Isaias 28:1-29
28 Asi pay ti natan-ok a korona dagiti managbarbartek ti Efraim,+ ken ti agkupkupas a sabong ti arkos ti kinapintasna nga adda iti uluanan ti nadam-eg a ginget dagidiay riningbawan ti arak!
2 Adtoy! Ni Jehova addaan iti maysa a napigsa ken nakired.+ Kas iti nakagurgurruod a bagyo ti uraro,+ maysa a makadadael a bagyo, kas iti nakagurgurruod a bagyo ti nabileg, manglayus a dandanum,+ pudno unay nga isu mangaramidto iti napuersa a panangitapuak agingga iti daga.
3 Babaen iti saksaka maipayatpayatto+ dagiti natan-ok a korona dagiti managbarbartek ti Efraim.
4 Ket ti agkupkupas a sabong+ ti arkos ti kinapintasna nga adda iti uluanan ti nadam-eg a ginget agbalinto a kas iti nasapa a higos+ sakbay ti kalgaw, nga, inton makita dayta ti pumaparmata, bayat nga adda pay laeng iti dakulapna, alun-onenna dayta.
5 Iti dayta nga aldaw agbalinto ni Jehova ti buybuyot a kas iti korona ti arkos+ ken kas iti arkos a balangat ti kinapintas+ kadagidiay nabatbati+ iti ilina,
6 ken kas iti espiritu ti kinahustisia iti daydiay agtugtugaw iti panangukom,+ ken kas iti kinamannakabalin kadagidiay mamagbawbaw-ing iti bakal manipud iti ruangan.+
7 Ket dagitoy met—gapu iti arak naiwawada ken gapu iti makabartek nga inumen nagallaallada. Padi ken mammadto+—naiwawada gapu iti makabartek nga inumen, nariribukanda kas imbunga ti arak, nagallaallada+ kas imbunga ti makabartek nga inumen; naiwawada iti panagkitada, nagibar-ibarda no maipapan iti pangngeddeng.
8 Ta dagiti met laeng lamisaan napnoda amin iti narugit a sarwa+—awan disso nga awanan iti dayta.
9 Siasino ti sursuruanto ti maysa iti pannakaammo,+ ket siasino ti pangipaawatanto ti maysa iti nangngegan?+ Dagidiay napusot iti gatas, dagidiay naipusing kadagiti suso?+
10 Ta dayta ket “bilin iti rabaw ti bilin, bilin iti rabaw ti bilin, pagrukod a parteng iti rabaw ti pagrukod a parteng, pagrukod a parteng iti rabaw ti pagrukod a parteng, sangkabassit ditoy, sangkabassit sadiay.”+
11 Ta babaen kadagidiay agbeddabeddal kadagiti bibigda+ ken babaen iti naiduma a pagsasao+ isu agsaonto iti daytoy nga ili,+
12 kadagidiay a nagkunaanna: “Daytoy ti lugar a paginanaan. Ipaayanyo ti inana daydiay napakil. Ket daytoy ti lugar ti nam-ay,” ngem saanda a situtulok a dumngeg.+
13 Ket kadakuada ti sao ni Jehova sigurado nga agbalinto a “bilin iti rabaw ti bilin, bilin iti rabaw ti bilin, pagrukod a parteng iti rabaw ti pagrukod a parteng, pagrukod a parteng iti rabaw ti pagrukod a parteng,+ sangkabassit ditoy, sangkabassit sadiay,” tapno mapanda koma ket sigurado nga agtibkolda a patallikud ket pudno a mabloda ken masiluanda ken matiliwda.+
14 Gapuna denggenyo ti sao ni Jehova, dakayo a pangas, dakayo nga agtuturay+ iti daytoy nga ili nga adda iti Jerusalem:
15 Agsipud ta kinunayo: “Nakipinnatalgedkami iti tulag ken Patay;+ ket agraman iti Sheol namataudkami iti sirmata;+ ti agliplippias a dumaruros a layus, no kas pagarigan lumasat dayta, saanto nga umay kadakami, ta inaramidmi a kamangmi ti ulbod+ ket iti kinaulbod naglemmengkami”;+
16 gapuna daytoy ti kinuna ti Soberano nga Apo Jehova: “Adtoy mangisaadak idiay Sion+ iti bato+ kas pamuon, maysa a napadas a bato,+ ti napateg a pasuli+ ti sigurado a pamuon.+ Awan asinoman a mangwatwatwat iti pammati ti aglagawto.+
17 Ket ti kinahustisia pagbalinekto a pagrukod a parteng+ ket ti kinalinteg+ pagbalinek nga alikamen a pangnibel; ket ti uraro+ punasennanto ti kamang nga ulbod,+ ket ti dandanum layusendanto ti mismo a lugar a paglemmengan.+
18 Ket ti tulagyo ken Patay sigurado a madadaelto,+ ket dayta sirmatayo iti Sheol saanto nga agtalinaed.+ Ti agliplippias a dumaruros a layus, inton lumasat+—agbalinkayto met a lugar a pagipayatpayatan dayta.+
19 Tunggal lumasat dayta, ipanawnakayto,+ agsipud ta iti binigat lumasatto, bayat ti aldaw ken bayat ti rabii; ket agbalinto dayta a maysa laeng a pakaigapuan ti panagkintayeg+ tapno ipaawat iti sabsabali ti nangngegan.”
20 Ta ti sopa napaneknekan nga ababa unay a pangyunnatan ti maysa iti bagina, ket ti mismo nga inabel nga ules akikid unay no agkumot ti maysa.
21 Ta ni Jehova tumakderto a kas idiay Bantay Perazim,+ mariribukanto a kas idiay nababa a tanap iti asideg ti Gabaon,+ tapno aramidenna koma ti aramidna—ti aramidna karkarna—ken tapno trabahuenna ti trabahona—ti trabahona di gagangay.+
22 Ket ita dikay ipakita a mananglaiskayo,+ tapno saan a tumibker dagiti galutyo, ta adda panangtalipupos, maysa a naikeddeng a banag dayta, a nangngegko iti Soberano+ nga Apo, ni Jehova ti buybuyot, maipaay iti intero a daga.+
23 Umimdengkayo ket imdenganyo ti timekko; ipangagyo ken imdenganyo ti sasaok.
24 Iti intero nga agmalem+ aya nga agarado ti managarado tapno agimula iti bin-i, a parukaenna ken suyodenna ti dagana?+
25 Saan aya a, no napalanasnan ti rabawna, agipuruaken iti nangisit a kumino ket iwarisna ti kumino,+ ket saanto aya a mangikabil iti trigo, mijo,+ ken sebada iti naituding a disso,+ ken espelta+ kas beddengna?+
26 Ket isu lintegen+ ti maysa maitunos iti umiso. Isu isuro ti bukodna a Dios.+
27 Ta saan a babaen iti alikamen a pagirik+ a ti nangisit a kumino maipaayan ti pannakasaksak; ket iti kumino awan ti maitulid a pilid ti kareson. Ta kaaduanna babaen iti pagbaut+ mabatbat ti nangisit a kumino, ken ti kumino babaen iti sarukod.
28 Kaaduanna kadi a narumeken ti mismo a bukel nga aramiden a tinapay? Ta nikaanoman a ti maysa di agressat+ a baddebaddekenna dayta.+ Ket masapul a paggunayenna ti pataladtad ti karesonna, ken dagiti bukodna a kabalio a pakigubat, ngem saannanto a rumeken dayta.+
29 Daytoy met ket naggapu a mismo ken Jehova ti buybuyot,+ a nakaskasdaaw iti pammatigmaan, a dakkel ti naaramidanna iti nabunga a panagtrabaho.+
