Ezequiel 14:1-23
14 Ket dimteng kaniak dagiti lallaki manipud kadagiti lallakay ti Israel ket nagtugawda iti sanguanak.+
2 Idin ti sao ni Jehova dimteng kaniak, a kunkunana:
3 “Anak ti tao, no maipapan kadagitoy a lallaki, insaadda iti pusoda dagiti makadurmen nga idoloda, ket ti pakaitibkolan a makagapu iti biddutda inkabilda iti sanguanan dagiti rupada.+ Pagimtuodandakto aya latta?+
4 Gapuna kasaom ida ket masapul a kunaem kadakuada, ‘Daytoy ti kinuna ti Soberano nga Apo Jehova: “Uray asinoman a tao iti balay ti Israel a mangisaad kadagiti makadurmen nga idolona+ iti pusona ken mangikabil iti mismo a pakaitibkolan a makagapu iti biddutna iti sanguanan ti rupana ket pudno nga umay iti mammadto, siak, ni Jehova, ti mismo a sumungbatto kenkuana iti dayta a banag maitunos iti kaadu dagiti makadurmen nga idolona,+
5 iti panggep a panangtiliw iti balay ti Israel iti pusoda,+ agsipud ta inyadayoda kaniak ti bagbagida babaen kadagiti makadurmen nga idoloda—isuda amin.”’+
6 “Gapuna sawem iti balay ti Israel, ‘Daytoy ti kinuna ti Soberano nga Apo Jehova: “Agsublikayo ket itallikudyo ti bagbagiyo manipud kadagiti makadurmen nga idoloyo+ ket itallikudyo dagiti rupayo manipud a mismo iti amin a nakarimrimon a bambanagyo;+
7 ta ti uray asinoman a tao manipud iti balay ti Israel wenno manipud kadagiti ganggannaet nga agnanaed nga agtaeng kas ganggannaet iti Israel, a mangisanud iti bagina manipud isusurot kaniak+ ken mangisaad kadagiti makadurmen nga idolona iti pusona ken mangipasdek iti mismo a pakaitibkolan a makagapu iti biddutna iti sanguanan ti rupana ken pudno nga umay iti mammadto tapno agimtuod maipaay iti bagina babaen kaniak,+ siak, ni Jehova, ti mismo a sumungbatto kenkuana.
8 Ket iturongkonto ti rupak maibusor iti dayta a tao+ ket isu ikabilko a maipaay a pagilasinan+ ken maipaay a pagkukuna a proverbio,+ ket isu gessatekto iti tengnga ti ilik;+ ket kasapulanto a maammuanyo a siak ni Jehova.”’+
9 “‘Ket no maipapan iti mammadto, no kas pagarigan masikapan ket pudno nga agsao iti maysa a sao, siak, ni Jehova, sinikapak dayta a mammadto;+ ket iyunnatkonto ti imak maibusor kenkuana ket talipuposek iti tengnga ti ilik nga Israel.+
10 Ket kasapulan nga awitendanto ti biddutda.+ Ti biddut ti agim-imtuod agbalinto a kas met laeng iti biddut ti mammadto,+
11 tapno iti kasta dagiti kameng ti balay ti Israel saandan a maitawtaw iti isusurot kaniak+ ken saandan a tulawan ti bagbagida babaen kadagiti amin a salungasingda. Ket agbalindanto nga ilik ket siak agbalinakto a Diosda,’ kuna ti Soberano nga Apo Jehova.”+
12 Ket ti sao ni Jehova nagtultuloy a dumteng kaniak, a kunkunana:
13 “Anak ti tao, no maipapan iti maysa a daga, no kas pagarigan makaaramid iti basol a maikaniwas kaniak iti panagtignay a di simamatalek,+ iyunnatkonto met ti imak maibusor iti dayta ket tukkolek maipaay iti dayta dagiti ungkay a nakaibitinan dagiti nagtimbukel a tinapay,+ ket mangibaonakto iti dayta iti nakaro a bisin+ ket gessatek iti dayta ti naindagaan a tao ken ti naamo nga animal.”+
14 “‘Ket no dagitoy tallo a lallaki addada koma iti tengngana, da Noe,+ Daniel+ ken Job,+ isuda gapu iti kinalintegda+ maispalda ti kararuada,’ kuna ti Soberano nga Apo Jehova.”+
15 “‘Wenno no dagiti makadangran nga atap nga animal palasatek koma iti daga+ ket pudno nga ulilaenda dayta iti annak+ ket pudno nga agbalin a langalang a rebbek nga awan asinoman a lumasat maigapu kadagiti atap nga animal,+
16 no dagitoy tallo a lallaki addada koma iti tengngana, kas sibibiagak,’ kuna ti Soberano nga Apo Jehova, ‘uray ti annak a lallaki wenno ti annak a babbai saanda a maispal; isuda, isuda laeng, ti maispal ket ti met laeng daga agbalin a langalang a rebbek.’”+
17 “‘Wenno no iyegko koma ti maysa a kampilan iti rabaw dayta a daga,+ ket pudno a kunaek: “Ti maysa a kampilan lumasat koma iti daga,” ket pudno a gessatekto iti dayta ti naindagaan a tao ken ti naamo nga animal,+
18 uray no dagitoy tallo a lallaki addada iti tengngana,+ kas sibibiagak,’ kuna ti Soberano nga Apo Jehova, ‘saanda a maispal uray ti annak a lallaki wenno ti annak a babbai, ngem isuda, isuda laeng, ti maispal.’”+
19 “‘Wenno no angol ti ibaonko koma iti rabaw dayta a daga+ ket pudno nga ibuyatko ti pungtotko iti dayta buyogen ti dara,+ tapno gessatek iti dayta ti naindagaan a tao ken ti naamo nga animal,
20 uray adda da Noe,+ Daniel,+ ken Job+ iti tengngana,+ kas sibibiagak,’ kuna ti Soberano nga Apo Jehova, ‘uray ti anak a lalaki wenno ti anak a babai saanda a maispal; isuda gapu iti kinalintegda maispalda ti kararuada.’”+
21 “Ta daytoy ti kinuna ti Soberano nga Apo Jehova, ‘Kastanto, met, inton adda ti uppat a makadangran nga ar-aramid ti panangukomko+—kampilan ken nakaro a bisin ken makadangran nga atap nga animal ken angol+—a pudno nga ibaonkonto iti Jerusalem tapno gessatek iti dayta ti naindagaan a tao ken ti naamo nga animal.+
22 Ngem, adtoy! sigurado nga iti dayta addanto mabati a nakatalaw a bunggoy, dagidiay mairuruar.+ Annak a lallaki ken annak a babbai, adtoyda! Rummuarda nga agturong kadakayo, ket kasapulan a makitayonto ti dalanda ken dagiti pannakilangenda.+ Ket sigurado a maliwliwakayto gapu iti didigra nga inyegkonton iti Jerusalem, iti met laeng isuamin nga inyegkonton kenkuana.’”
23 “‘Ket sigurado a liwliwaendakayto inton makitayo ti dalanda ken dagiti pannakilangenda; ket kasapulanto a maammuanyo a saan nga iti awan gapgapuna a naaramidkon amin a masapul nga aramidek maibusor kenkuana,’ kuna ti Soberano nga Apo Jehova.”+
