Esdras 4:1-24
4 Idi nadamag dagiti kabusor ti Juda ken Benjamin+ nga ibangbangon manen dagiti nagsubli+ nga umili ti templo ni Jehova a Dios ti Israel,
2 dagus nga immasidegda ken Zerubabel ken kadagiti ulo dagiti pamilia, ket kinunada: “Palubosandakami a tumulong nga agibangon, ta daydayawenmi* met ti Diosyo+ ken agidatdatonkami kenkuana manipud pay idi impannakami ditoy ni Ari Esar-haddon+ ti Asiria.”+
3 Ngem kinuna da Zerubabel ken Jesua ken ti dadduma pay nga ulo dagiti pamilia ti Israel: “Saanmi a kasapulan ti tulongyo a mangibangon iti balay ti Diosmi,+ ta dakami laeng ti mangibangon iti dayta para ken Jehova a Dios ti Israel, kas imbilin ni Ari Ciro nga ari ti Persia.”+
4 Gapuna, dagiti umili iti dayta a daga intultuloyda nga upayen* ken pakapuyen ti pakinakem dagiti Judio nga agibangon.+
5 Nangbayadda kadagiti mamalbalakad tapno maisardeng ti panagibangon dagiti Judio+ bayat ti panagturay ni Ari Ciro ti Persia agingga iti panagturay ni Ari Dario+ ti Persia.
6 Iti rugi ti panagturay ni Ahasuero, nangisuratda iti akusasion maibusor kadagiti agnanaed iti Juda ken Jerusalem.
7 Ken idi kaaldawan ni Ari Artaxerxes ti Persia, da Bislam, Mitredat, Tabeel, ken ti dadduma pay a kakaduada nagsuratda ken Ari Artaxerxes. Impatarus ken insuratda dayta iti Aramaiko.*+
8 * Nagsurat da Rehum a panguluen nga opisial ti gobierno ken ni Simsai nga eskriba, ket kastoy ti insuratda ken Ari Artaxerxes maibusor iti Jerusalem:
9 (Naggapu daytoy kada Rehum a panguluen nga opisial ti gobierno ken ni Simsai nga eskriba ken ti dadduma pay a kakaduada, dagiti ukom ken ti dadduma pay a gobernador, dagiti sekretario, dagiti umili ti Erek,+ dagiti Babilonio, dagiti agnanaed iti Susa,+ nga isu dagiti Elamita,+
10 ken ti dadduma pay a nasion a pinagnaed ti nabileg ken madaydayaw a ni Asenapar kadagiti siudad ti Samaria,+ ken iti dadduma pay a lugar iti Labes ti Karayan,*
11 ket daytoy ti linaon ti surat nga impatulodda kenkuana.)
“Kenka Ari Artaxerxes, manipud kadagiti adipenmo a lallaki iti Labes ti Karayan:
12 Kayatmi nga ipakaammo iti ari a simmangpeten ditoy Jerusalem dagiti Judio a nagnaed kadagiti lugar a sakupmo. Ibangbangonda manen ti nasukir ken dakes a siudad, ket tartarimaanendan dagiti pader+ ken pundasionna.
13 Kayatmi nga ipakaammo iti ari a no mabangon manen daytoy a siudad ken malpas dagiti paderna, saandanto a mangted iti buis,*+ ket bumassit ti mapastrek ti pagarian.
14 Gapu ta aggapgapu iti palasio ti sueldomi,* saanmi a kayat a madaksan ti ari isu nga impakaammomi daytoy iti ari,
15 tapno masukimat koma ti libro ti pakasaritaan dagidi ammam.+ Iti kasta, maammuamto a daytoy a siudad ket nasukir ken pagdaksan dagiti ari ken dagiti probinsia,* ken agnanaed iti dayta dagiti mangisungsungsong iti panagrebelde manipud pay idi, isu a nadadael daytoy a siudad.+
16 Ipakaammomi iti ari a no mabangonto manen daytoy a siudad ken malpas dagiti paderna, saanmonton a maiturayan* dagiti lugar iti Labes ti Karayan.”+
17 Kastoy ti impaisurat ti ari para kada Rehum a panguluen nga opisial ti gobierno ken ni Simsai nga eskriba ken kadagiti kakaduada nga agnanaed iti Samaria ken kadagiti lugar iti Labes ti Karayan:
“Kablaawankayo!
18 Silalawag a naibasa* kaniak ti surat nga impatulodyo.
19 Imbilinko a maaramid ti panagsukimat ket naammuak a manipud pay idi, nasukiren dayta a siudad kadagiti ari ken mapaspasamak sadiay ti panagrebelde ken riribuk.+
20 Nabileg dagiti ari a nagturay iti Jerusalem ket inturayanda ti amin a lugar iti Labes ti Karayan, ken naibayad kadakuada dagiti buis.*
21 Mangipaulogkayo iti bilin a mangpasardeng kadagitoy a lallaki, tapno saan a mabangon manen ti siudad malaksid no ibilinko.
22 Aramidenyo a dagus daytoy tapno saan a kumaro ti pannakadangran ti pagarian.”+
23 Apaman a naibasa kada Rehum ken Simsai nga eskriba ken kadagiti kakaduada ti surat ni Ari Artaxerxes, dagus a napanda idiay Jerusalem ket pinilitda a pasardengen dagiti Judio.
24 Gapuna, naisardeng ti pannakabangon manen ti balay ti Dios, nga adda idiay Jerusalem, agingga iti maikadua a tawen ti panagturay ni Ari Dario ti Persia.+
Footnotes
^ Lit., “sapsapulenmi.”
^ Lit., “pakapuyen dagiti ima.”
^ Wenno mabalin a, “naisurat iti Aramaiko sa naipatarus.”
^ Ti Esd 4:8 agingga iti 6:18 ket orihinal a naisurat iti Aramaiko.
^ Wenno “Laud ti Eufrates.”
^ Iti orihinal a lengguahe, tallo a buis ti matuktukoy ditoy: sedula, excise tax, ken toll fee.
^ Lit., “kankanenmi ti asin ti palasio.”
^ Wenno “masakupan a distrito.”
^ Lit., “awanton ti bingaymo.”
^ Wenno mabalin a, “naipatarus ken naibasa.”
^ Iti orihinal a lengguahe, tallo a buis ti matuktukoy ditoy: sedula, excise tax, ken toll fee.
