeenge to lesha Ombiibeli, kanghama po manga nokulipula omapulo taa landula: ‘Ovelishe ei otai lombwele nge shike kombinga yaJehova? Ongahelipi handi dulu okulongifa ouyelele ou monghalamwenyo  yange? Ongahelipi handi dulu okulongifa ouyelele ou opo ndi kwafele ovanhu vakwetu?’ Ngeenge otwa dilonga komapulo oo, ohatu ka mona ouwa pauyadi melesho letu lOmbiibeli. Natu ka taleni koshihopaenenwa shimwe. Ombiibeli oya tumbula oiteelelwa yonhumba oyo i na okuwanifwa po kwaavo va hala okuninga ovakulunhuongalo. (Lesha 1 Timoteus 3:2-7.) Ndele molwaashi vahapu vomufye katu fi ovakulunhuongalo, otashi dulika tu diladile kutya itatu dulu okumona mo ouwa moiteelelwa oyo. Natu kundafaneni omapulo atatu oo a tumbulwa mokatendo aka opo tu tale nghee oiteelelwa ei tai dulu oku tu kwafela atusheni.

⁹ “Ovelishe ei otai lombwele nge shike kombinga yaJehova?” Jehova okwe tu pa omusholondodo woiteelelwa oyo ina okuwanifwa po kwaavo va wana okuninga ovakulunhuongalo. Okwa tula po omifikamhango da denga mbada odo di na okuwanifwa po kovalumenhu ovo tava pashukile eongalo. Osho otashi ulike kutya eongalo oli li oshinima shi na ondilo kuJehova. Ombiibeli oya ti kutya eongalo okwe li lilikolela “nohonde” yOmona waye. (Oilonga 20:28) Jehova okwa teelela ovakulunhuongalo va kale oihopaenenwa iwa, nonokutya otave ke lihokolola kuye omolwonghedi omo hava ungaunga noilyo yeongalo. Okwa hala tu kale tu udite tu li meameno eshi tave tu pashukile. (Jesaja 32:1, 2) Ngeenge hatu lesha oiteelelwa oyo ina okuwanifwa po opo omunhu a ninge omukulunhuongalo, ohatu lihongo mo kutya Jehova oku na ko nasha nafye shili.

10, 11. (a) Ongahelipi hatu dulu okutula moilonga ouyelele oo monghalamwenyo yetu ngeenge hatu lesha oiteelelwa yovakulunhuongalo? (b) Ongahelipi hatu dulu okulongifa ouyelele oo ngeenge hatu kwafele ovanhu vakwetu?

 ¹⁰ “Ongahelipi handi dulu okulongifa ouyelele ou monghalamwenyo yange?” Ngeenge ou li omukulunhuongalo, ou na okukala ho endulula mo moiteelelwa yovakulunhuongalo nokukendabala okuxwepopala. Ngeenge owa “hala oshilonga shoufitaongalo” ou na okukendabala u wanife po oiteelelwa oyo. (1 Timoteus 3:1) Ashike Ovakriste aveshe otava dulu okulihonga mo sha moiteelelwa ya tya ngaho. Pashihopaenenwa, Jehova okwa teelela ovapiya vaye aveshe va kale nondjele neendunge dokuyoolola. (Ovafilippi 4:5; 1 Petrus 4:7) Ngeenge ovakulunhuongalo ova kala ve li “ovahopaelelwa voufita” ohatu ke lihonga kuvo ‘nokushikula eitavelo lavo.’ — 1 Petrus 5:3; Ovaheberi 13:7.

¹¹ “Ongahelipi handi dulu okulongifa ouyelele ou opo ndi kwafele ovanhu vakwetu?” Ohatu dulu okulongifa omusholondodo woiteelelwa yaavo va hala okuninga ovakulunhuongalo opo tu kwafele ovakonakonimbiibeli vetu nosho yo vamwe ovo ve na ohokwe opo va shiive nghee ovakulunhuongalo va yooloka ko kovafita vomalongelokalunga. Oiteelelwa oyo otai dulu yo oku tu kwafela tu mone kutya ovakulunhuongalo ohava longo noudiinini meongalo. Osho otashi ke tu kwafela tu fimaneke ovamwatate va tya ngaho. (1 Ovatessaloniki 5: 12) Ngeenge otwa kala twe va fimaneka otashi ke va etela ehafo linene eshi tava wanifa po oshilonga shavo. — Ovaheberi 13:17.

12, 13. (a) Omapekapeko elipi hatu dulu okuninga hatu longifa oilongifo oyo tu na? (b) Ongahelipi okukonga omauyelele a wedwa po taku dulu oku tu kwafela tu mone oilihongomwa oyo ihai kala naanaa i liwetikile mo?

¹² Ninga omapekapeko. Ngeenge hatu konakona Ombiibeli, ohatu dulu okukonga omanyamukulo omapulo aa taa landula:

• Olyelye omushangi woshitukulwa shembo eli lOmbiibeli?

• Openi nonaini oshitukulwa shembo olo sha shangelwa?

• Oiningwanima ya fimana ilipi ya li tai ningwa eshi oshitukulwa shembo eli sha shangwa?

Ouyelele wa tya ngaho otau dulu oku tu kwafela tu mone oilihongomwa oyo tashi dulika ihe li poluhaela.

¹³ Pashihopaenenwa, Ombiibeli muHesekiel 14:13, 14 oya ti: “Oshilongo ngenge tashi nyono kuame . . . , ndee Ame ohandi nane eke lange kusho, ndee Ame handi teya po eyambidido lomungome washo ndee handi shi tumine ondjala, ndee Ame handi mane po musho ovanhu noimuna, nonande ovalumenhu aveshe ava vatatu, Noa, Daniel naJob va kale ngeno mokati kasho, vo otave lixupifile eemwenyo davo adike, Omwene Kalunga ta ti.” Ngeenge otwa ningi omapekapeko moshinima osho, ohatu lihongo kutya Hesekiel okwa shanga eendjovo odo omido 612 lwaapo fimbo Kristus ine uya kombada yedu. Noa naJob ova hangwa nale va fya omido omafele da pita, ndele Jehova natango ota dimbuluka oudiinini wavo. Ashike pefimbo opo Daniel okwa li e li momwenyo. Eshi Jehova a popya kombinga yaye kutya omudiinini ngaashi Noa naJob  okwa li e na omido 20 lwaapo. Oshike hatu lihongo moshihopaenenwa osho? Ohatu lihongo mo kutya Jehova oku wete nokwa lenga ovapiya vaye ovadiinini mwa kwatelwa ovanyasha. — Epsalme 148:12-14.

14. Ongahelipi ouyelele oo wa nuninwa ovanyasha tau va kwafele, nongahelipi vamwe tava dulu yo okumona mo ouwa? (Tala efano pehovelo loshitukulwa.)

¹⁴ Oishangomwa oyo ya nuninwa ovanyasha. Otwe lihonga kutya ohatu dulu okumona ouwa momambo aeshe Ombiibeli. Sha faafana, ohatu dulu okumona ouwa moishangomwa yetu aishe. Natu kundafaneni oihopaenenwa imwe. Omido opo da di ko, Jehova okwa kala nokuyandja ouyelele uhapu u na sha novanyasha. ^[1] (Tala eshangelo lopexulilo loshitukulwa.) Ouyelele oo ohau va kwafele va kondjife omafininiko keefikola nosho yo omashongo oo hava shakeneke eshi tava kulu. Ndele ongahelipi atusheni hatu dulu okumona ouwa mokulesha oitukulwa nomambo oo? Ngeenge hatu lesha ouyelele oo, ohatu lihongo mo kombinga yomaupyakadi ovanyasha, naasho otashi ka kala shipu kufye oku va kwafela noku va pameka.

15. Omolwashike ovakulunhu Ovakriste ve na okukala ve na ohokwe mouyelele oo wa nuninwa ovanyasha?

¹⁵ Ovakulunhu Ovakriste kave na okukala ve udite kutya vo itava dulu okulesha ouyelele oo wa nuninwa ovanyasha. Omaupyakadi mahapu oo a kundafanwa moitukulwa yovanyasha ohaa kumu Ovakriste aveshe. Pashihopaenenwa, atusheni otwa pumbwa okupopila eitavelo letu, okupangela omaliudo etu, okukondjifa omafininiko oomakula, okuhenuka eendafano lii nomalihafifo inaa koshoka. Onghee hano, nonande oishangomwa oyo oya shangelwa ovanyasha, ouyelele oo u li mo owa dja mOmbiibeli nOvakriste aveshe otava dulu okumona ouwa.

16. Oishangomwa yetu ohai kwafele yo ovanyasha va ninge shike?

¹⁶ Oishangomwa oyo ya shangelwa ovanyasha otai dulu yo oku va kwafela va pameke ekwatafano lavo naJehova. (Lesha Omuudifi 12:1, 13.) Ovakulunhu navo otava dulu okumona mo ouwa. Pashihopaenenwa, oshifo sho-Awake! shaAprili 2009 oshi na oshitukulwa “Young People Ask . . . How Can I Make Bible Reading Enjoyable?” Oshitukulwa osho oshi na omaetepo taa kwafa nosho yo oshimhungu osho hatu dulu okukonda mo, ndele hatu shi tuvikile noku shi longifa pekonakono letu. Mbela ovakulunhu navo ova mona mo ouwa moshitukulwa osho? Omukainhu umwe oo e li omudali okwa ti kutya okulesha Ombiibeli okwa kala kudjuu kuye. Ashike okwa li a longifa omaetepo oo e li moshitukulwa osho, nopaife oha kala a halelela okulesha Ombiibeli. Okwa ti kutya oha hafele okumona nghee omambo Ombiibeli a pambafana, naasho oshe mu kwafela a kale e na efano liwa momadiladilo. Okwa weda ko a ti: “Ohandi hefele oku i lesha shi dulife nale.”

17, 18. Ongahelipi hatu dulu okumona ouwa mokulesha oishangomwa oyo ya nuninwa oukalele? Yandja oshihopaenenwa.

¹⁷ Oileshomwa yomoukalele. Okudja momudo 2008 otwa kala hatu hafele Oshungonangelo yokukonakonwa. Oshungonangelo oyo  oya shangelwa unene Eendombwedi daJehova, ashike otu na yo oifo oyo ya nuninwa oukalele. Ongahelipi hatu dulu okumona ouwa moifo yomoukalele? Natu taleni koshihopaenenwa eshi. Ngeenge wa shiva omunhu e uye kOlupale lOuhamba ndele te uya, oho kala wa hafa. Eshi omupopi ta yandje oshipopiwa, oho kala to diladila kombinga yomunhu oo. Oho kala to lipula nghee omunhu oo e udite eshi ta pwilikine kouyelele oo nonghee tau dulu okulundulula onghalamwenyo yaye. Osho ohashi kumu omutima woye, noho kala wa hafela unene oshikundafanwa osho.

¹⁸ Ngeenge hatu lesha oileshomwa yomoukalele otashi dulika tu ningilwe oshinima sha faafana. Pashihopaenenwa, Oshungonangelo yomoukalele nosho yo oitukulwa oyo i li ko-jw.org oya fatulula Ombiibeli tai longifa eendjovo nomautumbulilo oo mapu okuudiwa ko. Ngeenge otwa kala hatu lesha ouyelele oo, ohatu ka kala neudeko lomoule nokupameka ohole yetu yokuhola oshili yOmbiibeli oyo tu shii nale. Ohatu dulu yo okulihonga mo eenghedi dipe odo tadi dulu oku tu kwafela tu yelife eitavelo letu moukalele. Monghedi ya faafana, oshifo sho-Awake! ohashi pameke eitavelo letu kutya oku na Omushiti. Otashi dulu yo oku tu kwafela tu lihonge nghee hatu dulu okupopila eitavelo letu.— Lesha 1 Petrus 3:15.

19. Ongahelipi hatu dulu okuulikila Jehova olupandu omolwomafiloshisho aye?

¹⁹ Nopehe na omalimbililo, Jehova oha yandje omayele mahapu nohe tu hongo omolwouwa wetu. (Mateus 5:3) Onghee hano, natu twikileni okulesha nokutula moilonga ouyelele aushe oo he tu pe. Ngeenge otwe shi ningi, ohatu ka mona ouwa nohatu ka ulika kutya otwa pandula eshi Jehova e tu pa omafiloshisho aeshe oo. — Jesaja 48:17.