NO ANIA TI KUNA TI BIBLIA
Salun-at
Interesado kadi ti Dios no kasano ti panangaywantayo iti bagitayo?
“Dika makikadua kadagiti nakaro ti panagin-inumna iti arak, kadagidiay a nabuklis a mannangan iti lasag.”—Proverbio 23:20.
APAY A PAKASEKNAM DAYTA?
Ti Biblia ket saan a libro maipapan iti medisina. Saan met a mangted kadagiti pagannurotan iti tunggal aspeto ti kababalin ti tao. Kaskasdi a magunggonaanka no ammuem ti nailanad iti Biblia a panangmatmat ti Dios maipapan iti salun-at.
TI KUNA TI BIBLIA
Ilawlawag ti adu a teksto ti Biblia no ania ti panagrikna ti Dios maipapan iti pamay-antayo a mangaywan iti bagitayo. Kas pagarigan, kondenaren ti Biblia dagiti makadangran nga aglablabes nga aramid, agraman ti panagbartek ken kinarawet. (Proverbio 23:20) Iti Linteg ti Dios a naited iti nagkauna nga Israel, nairaman dagiti pamay-an a mangkontrol ken iti dadduma a kasasaad, manglapped pay ketdi kadagiti sakit. Nairaman met iti Linteg dagiti espesipiko a pagannurotan iti kinatalged tapno maliklikan dagiti pannakadangran. (Deuteronomio 22:8) Nalawag nga iparparegta ti Biblia a salaknibantayo ti bagitayo ken ikagumaantayo nga aywanan ti salun-attayo.
Sigun iti Biblia, apay nga agsakittayo?
“Babaen iti maysa a tao simrek ti basol iti lubong ken ti ipapatay babaen iti basol.”—Roma 5:12.
TI KUNA TI TATTAO
Adu ti mamati a ti sakit ket maysa la dakes a resulta ti ebolusion ti tao. Kuna met ti dadduma a gapu dayta kadagiti misterioso a puersa, kas kadagiti dakes nga espiritu.
TI KUNA TI BIBLIA
Sigun iti Biblia, agsakittayo gapu ta simmukir iti Dios ti umuna a tao. (Roma 5:12) Sakbay a simmukir ti immuna a nagannaktayo a da Adan ken Eva, perpekto idi ti salun-atda. Ammoda a matayda no laksidenda ti naayat a panangaywan ti Dios kadakuada. (Genesis 2:16, 17) Kaskasdi a sipapakinakem a pinutedda ti pannakigayyemda iti Dios isu a napukawda ti kinaperpektoda. *
Ti kinaimperpekto dagiti nasukir nga immuna a nagannaktayo ket impatawidda kadatayo. Isu nga uray no ikagkagumaantayo a liklikan ti agsakit, agsakittayo latta.
ANIA TI MABALINMO NGA ARAMIDEN?
Isursuro ti Biblia a no agtulnogka kadagiti nainsiriban a prinsipio ti Dios, maaddaanka iti nasayaat a relasion kenkuana ket matagiragsakmonto ti perpekto a salun-at iti paraiso a daga. (Isaias 33:24) Inkari ti Dios a pukawenna ti ut-ot, sakit, ken ipapatay.—Apocalipsis 21:3, 4.
Iparit kadi ti Biblia ti panagpadoktor?
“Dagiti tattao a nasalun-at saanda a kasapulan ti mangngagas, no di ket dagiti masaksakit.”—Mateo 9:12.
TI KUNA TI TATTAO
Ad-adda nga iparparegta ti dadduma ti naespirituan a panangpaimbag (a pagaammo met kas faith healing) ngem iti panagpadoktor.
TI KUNA TI BIBLIA
Idi panawen ti Biblia, impalubos ti Dios a maaddaan ti ilina kadagiti mangaywan iti salun-atda. (Genesis 38:28; Colosas 4:14) Awan mabasatayo iti Biblia a mangipakita a saan a kayat ti Dios ti panangusarda kadagiti makaagas a mula, pagsapsapo, nairekomenda a taraon, ken dadduma pay a pamay-an ti panangagas. Kinapudnona, kinuna ni Jesus a “dagiti tattao a nasalun-at saanda a kasapulan ti mangngagas, no di ket dagiti masaksakit.”—Mateo 9:12.
Ngem saan nga iparparegta ti Biblia ti amin a kita ti panangagas. Kas pagarigan, saan nga irekomenda ti Biblia ti maar-aramid ita a faith healing. Saan met nga anamongan ti Dios dagiti panangagas nga adda pakainaiganna iti espiritismo. (Galacia 5:19-21) Ti nainsiriban ngarud nga aramiden no agsakittayo ket mapantayo a dagus iti maitutop a pagpaagasan no posible, imbes nga agpannuraytayo kadagiti panangagas a kondenaren ti Biblia.
^ par. 10 Iti daytoy nga artikulo, ti sasao a “perpekto” ken “kinaperpekto” ket tumukoy iti nasalun-at a kasasaad da Adan ken Eva idi pinarsua ida ti Dios. Dida idi agsakit ken matay.