Isaias 57:1-21
57 Daydiay met laeng nalinteg napukaw,+ ngem awan ti mangipappapuso iti dayta.+ Ket dagiti tattao ti naayat a kinamanangngaasi maur-urnongda kadagiti natay,+ bayat nga awan ti makailasin a gapu iti didigra a daydiay nalinteg naalada a naipanaw.+
2 Isu sumrek iti talna;+ aginanada+ kadagiti pagiddaanda,+ tunggal maysa a magmagna a sililinteg.+
3 “No maipapan kadakayo, umasidegkayo ditoy,+ dakayo nga annak ti managpadles a babai,+ ti bin-i ti mannakikamalala a tao ken ti babai nga agbalangkantis:+
4 Siasino aya ti pagraragsakanyo?+ Maibusor iti siasino nga ingangngangayo a naimbag ti ngiwat, nga idildilatyo ti dila?+ Saan kadi a dakayo ti annak ti salungasing, ti bin-i ti kinaulbod,+
5 dagidiay mangsulsulbog nga aggartem iti tengnga dagiti dadakkel a kayo,+ iti sirok ti tunggal nabaludbod a kayo,+ a manggudgudas kadagiti ubbing iti naapres a gingginget iti sirok dagiti lengngan ti napasdok a batbato?+
6 “Kadagiti napalanas a bato ti naapres a ginget isu ti bingaymo.+ Isuda—isuda idi ti pannaka-bunotmo.+ Mainayon pay, kadakuada nangibukbokka iti daton nga inumen,+ nangidatonka iti sagut. Kadagitoy a banag liwliwaekto aya ti bagik?+
7 Iti rabaw ti bantay a nangato ken nabayog insaadmo ti pagiddaam.+ Sadiay met simmang-atka a mangidaton iti sakripisio.+
8 Ket iti likudan ti ruangan ken ti bautek ti ridaw insaadmo ti pakalaglagipam.+ Ta linukasam ta bagim ket simmang-atka a naisina kaniak; pinalawam ti pagiddaam.+ Ket maipaay kenka namatalgedka kadakuada iti tulag. Inayatmo ti maysa a pagiddaan a kaduam ida.+ Ti mabagbagi ti lalaki nakitam.
9 Ket simmalogka nga agturong ken Melec nga addaanka iti lana, ken pinawpawadwadmo dagiti sapsapom.+ Ket nagtultuloyka a nagibaon kadagiti babaonem iti adayo, iti kasta imbabam ti bambanag agingga iti Sheol.+
10 Iti kaadu ti daldalanmo nagbannogka.+ Saanmo a kinuna, ‘Awan pangnamnamaan!’ Nasarakam ti pannakaisubli ti bukodmo a bileg.+ Dayta ti makagapu a saanka a napaksuyan.+
11 “Iti siasino a naaliawka ken nangrugika nga agbuteng,+ iti kasta nagulbodka?+ Ngem saan a siak daydiay nalagipmo.+ Awan ti impapusom.+ Saanak aya a nagtalinaed a siuulimek ken nagilemmeng iti bambanag?+ Gapuna saanka a nagbuteng uray kaniak.+
12 Siak isaritakto ti kinalintegmo+ ken ti ar-aramidmo,+ a saandakanto a magunggonaan.+
13 Inton agpukkawka maipaay iti tulong saandakanto nga ispalen dagiti inummongmo a banag,+ no di ket ti angin ipanawnanto amin ida a mismo.+ Ti sang-aw ipanawnanto ida, ngem daydiay agkamang kaniak+ tawidennanto ti daga ket tagikuaennanto ti nasantuan a bantayko.+
14 Ket sigurado a kunaento ti maysa, ‘Gaburanyo, gaburanyo! Wayaanyo ti dalan.+ Ikkatenyo ti aniaman a tubeng iti dalan ti ilik.’”+
15 Ta daytoy ti kinuna Daydiay Nangato ken Natan-ok,+ nga agtataeng iti agnanayon+ ket ti naganna nasantuan:+ “Iti nangato ken iti nasantuan a disso isu ti pagtaengak,+ kasta met iti daydiay nailupitlupit ken napakumbaba ti espirituna,+ tapno paungarek ti espiritu dagidiay napakumbaba ken tapno paungarek ti puso dagidiay mailupitlupit.+
16 Ta saanto nga agingga iti tiempo a di nakedngan a makisupiatak, wenno uray iti agnanayon nga agrurodakto;+ ta gapu kaniak ti met laeng espiritu kumapsut,+ uray dagiti agang-anges a parsua nga inaramidko a mismo.+
17 “Gapu iti di kinaumiso ti nakillo a gunggonana+ nagrurodak, ket isu kinabilko, nga inlingedko ti rupak,+ bayat a marurodak idi. Ngem isu nagtultuloy a nagna kas maysa a managlikud+ maitunos iti dana ti pusona.
18 Nakitak ti mismo a daldalanna; ket rinugiak a paimbagen+ ken iturong+ ken subadan iti liwliwa+ ken dagidiay agledleddaang a tattaona.”+
19 “Parsuaek ti bunga dagiti bibig.+ Addanto agtultuloy a talna iti daydiay nga adayo ken iti daydiay nga asideg,”+ kinuna ni Jehova, “ket isu paimbagekto.”+
20 “Ngem dagiti nadangkes kaslada iti baybay a maipalpallayog, no saan a makapaglinak, a ti dandanumna mangipurpuruakda iti ruot ti baybay ken pitak.
21 Awan ti talna,” kinuna ti Diosko, “kadagidiay nadangkes.”+
