Ti Ikarkari “ti Maymaysa a Pudno a Dios”

INKABIL ni Jehova a Dios ti immuna a pagassawaan iti paraiso a daga​—ti minuyongan ti Eden. Binilinna ida a maaddaan kadagiti annak ken ‘iturayanda ti daga,’ a karaman dayta ti panangpalawa iti Paraiso a pagnaedanda bayat nga umadu ti pamiliada. (Genesis 1:26-28; 2:15) Matungpalto kadi ti panggep ti Dios a sagrapento dagiti tattao ti naindagaan a paraiso?

Wen, matungpalto! Sigun iti padto ti Biblia, ‘ni Jehova alimonennanto ni patay iti agnanayon’ ket “punasennanto ti amin a lua iti amin a rupa.” Inton mapasamak daytoy, “pudno unay a kunaento ti maysa: ‘Adtoy! Daytoy ti Diostayo. Nanginanamatayo kenkuana, ket isalakannatayto. Daytoy ni Jehova. Nanginanamatayo kenkuana. Agrag-otayo koma ken agragsaktayo iti panangisalakanna.’”​—Isaias 25:8, 9.

Deskribiren ti maudi a libro ti Biblia dagiti kasasaad ditoy daga kalpasan a naikkaten ti agdama a lubong, wenno ti sistema dagiti bambanag nga iturturayan ni Satanas. Maipapan iti “baro a daga” a buklen dagiti tattao nga agay-ayat iti Dios, kuna ti Biblia: “Ti tolda ti Dios adda iti sangatauan, ket isu makipagnaedto kadakuada, ket isudanto dagiti ilina. Ket ti Dios a mismo addanto kadakuada. Ket punasennanto ti amin a lua kadagiti matada, ket awanton ni patay, awanto metten  ti panagleddaang wenno panagsangit wenno ut-ot.”​—Apocalipsis 21:1-4.

Anian a nakaskasdaaw a karkari! Patientayo kadi dagitoy? Amirisenyo no kasano a ti nasakripisiuan nga ipapatay ni Jesus ken dagiti milagro nga inaramidna ket nangipaay iti pammatalged a tungpalen ti Dios ti aniaman nga inkarina.​—2 Corinto 1:20.

Ti Biag ni Jesus kas Subbot

Idi sinugsogan ni Satanas ni Adan tapno agsukir iti Dios ken agbasol, tinawid ti amin nga annak ni Adan ti basolna. “No kasano a babaen iti maysa a tao simrek ti basol iti lubong ken ti ipapatay babaen iti basol,” kuna ti Biblia, “ti ipapatay nagsaknap iti amin a tattao agsipud ta nagbasolda amin.” Ngem ituloy ti salaysay ti Biblia: “Babaen ti panagtulnog ti maysa a persona [ti perpekto a tao a ni Jesus] adu ti maibilangto a nalinteg.” (Roma 5:12, 19) Kas naibaga iti immuna nga artikulo daytoy a serye, ni Jesus “ti maudi nga Adan,”​—daydiay “naggapu iti langit”​—daydiay nangipaay iti biagna kas “subbot a kasukat dagiti adu.”​—1 Corinto 15:45, 47; Mateo 20:28.

No kasta, amin a mamati ken Jesus mabalinda nga awaten ‘ti pannakaluk-at iti basol babaen ti subbot’ ket mabalinda a tagiragsaken ti biag nga agnanayon. (Efeso 1:7; Juan 3:36) Sigurado a maragsakantayo ta kasta unay ti panagayat ni Jehova a Dios iti lubong ti sangatauan ta intedna ti Anakna kas Manangisalakan kadatayo! (Lucas 2:10-12; Juan 3:16) Ti panangusig iti inaramid ni Jesus maigapu iti agsagsagaba a sangatauan idi umuna a siglo ti mangted kadatayo iti pannakaawat maipapan iti masanguanan. Ket talaga a nakaskasdaaw ti inaramid ni Jesus!

Dagiti Panirpatan iti Baro a Lubong

Kabaelan ni Jesus nga agasan ti tunggal masakit ken adda an-annayenna a tao a naiyeg kenkuana. Awan ti dina napaimbag, aniaman ti sakit wenno an-annayenda. Kasta met, simimilagro a pinakanna ti rinibu babaen laeng iti sumagmamano nga ikan ken tinapay, ket saan la a namnaminsan nga inaramidna ti kasta.​—Mateo 14:14-22; 15:30-38.

Idi insubli ni Jesus ti panagkita ti maysa a lalaki a nayanak a bulsek, binigbig dagiti kaarruba ken am-ammona ti milagro, ngem nagduadua dagiti Judio a panguluen ti relihion. Isu a ti lalaki a naisubli ti panagkitana nakirinnason kadakuada: ‘Manipud idi ugma saan a pulos a nangngegan a ti asinoman linuktanna dagiti mata ti maysa a nayanak a bulsek. No daytoy a tao saan a naggapu iti Dios, awan a pulos ti mabalinna nga aramiden.’​—Juan 9:32, 33.

Bayat ti ministerio ni Jesus, ti kasinsinna a ni Juan a Mammautisar a naibalud ket nangibaon kadagiti mensahero tapno patalgedanda ti damag maipapan ken Jesus. “Iti dayta nga oras,” kinuna ti Biblia, ni Jesus “inagasanna dagiti adu manipud kadagiti sakit ken nadagsen a sagubanit ken kadagiti nadangkes nga espiritu, ket impaayanna ti adu a bulsek a tattao iti pabor a makakita.” Kalpasanna imbaga ni Jesus kadagiti mensahero: “Ipadamagyo ken Juan ti nakita ken nangngegyo: dagiti bulsek makakitada, dagiti pilay magmagnada, dagiti agkukutel madaldalusanda ket dagiti tuleng makangkangngegda, dagiti natay maibangbangonda.”​—Lucas 7:18-22.

Panunotem dayta: No adda naimbag a napasamak idi napalabas, saantay kadi nga agtalek nga addanto manen mapasamak? Babaen kadagiti milagrona, impakita ni Jesus iti bassit a pamay-an no anianto ti naindaklan nga aramidenna inton agturay kas Ari iti Pagarian ti Dios. Dagiti milagro nga inaramidna ti pammaneknek nga isu ket imbaon ti Dios ken isu a talaga ti Anak ti Dios.

Bayat ti panagturay ti Pagarian ti Dios, literal a matungpalto dagiti naipadto a nakaskasdaaw a bambanag. Kas naipadto, maluktan ti matmata dagiti bulsek, makangngeg ti lapayag dagiti tuleng, aglagto dagiti pilay a kas iti ugsa, ken awanton ti agsakit. Natalna ken natalgedton ti sadinoman a lugar ditoy daga. Uray dagiti animal a narungsot ita ket agbalinton a naamo iti tao.​—Isaias 9:6, 7; 11:6-9; 33:24; 35:5, 6; 65:17-25.

Kayatmo kadi ti agbiag nga agnanayon iti sidong ti Pagarian ti Dios, a nalikmut kadagita a kasasaad? Impakita ni Jesus no ania ti masapul nga aramidem idi nagkararag ken amana: “Daytoy kaipapananna ti agnanayon a biag, ti pananggun-odda iti pannakaammo maipapan kenka, ti maymaysa a pudno a Dios, ken iti daydiay imbaonmo, ni Jesu-Kristo.” (Juan 17:3) Sapay koma ta awan ti ipalubosmo a manglapped kenka a mangitultuloy a manggun-od iti kasta a makaited-biag a pannakaammo.

[Ladawan iti panid 10]

Daytoy ti inkari ti Dios para iti daga