Ezequiel 32:1-32
32 Ket napasamak pay nga iti maikasangapulo ket dua a tawen, iti maikasangapulo ket dua a bulan, iti umuna nga aldaw ti bulan, dimteng kaniak ti sao ni Jehova, a kunkunana:
2 “Anak ti tao, mangipigsaka iti dung-aw maipapan ken Faraon nga ari ti Egipto, ket masapul a kunaem kenkuana, ‘Kas iti burboran a bumaro a leon dagiti nasion napagulimekka.+
“‘Ket kaslaka idi iti ulimaw iti danum kadagiti baybay,+ ket nagkubkubbuarka kadagiti karayanmo ket liniblibegmo ti dandanum babaen kadagiti sakam ken rinugrugitam dagiti karayanda.’
3 “Daytoy ti kinuna ti Soberano nga Apo Jehova, ‘Iwayatkonto met kenka ti iketko+ babaen ti maysa a kongregasion ti adu nga ili, ket sigurado nga iyegdakanto iti iketko a pagdaklis.+
4 Ket baybay-ankanto iti daga. Ipuruakkanto iti rabaw ti tay-ak.+ Ket pagnaedekto kenka amin dagiti agtaytayab a parsua iti langlangit, ket manipud kenka pennekekto dagiti atap nga animal iti intero a daga.+
5 Ket ikabilkonto ti lasagmo iti rabaw ti bambantay ket punnuek dagiti ginget iti basuram.+
6 Ket ipainumkonto iti daga dagiti banag nga insayasaymo, manipud iti daram,+ iti rabaw ti bambantay; ket dagiti met laeng pagayusan ti waig mapnonto manipud kenka.’
7 “‘Ket inton maiddepka abbongakto ti langlangit ket pagsipngetek dagiti bituenda. No maipapan iti init, abbongakto kadagiti ulep, ket ti met laeng bulan saannanto a pagsilnagen ti lawagna.+
8 Amin dagiti silaw ti lawag iti langlangit—pagsipngetekto ida maigapu kenka, ket ikabilkonto ti sipnget iti dagam,’ kuna ti Soberano nga Apo Jehova.
9 “‘Ket pagrurodekto ti puso ti adu nga ili inton dagiti kautibo manipud kenka iti tengnga dagiti nasion iyegko iti dagdaga a saanmo a naammuan.+
10 Ket gapu kenka sigurado a kellaatekto ti adu nga ili,+ ket agpigergerto ti mismo nga ar-arida buyogen ti panagaligagaw kenka inton iwasawasko ti kampilanko kadagiti rupada,+ ket agpigergerdanto iti tunggal kanito, tunggal maysa maigapu iti bukodna a kararua, iti aldaw ti pannakatnagmo.’+
11 “Ta daytoy ti kinuna ti Soberano nga Apo Jehova, ‘Ti mismo a kampilan ti ari ti Babilonia dumtengto kenka.+
12 Ipasagkonto ti bunggoymo babaen kadagiti mismo a kampilan dagidiay mannakabalin, dagiti manangikuspil iti nasnasion, isuda amin;+ ket pudno nga agawandanto ti pagpannakkel ti Egipto, ket ti isuamin a bunggoyna matalipuposto.+
13 Ket dadaelekto dagiti amin a naamo nga animalna manipud sibay ti adu a danum,+ ket saanton a libegen ida ti saka ti naindagaan a tao,+ saanto metten a libegen ida dagiti kuko ti naamo nga animal.’
14 “‘Iti dayta a tiempo palitnawekto ti dandanumda, ket dagiti karayanda pagayusekto a kas iti lana,’ kuna ti Soberano nga Apo Jehova.
15 “‘Inton pagbalinek ti daga ti Egipto a maysa a langalang a rebbek ket ti daga malangalang iti pakabuklanna,+ inton kabilek amin dagiti agnanaed iti dayta, kasapulanto met a maammuanda a siak ni Jehova.+
16 “‘Maysa daytoy a dung-aw, ket sigurado nga idayyengto dagiti tattao. Uray ti annak a babbai dagiti nasion idayyengdanto dayta; iti Egipto ken iti isuamin a bunggoyna idayyengdanto,’+ kuna ti Soberano nga Apo Jehova.”
17 Ket napasamak pay nga iti maikasangapulo ket dua a tawen, iti maikasangapulo ket lima nga aldaw ti bulan, dimteng kaniak ti sao ni Jehova, a kunkunana:
18 “Anak ti tao, unnoyam ti bunggoy ti Egipto ket ipababam dayta,+ isu ken ti annak a babbai dagiti nadaeg a nasion, agingga iti daga iti baba,+ maikuyog kadagidiay bumaba iti abut.+
19 “‘Ad-addaka a makaay-ayo no maidiligka iti siasino?+ Bumabaka, ket masapul a maipaiddaka a kadua dagidiay di nakugit!’+
20 “‘Iti tengnga dagidiay napapatay iti kampilan mapasagdanto.+ Isu nayawat iti kampilan. Isu ulodenyo nga iyadayo ken amin dagiti bunggoyna.
21 “‘Dagiti kangrunaan a lallaki kadagidiay mannakabalin agsaodanto kenkuana a mismo manipud tengnga ti Sheol, agraman dagiti katulonganna.+ Sigurado a bumabadanto;+ agiddadanto a kas iti di nakugit, napapatay iti kampilan.
22 Sadiay ti ayan ti Asiria ken ti intero a kongregasionna.+ Dagiti lugar a pagitabonanna addada iti aglikmutna. Isuda amin napapatayda, dagidiay napasag babaen ti kampilan.+
23 Ta dagiti lugar a pagitabonanna naikabilda kadagiti kaunggan a paset ti maysa nga abut,+ ket ti kongregasionna adda iti aglikmut ti tanemna, isuda amin napapatayda, napasagda iti kampilan, agsipud ta nangpataudda iti panagaligaget iti daga dagidiay sibibiag.
24 “‘Sadiay adda ti Elam+ ken ti isuamin a bunggoyna iti aglikmut ti tanemna, isuda amin napapatayda, dagidiay napasag iti kampilan, isuda a bimmaba a di nakugit iti daga iti baba, dagidiay nangpataud iti panagaligagetda iti daga dagidiay sibibiag; ket awitendanto ti pannakaipababada a maikuyog kadagidiay bumaba iti abut.+
25 Iti tengnga dagidiay napapatay nangikabilda iti pagiddaan+ maipaay kenkuana iti tengnga ti isuamin a bunggoyna. Dagiti lugar a pagitabonanna addada iti aglikmut dayta. Isuda amin saanda a nakugit, napapatay iti kampilan,+ agsipud ta ti panagaligagetda napataud iti daga dagidiay sibibiag; ket awitendanto ti pannakaipababada a maikuyog kadagidiay bumaba iti abut. Isu naikabil iti tengnga dagidiay napapatay.
26 “‘Sadiay ti ayan ti Mesec+ ken Tubal+ ken ti isuamin a bunggoyna. Dagiti lugar a pagitabonanna addada iti aglikmutna. Isuda amin saanda a nakugit, nasalput iti kampilan, agsipud ta pinataudda ti panagaligagetda iti daga dagidiay sibibiag.
27 Ket saandanto aya a makikaidda kadagidiay mannakabalin,+ napasag manipud iti tengnga dagiti saan a nakugit, isuda a bimmaba iti Sheol agraman kadagiti igamda iti gubat? Ket ikabildanto dagiti kampilanda iti baba dagiti uloda, ket dagiti biddutda addanto kadagiti tulangda,+ agsipud ta dagidiay mannakabalin ket aligaget iti daga dagidiay sibibiag.+
28 Ket no maipapan kenka, matukkolkanto iti tengnga dagidiay di nakugit, ket makikaiddakanto kadagidiay napapatay iti kampilan.
29 “‘Sadiay ti ayan ti Edom,+ ti ar-arina ken amin dagiti panguluenna, isuda nga, iti kinamannakabalinda, naikabilda a maikuyog kadagidiay napapatay iti kampilan;+ isuda met laeng makikaiddadanto kadagidiay di nakugit+ a mismo ken kadagidiay bumaba iti abut.
30 “‘Sadiay ti ayan dagiti duke ti amianan, isuda amin, ken amin dagiti Sidonio,+ a bimmaba a maikuyog kadagidiay napapatay, iti kinanakaam-amesda gapu iti kinamannakabalinda, naibabainda. Ket makikaiddadanto a di nakugit kadagidiay napapatay iti kampilan ket awitendanto ti pannakaipababada a maikuyog kadagidiay bumaba iti abut.+
31 “‘Dagitoy ti makitanto ni Faraon, ket sigurado a maliwliwanto iti intero a bunggoyna.+ Ni Faraon ken ti intero a puersa militarna tattaodanto a napapatay iti kampilan,’ kuna ti Soberano nga Apo Jehova.
32 “‘Ta pinataudna ti panagaligagetna iti daga dagidiay sibibiag,+ ket masapul a maipaidda iti tengnga dagidiay di nakugit, maikuyog kadagidiay napapatay iti kampilan, ni Faraon a mismo ken ti intero a bunggoyna,’ kuna ti Soberano nga Apo Jehova.”
