Esdras 1:1-11
1 Iti umuna a tawen ti panagturay ni Ari Ciro+ ti Persia, tinignay ni Jehova ti puso ti ari a mangaramid iti proklamasion iti intero a pagarianna ken mangisurat iti maysa a bilin. Naaramid daytoy tapno matungpal ti sao ni Jehova babaen ken Jeremias.+ Kastoy ti naisurat:+
2 “Kuna ni Ari Ciro ti Persia, ‘Ni Jehova a Dios ti langit intedna kaniak ti amin a pagarian iti daga,+ ken binilinnak a mangibangon iti balayna idiay Jerusalem+ iti Juda.
3 Adda koma ti Dios kadakayo amin nga adipenna, ket agsublikayo idiay Jerusalem iti Juda tapno bangonenyo manen ti balay ni Jehova a Dios ti Israel—ti pudno a Dios—nga adda idiay Jerusalem ti balayna.*
4 Asinoman nga agsubli, nga agnanaed kas ganggannaet+ iti sadinoman a lugar, ket tulongan koma dagiti agbati a kaarrubana* babaen ti panangtedda iti pirak ken balitok, nadumaduma a produkto ken animal, agraman dagiti boluntario a daton para iti balay ti pudno a Dios,+ nga adda idiay Jerusalem.’”
5 Gapuna, tinignay ti pudno a Dios ti puso dagiti ulo ti pamilia iti tribu ni Juda ken Benjamin, ken dagiti papadi ken Levita—ken ti amin a tinignayna—nga agsubli tapno bangonenda manen ti balay ni Jehova, nga adda idiay Jerusalem.
6 Tinulongan ida ti amin a kaarrubada babaen ti panangtedda* kadagiti alikamen a pirak ken balitok, nadumaduma a produkto, animal, ken napateg a bambanag, malaksid pay iti amin a boluntario a daton.
7 Inruar met ni Ari Ciro dagiti alikamen ti balay ni Jehova, nga innala idi ni Nabucodonosor idiay Jerusalem ken inkabilna iti balay ti diosna.+
8 Ni Ari Ciro ti Persia binilinna ni Mitredat a tesorero a mangala ken mangbilang kadagita sa iyawatna ken Sesbazzar*+ a panguluen ti Juda.
9 Daytoy ti bilangda: 30 a basket a balitok, 1,000 a basket a pirak, 29 a dadduma pay a basket,
10 30 a babassit a malukong a balitok, 410 a babassit a malukong a pirak, ken 1,000 a dadduma pay nga alikamen.
11 Ti amin nga alikamen a balitok ken pirak ket 5,400. Intugot amin dagitoy ni Sesbazzar idi nagsubli idiay Jerusalem dagidiay naipan iti Babilonia kas balud.+
