Isaias 27:1-13
27 Iti dayta nga aldaw iturongto ni Jehova,+ buyogen ti natangken ken dakkel ken napigsa a kampilanna,+ ti asikasona iti Leviatan,+ ti agal-alud-od a serpiente,+ iti mismo a Leviatan, ti killo a serpiente, ket sigurado a papatayennanto ti ulimaw ti baybay+ nga adda iti baybay.
2 Iti dayta nga aldaw ikantayo kenkuana:+ “Maysa a kaubasan+ ti aglablabutab nga arak!
3 Siak, ni Jehova, ti mangsalsaluad kenkuana.+ Iti tunggal kanito isu sibugakto.+ Tapno awan ti mangiturong iti asikasona maibusor kenkuana, isu saluadakto uray iti rabii ken aldaw.+
4 Awananak iti pungtot.+ Siasinonto ti mangted kaniak iti siitan a babassit a kayo+ ken dakes a ruruot iti bakal? Baddekekto dagita. Uramekto dagita a mamimpinsan.+
5 Ta no saan isu kumpet koma iti salindegko, isu makikappia koma kaniak; pannakikappia ti aramidenna koma kaniak.”+
6 Kadagiti umay nga aldaw agramutto ni Jacob, ti Israel+ mangpataudto kadagiti sabong ket pudno nga agtubo; ket ti rabaw ti nabunga a daga pudno a punnuendanto iti bunga.+
7 Kas iti pannaplit ti maysa a mangkabkabil kenkuana isu kasapulan kadi a kabilen ti maysa? Wenno kas iti pannakagudas dagiti napapatay a tattaona isu kasapulan kadi a mapapatay?+
8 Babaen iti pamutbuteng nga ikkis makisupiatkanto kenkuana inton ibaonmo. Masapul nga isu paruarenna babaen ti pug-awna, maysa a napigsa iti aldaw ti wayaway nga angin.+
9 Gapuna babaen itoy a pamay-an maabbonganto ti biddut ni Jacob,+ ket daytoy amin ti bunga inton ikkatenna ti basolna,+ inton amin dagiti bato iti altar pagbalinenna a kas kadagiti tisa a bato a natumek, tapno saanto a tumakder dagiti sagrado a teddek+ ken dagiti pagsaadan ti insienso.+
10 Ta ti nasarikedkedan a siudad agwaywayasto, ti pagpaaraban mabaybay-anto a mismo ken mapanawan kas iti let-ang.+ Agarabto sadiay ti kigaw a baka, ket agiddanto sadiay; ket pudno nga ibusennanto dagiti kangrunaan a sangana.+
11 Inton nagangon dagiti saringitna, dagiti sumrek a babbai sip-akendanto ida, a pasgedanda ida.+ Ta saan nga ili nga addaan natadem a pannakaawat.+ Dayta ti makagapu a ti Nangaramid kenkuana saanto a mangipakita iti asi iti dayta, ket ti mismo a Nangporma kenkuana saanto a mangipakita iti parabur iti dayta.+
12 Ket mapasamakto iti dayta nga aldaw a ni Jehova aprasennanto ti bunga,+ manipud iti agay-ayus a waig ti Karayan+ agingga iti naapres a ginget ti Egipto,+ ket iti kasta dakayo mapidutkayto nga agsasaruno,+ O annak ti Israel.
13 Ket mapasamakto iti dayta nga aldaw a mapuyotto ti dakkel a tangguyob,+ ket dagidiay madaddadael iti daga ti Asiria+ ken dagidiay a naiwarawara iti daga ti Egipto+ sigurado nga umaydanto ket agruknoyda+ ken Jehova iti nasantuan a bantay idiay Jerusalem.+
