Ezequiel 46:1-24
46 “Daytoy ti kinuna ti Soberano nga Apo Jehova, ‘No maipapan iti ruangan ti makin-uneg a paraangan a sumango iti daya,+ rebbeng nga agtultuloy a siririkep+ iti innem nga aldaw a panagtrabaho,+ ket iti aldaw ti sabbath rebbeng a maluktan, ket iti aldaw ti baro a bulan rebbeng a maluktan.+
2 Ket ti panguluen masapul a sumrek a dumalan iti beranda ti ruangan,+ manipud iti ruar, ket agtakder iti sibay ti bautek ti ruangan;+ ket ti papadi masapul nga idatagda ti sibubukel a datonna a mapuoran ken dagiti sakripisiona a pakikaykaysa, ket masapul nga agruknoy idiay arsadanan ti ruangan,+ ket masapul a rummuar, ngem ti met laeng ruangan saan a mairikep agingga iti rabii.
3 Ket dagiti umili ti daga masapul nga agruknoyda idiay pagserkan dayta a ruangan kadagiti sabbath ken kadagiti baro a bulan, iti sanguanan ni Jehova.+
4 “‘Ket ti sibubukel a daton a mapuoran nga idiaya ti panguluen ken Jehova iti aldaw ti sabbath rebbeng nga innem a nasalun-at a kalakian a kordero ken maysa a nasalun-at a kalakian a karnero;+
5 ket kas daton a bukbukel maysa nga efa maipaay iti kalakian a karnero,+ ket maipaay kadagiti kalakian a kordero maysa a daton a bukbukel kas iti kabaelanna nga ited,+ ket, no maipapan iti lana, maysa a hin iti efa.+
6 Ket iti aldaw ti baro a bulan+ adda koma maysa nga urbon a toro, ti kalakian nga anak ti pangen, daydiay nasalun-at, ken innem a kalakian a kordero ken maysa a kalakian a karnero; rebbeng a nasalun-atda.+
7 Ket ti maysa nga efa maipaay iti urbon a toro ken ti maysa nga efa maipaay iti kalakian a karnero rebbeng nga idatagna a kas daton a bukbukel, ken maipaay kadagiti kalakian a kordero sigun iti kabaelanna; ket, no maipapan iti lana, maysa a hin iti efa.+
8 “‘Ket no sumrek ti panguluen,+ rebbeng a sumrek a dumalan iti beranda ti ruangan, ket rummuar a dumalan iti dayta.+
9 Ket no sumrek dagiti umili ti daga iti sanguanan ni Jehova kadagiti panawen ti piesta,+ daydiay sumrek a dumalan iti ruangan iti amianan+ tapno agruknoy rebbeng a rummuar a dumalan iti ruangan iti abagatan;+ ket daydiay sumrek a dumalan iti ruangan iti abagatan rebbeng a rummuar a dumalan iti ruangan iti amianan. Awan koma ti agsubli a dumalan iti ruangan a simrekanna, ta isu rebbeng a rummuar nga aglayon iti sanguananna.
10 Ket no maipapan iti panguluen iti tengngada, no sumrekda, isu rebbeng a sumrek; ket no rummuarda, isu rebbeng a rummuar.+
11 Ket kadagiti piesta+ ken kadagiti panawen ti piesta rebbeng a ti daton a bukbukel maysa nga efa maipaay iti urbon a toro ken maysa nga efa maipaay iti kalakian a karnero, ken maipaay kadagiti kalakian a kordero kas iti kabaelanna nga ited; ket, no maipapan iti lana, maysa a hin iti efa.+
12 “‘Ket no kas pagarigan ti panguluen mangipaay iti sibubukel a daton a mapuoran kas boluntario a daton,+ wenno kadagiti sakripisio a pakikaykaysa kas boluntario a daton ken Jehova, ti maysa masapul met nga ilukatna kenkuana ti ruangan a sumango iti daya,+ ket masapul nga ipaayna ti sibubukel a datonna a mapuoran ken dagiti sakripisiona a pakikaykaysa kas iti aramidenna iti aldaw ti sabbath.+ Ket masapul a rummuar, ket ti maysa masapul nga irikepna ti ruangan kalpasan ti iruruarna.+
13 “‘Ket rebbeng a mangipaayka iti nasalun-at a kalakian a kordero, a tumawenen, kas inaldaw a mapuoran a sibubukel a daton ken Jehova.+ Iti binigat rebbeng nga ipaaymo.
14 Ket kas daton a bukbukel rebbeng nga ipaaymo a maikuyog iti dayta iti binigat ti apagkanem ti maysa nga efa ket, no maipapan iti lana, ti kakatlo ti maysa a hin a maipaay a pangwarsi iti nasayaat nga arina.+ Ti bukbukel a daton ken Jehova ket maysa a paglintegan a di nakedngan ti kapautna, patinayon.
15 Ket masapul nga ipaayda ti kalakian a kordero ken ti daton a bukbukel ken ti lana iti binigat kas patinayon a sibubukel a daton a mapuoran.’
16 “Daytoy ti kinuna ti Soberano nga Apo Jehova, ‘No kas pagarigan ti panguluen mangted iti sagut iti tunggal maysa kadagiti annakna kas tawidna, dayta agbalinto a sanikua ti mismo nga annakna. Dayta ti kukuada babaen ti panagtawid.
17 Ket no kas pagarigan manipud iti tawidna mangted iti sagut iti maysa kadagiti adipenna, agbalinto met dayta a kukuana agingga iti tawen ti wayawaya;+ ket agsublinto dayta iti panguluen. Ti laeng tawidna—no maipapan iti annakna—ti agtultuloy a kukuada.
18 Ket ti panguluen rebbeng a saan a mangala iti aniaman iti tawid dagiti umili tapno puersaenna ida a pumanaw iti sanikuada.+ Manipud bukodna a sanikua rebbeng a patawidanna ti annakna, iti panggep a ti ilik saan koma a maiwarawara tunggal maysa manipud sanikuana.’”+
19 Ket inserreknak babaen iti seserrekan+ nga adda iti sikigan ti ruangan nga agturong kadagiti nasantuan a siled a panganan, dagidiay kukua ti papadi, a sumango iti amianan,+ ket, adtoy! adda maysa a lugar sadiay iti agpadpada a makinlikud a sikigan iti agpalaud.
20 Ket kinunana kaniak: “Daytoy ti disso a pangipaburekanto ti papadi iti daton gapu iti babak+ ken iti daton gapu iti basol,+ ken panglutuandanto iti daton a bukbukel,+ tapno awan ti awitenda nga iruar agingga iti makinruar a paraangan tapno santipikarenda dagiti umili.”+
21 Ket inruarnak nga agturong iti makinruar a paraangan ket pinalabasnak iti uppat a dugo ti paraangan, ket, adtoy! adda paraangan iti sibay daytoy a dugo ti paraangan, maysa a paraangan iti sibay dayta a dugo ti paraangan.
22 Iti uppat a dugo ti paraangan adda babassit a paraangan, uppat a pulo a kasiko ti kaatiddogda ket tallopulo ti kaakabada. Ti uppat kadakuada nga addaan kadagiti pasuli a patakder agpapada ti rukodda.
23 Ket adda idi maysa nga intar iti aglikmutda, iti aglikmutda nga uppat, ket adda dagiti disso a pagipaburekan+ a naaramid iti baba dagiti intar iti aglikmut.
24 Idin kinunana kaniak: “Dagitoy ti balbalay dagidiay agipabpaburek, a kadagita dagiti ministro iti Balay ipaburekda ti sakripisio dagiti umili.”+
