Isaias 13:1-22
13 Ti pammakdaar maibusor iti Babilonia+ a nakita ni Isaias nga anak ni Amoz+ iti sirmata:
2 “Iti rabaw ti maysa a bantay ti nalayang a batbato mangibayogkayo iti pagilasinan.+ Ipigsayo ti timek kadakuada, ipayapayyo ti ima,+ tapno makastrekda kadagiti pagserkan dagiti natan-ok.+
3 Siak inruarko ti bilin kadagiti nasantipikar a tattaok.+ Inayabak met dagidiay mannakabalin a tattaok tapno mangyebkas iti ungetko,+ dagidiay narag-o a natan-ok a tattaok.
4 Imdenganyo! Maysa a bunggoy nga adda kadagiti bantay, banag a kaasping ti nakaad-adu a tattao!+ Imdenganyo! Ti panagaariwawa dagiti pagarian, dagiti nasion a naummong a sangsangkamaysa!+ Ni Jehova ti buybuyot ur-urnongenna ti buyot ti gubat.+
5 Um-umayda manipud iti daga nga adayo,+ manipud iti ungto ti langlangit, ni Jehova ken dagiti igam ti panangkondenarna, tapno rebbaenda ti intero a daga.+
6 “Aganug-ogkayo+ ta ti aldaw ni Jehova asidegen!+ Umayto dayta kas maysa a panangagaw nga aggapu iti Mannakabalin-amin.+
7 Dayta ti makagapu nga amin nga im-ima agsalupaypaydanto a mismo, ket ti met laeng intero a puso ti mortal a tao marunawto.+
8 Ket dagiti tattao nariribukanda.+ Dagiti met laeng panagkuyegyeg ken dagiti ut-ot ti panagpasngay gumammatda; kas iti babai nga agpaspasngay addaanda kadagiti panagpasikal.+ Agkikinnitada a sisisiddaaw. Dagiti rupada ket gumilgil-ayab a ruprupa.+
9 “Adtoy! Ti met laeng aldaw ni Jehova um-umay, naulpit agpadpada a buyogen ti rungsot ken buyogen ti sumsumged nga unget, tapno pagbalinenna ti daga a banag a pagmalangaan,+ ken tapno matalipuposna dagiti managbasol iti daga manipud iti dayta.+
10 Ta dagiti mismo a bituen ti langlangit ken dagiti konstelasionda a Kesil+ saandanto nga igilap ti lawagda; ti init pudno nga agsipngetto iti iruruarna, ket ti met laeng bulan saannanto a pagsilnagen ti lawagna.
11 Ket sigurado nga isupapakkonto ti bukodna a kinadakes iti nabunga a daga,+ ken ti bukodda a biddut kadagiti nadangkes a mismo. Ket pudno a pasardengekto ti panagpannakkel dagidiay nadursok, ket ti kinatangsit dagiti manangikuspil ipababakto.+
12 Ti mortal a tao pagbalinekto a nataktakkon ngem iti napasudi a balitok,+ ken ti naindagaan a tao nataktakkon ngem iti balitok ti Ofir.+
13 Dayta ti makagapu a dayyegekto ti mismo a langit,+ ket ti daga agyugayogto manipud iti dissona gapu iti rungsot ni Jehova ti buybuyot+ ken iti aldaw ti sumsumged nga ungetna.+
14 Ket mapasamakto a, kas iti gasela a naabug ken kas iti arban nga awanan iti asinoman a mangummong a sangsangkamaysa kadakuada,+ tumurongdanto, tunggal maysa kadagiti bukodna a kailian; ket pumanawdanto, tunggal maysa agturong iti bukodna a daga.+
15 Tunggal maysa a masarakan masalputto, ket tunggal maysa a matiliw iti panangsuyod mapasagto babaen ti kampilan;+
16 ket dagiti mismo nga annakda malasanglasangto iti imatangda.+ Dagiti balayda makamkamto, ket ti bukodda nga assawa a babbai maramesto.+
17 “Adtoy gutugotek a bumusor kadakuada dagiti Medo,+ isuda a mangibilang iti mismo a pirak kas awan kapapay-anna ken isuda a, no maipapan iti balitok, saanda a pagragsakan dayta.
18 Ket dagiti baida lasanglasangendanto uray dagiti agtutubo a lallaki.+ Ket ti bunga ti tian saandanto a kaasian;+ ti matada saanto a maasian iti annak.
19 Ket ti Babilonia, ti arkos dagiti pagarian,+ ti pintas ti pagpannakkel dagiti Caldeo,+ agbalinto a kas idi a ti Dios dinuprakna ti Sodoma ken Gomorra.+
20 Isu saanto a pulos mapagnaedan,+ saanto met nga agtaeng iti kinapkaputotan.+ Ket sadiay ti Arabo saannanto nga ibangon ti toldana, ket dagiti pastor saandanto a pagiddaen sadiay dagiti arbanda.
21 Ket sadiay dagiti agay-ayuyang kadagiti awanan danum a rehion pudno unay nga agiddadanto, ket dagiti balayda mapnonto kadagiti kasla agila a kullaaw.+ Ket sadiay agtaengto dagiti abestrus, ket dagiti met laeng sukog-kalding a sairo aglagtolagtodanto sadiay.+
22 Ket dagiti chacal agtaguobdanto kadagiti pagnaedan a torrena,+ ket ti dakkel nga uleg addanto kadagiti palasio ti napalalo a ragsak. Ket ti panawen a maipaay kenkuana asidegen a dumteng, ket ti met laeng al-aldawna saanto a maitantan.”+
