Isaias 29:1-24
29 “Asi pay ti Ariel,+ ti Ariel, ti ili a nagpakarsuan ni David!+ Inayonyo ti tawen iti tawen; bay-anyo nga agtultuloy dagiti piesta+ iti panagsasaganadda.
2 Ket pairtengek+ ti bambanag maipaay iti Ariel, ket addanto panagleddaang ken panagun-unnoy,+ ket isu agbalinto kaniak a kas iti pagpuoran ti altar ti Dios.+
3 Ket agpakarsoakto iti amin a sikigan maibusor kenka, ket lakubenkanto babaen iti pager ken mangbangonak maibusor kenka kadagiti panglakub.+
4 Ket maipababakanto tapno agsaokanto manipud a mismo iti daga, ket ti saom nababanto ti unina a kas manipud iti tapok.+ Ket kas iti timek ti mannakiuman iti espiritu ti pagbalinanto ti timekmo manipud iti mismo a daga, ket manipud iti tapok aganibaarto ti bukodmo a sasao.+
5 Ket ti bunggoy dagidiay karkarna kenka agbalindanto a kas iti napino a pulbos,+ ken ti bunggoy dagiti manangikuspil+ kas iti taep nga aglabas.+ Ket mapasamakto dayta iti apagdarikmat, giddato.+
6 Manipud ken Jehova ti buybuyot maipaayankanto iti asikaso buyogen ti gurruod ken buyogen ti panagkintayeg ken buyogen ti dakkel a daranudor, bagyo nga angin ken nadawel a bagyo, ken ti gil-ayab ti maysa a mangalun-on nga apuy.”+
7 Ket mapasamakto dayta a kas iti maysa a tagtagainep, iti maysa a sirmata iti rabii, maipapan iti bunggoy dagiti amin a nasion a makigubgubat iti Ariel,+ mismo nga amin dagidiay makigubgubat kenkuana, ken dagiti torre a panglakub maibusor kenkuana ken dagidiay mangpapairteng iti bambanag maipaay kenkuana.+
8 Wen, mapasamakto kas iti panagtagtagainep ti maysa a mabisin ket adtoy isu mangmangan, ket pudno nga agriing ket ti kararuana ongaong;+ ken kas iti panagtagtagainep ti maysa a mawaw ket adtoy isu umin-inum, ket agriing ket adtoy isu nabannog ket ti kararuana namagaan; kastanto ti mapasamak iti bunggoy dagiti amin a nasion a makigubgubat maibusor iti Bantay Sion.+
9 Agtaktakkayo ket agsiddaawkayo;+ bulsekenyo ti bagbagiyo, ket mabulsekkayo.+ Nabartekda,+ ngem saan nga iti arak; nagdiwengdiwengda, ngem saan a gapu iti makabartek nga inumen.+
10 Ta ni Jehova nangiparukpok kadakayo iti espiritu ti nargaan a turog;+ ket pagkidemenna dagiti pannakamatayo, dagiti mammadto,+ ket inabbonganna uray dagiti pannakauloyo,+ dagiti managsirmata.+
11 Ket maipaay kadakayo ti sirmata ti tunggal banag agbalin a kas iti sasao ti libro a naselioan,+ nga itedda iti maysa a makaammo iti surat, a kunkunada: “Basaem daytoy a sipipigsa, pangngaasim,” ket kunaenna: “Saanko a kabaelan, ta naselioan dayta”;+
12 ket ti libro masapul a maited iti maysa a saan a makaammo iti surat, nga adda agkunkuna: “Basaem daytoy a sipipigsa, pangngaasim,” ket kunaenna: “Saanko nga ammo a pulos ti surat.”
13 Ket kuna ni Jehova: “Gapu ta daytoy nga ili immasidegda babaen ti ngiwatda, ket indaydayawdak babaen laeng kadagiti bibigda,+ ket inikkatda nga inyadayo kaniak ti mismo a pusoda,+ ket ti butengda kaniak agbalin a maisursuro a bilin dagiti tattao,+
14 gapuna adtoyak, Daydiay agtignayto manen a nakaskasdaaw iti daytoy nga ili,+ iti nakaskasdaaw a pamay-an ken babaen iti maysa a banag a nakaskasdaaw; ket ti sirib dagiti nasaririt a tattaoda mapukawto, ket ti mismo a pannakaawat dagiti masirib a tattaoda aglemmengto.”+
15 Asi pay dagidiay kumarkaro unay iti panangilemmengda iti pammatigmaan manipud a mismo ken Jehova,+ ken ti ar-aramidda napasamak iti nasipnget a lugar,+ bayat a kunaenda: “Siasino ti makakita kadatayo, ken siasino ti makaammo kadatayo?”+
16 Anian a kinabalusingsingyo! Rebbeng kadi a ti met laeng agdamdamili maibilang a kas iti pila?+ Ta rebbeng kadi a ti banag a naaramid kunaenna maipapan iti nangaramid kenkuana: “Saannak nga inaramid”?+ Ket ti mismo a banag a nabukel kunaenna kadi maipapan iti nangbukel kenkuana: “Awan impakitana a pannakaawat”?+
17 Saan kadi a sangkabassit laengen a tiempo ket ti Libano mapagbalinto a minuyongan+ ket ti met laeng minuyongan maibilangto a kas iti maysa a bakir?+
18 Ket iti dayta nga aldaw sigurado a dagidiay tuleng mangngegdanto ti sasao ti libro,+ ket manipud iti kinadaguyemyem ken manipud iti kinasipnget uray dagiti mata dagidiay bulsek makakitanto.+
19 Ket dagidiay naemma+ pudno unay a paaduendanto ti panagrag-oda ken Jehova a mismo, ket uray dagidiay napanglaw iti sangatauan agrag-odanto iti Daydiay Santo ti Israel,+
20 agsipud ta ti manangikuspil magtengannanto ti panungpalanna,+ ket ti managpangas dumtengto iti pagpatinggaanna,+ ket amin dagidiay siaalibtak a mangaramid iti panangdangran+ masapul a magessatda,
21 dagidiay mangyeg iti maysa a tao iti panagbasol babaen ti saona,+ ken dagidiay mangappan uray iti daydiay mangtubtubngar idiay ruangan,+ ken dagidiay mangiwalin iti nalinteg babaen kadagiti ubbaw nga argumento.+
22 Gapuna daytoy ti kinuna ni Jehova iti balay ni Jacob, daydiay nangsubbot ken Abraham:+ “Ni Jacob saanton a mabainan, saanto metten a bumsag ti rupana;+
23 ta inton makitana ti annakna, ti aramid dagiti imak, iti tengngana,+ santipikarendanto ti naganko,+ ket pudno unay a santipikarendanto Daydiay Santo ni Jacob,+ ket ti Dios ti Israel pagraemandanto a buyogen ti panagamak.+
24 Ket dagidiay agbidbiddut iti espirituda pudno a maammuandanto ti pannakaawat, ket uray dagidiay agdaydayengdeng masursurodanto ti pammilin.”+
