Isaias 25:1-12
25 O Jehova, sika ti Diosko.+ Itan-okka,+ idayawko ti naganmo,+ ta nagaramidka kadagiti nakaskasdaaw a banag,+ kadagiti pammatigmaan+ manipud kadagiti immuna a tiempo, iti kinamatalek,+ iti kinamapagpiaran.+
2 Ta ti maysa a siudad pinagbalinmo a gabsuon a batbato, ti maysa a nasarikedkedan nga ili a marmargaay a rebba, ti maysa a pagnaedan a torre dagiti ganggannaet a saanen a siudad, a saanto a maibangon manen uray agingga iti tiempo a di nakedngan.+
3 Dayta ti makagapu a dagidiay napigsa nga umili idaydayawdakanto; ti ili dagiti manangikuspil a nasion, agbutengdanto kenka.+
4 Ta nagbalinka a salindeg iti daydiay nanumo, salindeg iti daydiay napanglaw iti pannakaparigatna,+ kamang manipud natutudo a bagyo, linong+ manipud iti pudot, inton ti pug-aw dagidiay manangikuspil ket kas iti natutudo a bagyo a bumusor iti pader.
5 Kas iti pudot iti awanan danum a pagilian, ti daranudor dagiti ganggannaet parukmaem, ti pudot babaen ti anniniwan ti ulep.+ Ti met laeng samiweng dagidiay manangikuspil malappedan.+
6 Ket ni Jehova ti buybuyot pudno unay nga iyaramidannanto dagiti amin nga ili,+ iti daytoy a bantay,+ iti maysa a bangkete dagiti nataba unay a putahe,+ maysa a bangkete ti arak a napagtalinaed kadagiti ared-ed, dagiti nataba unay a putahe a napno iti pata,+ iti arak+ a napagtalinaed kadagiti ared-ed, a nasagat.+
7 Ket iti daytoy a bantay pudno unay nga alimonennanto ti parupa ti pamalkut a mangbalbalkut kadagiti amin nga ili,+ ken ti inabel a nayabel kadagiti amin a nasion.
8 Pudno nga alimonennanto ni patay iti agnanayon,+ ket ti Soberano nga Apo Jehova sigurado a punasennanto ti lulua iti amin a rupa.+ Ket ti pakaumsian ti ilina ikkatennanto iti intero a daga,+ ta ni met laeng Jehova sinaona dayta.
9 Ket iti dayta nga aldaw pudno unay a kunaento ti maysa: “Adtoy! Daytoy ti Diostayo.+ Nanginanamatayo kenkuana,+ ket isalakannatayto.+ Daytoy ni Jehova.+ Nanginanamatayo kenkuana. Agrag-otayo koma ken agragsaktayo iti panangisalakanna.”+
10 Ta ti ima ni Jehova agyanto iti daytoy a bantay,+ ket ti Moab maibaddebaddekto+ iti lugarna kas no ti maysa a bunton ti garami maibaddebaddek iti lugar ti ibleng.+
11 Ket ikayaw-atnanto dagiti imana iti tengnga dayta kas ti panangikayaw-at kadakuada ti lumalangoy tapno aglangoy, ket ipababananto ti kinatangsit+ dayta babaen kadagiti mangallilaw a panaggunay dagiti imana.
12 Ket ti nasarikedkedan a siudad, agraman dagiti nangato a pader ti kinatalgedmo, tuangennanto; ipababananto dayta, pagdissuenna iti daga, iti tapok.+
