Ezequiel 27:1-36
27 Ket ti sao ni Jehova nagtultuloy a dumteng kaniak, a kunkunana:
2 “Ket no maipapan kenka, O anak ti tao, mangipigsaka iti maysa a dung-aw+ maipapan iti Tiro,
3 ket masapul a kunaem iti Tiro,“‘O sika nga agnanaed kadagiti pagserkan ti baybay,+ ti agtagtagilako a babai dagiti ili agpaay iti adu nga isla,+ daytoy ti kinuna ti Soberano nga Apo Jehova: “O Tiro, sika ti nagkuna, ‘Naan-anayak iti kinalibnos.’+
4 Dagiti teritoriam addada iti puso dagiti baybay.+ Dagiti mismo a nagibangon kenka inan-anayda ti kinalibnosmo.+
5 Manipud parwa a kaykayo a naggapu iti Senir+ inyaramidandaka kadagiti amin a tabla. Nangalada iti sedro manipud Libano+ tapno mangaramidda kenka iti palo.
6 Manipud nakarangrangpaya a kaykayo a naggapu iti Basan inaramidda dagiti gaudmo. Ti puruam inaramidda nga addaan marfil iti kayo a sipres, manipud kadagiti isla ti Kittim.+
7 Ti nayunnat a lupotmo ket lienso a nadumaduma ti marisna manipud Egipto,+ tapno agserbi a kas layagmo. Asul a sinulid+ ken delana a natinaan iti lumabaga a purpura+ manipud kadagiti isla ti Elisa+ isuda ti nagbalin a linong ti kubiertam.
8 “‘“Dagiti met laeng agnanaed iti Sidon+ ken iti Arvad+ nagbalinda a gumagaud maipaay kenka. Dagidiay nasigo a tattaom,+ O Tiro, addada idi kenka; isuda dagiti lumalayagmo.+
9 Uray dagiti lallakay ti Gebal+ ken dagidiay nasigo a tattaona addada idi kenka kas mananggalagala kadagiti nagsasaipam.+ Amin dagiti barko iti baybay ken dagiti met laeng marinoda addada idi kenka, tapno agisukat iti bambanag a tagilako.
10 Dagiti Persiano+ ken dagiti Ludim+ ken dagiti lallaki ti Put+—addada idi iti puersa militarmo, lallakim ti gubat. Imbitinda kenka ti kalasag ken kabal ti ulo.+ Isuda dagidiay nangparnuay iti kinangayedmo.
11 Ti annak ti Arvad,+ uray pay ti puersa militarmo, addada kadagiti padermo iti intero nga aglikmut, ket dagiti maingel a lallaki isuda dagidiay adda idi kadagiti bukodmo a torre. Dagiti nagsirkulo a kalasagda ibitinda kadagiti padermo iti intero nga aglikmut.+ Isuda inan-anayda ti kinalibnosmo.
12 “‘“Ti Tarsis+ idi ti komersiantem gapu iti kinaruay dagiti amin a kita ti napapateg a bambanag.+ Maipaay iti pirakna, landok, lata ken buli, naited dagiti pempenmo.+
13 Ti Javan,+ Tubal+ ken Mesec+ isuda dagiti agtagtagilakom. Maipaay kadagiti kararua ti tattao+ ken ar-aruaten a gambang naited ti bambanag a pakisinnukatmo.
14 Manipud iti balay ni Togarma+ adda dagiti kabalio ken kabkabalio a pakigubat ken dagiti mulo, a maipaay kadakuada naited dagiti pempenmo.
15 Ti annak ni Dedan+ isuda dagiti agtagtagilakom; adu nga isla ket komersiante nga agtartrabaho maipaay kenka; sarsara a marfil+ ken ballatinaw ti imbayadda kas sagut kenka.
16 Ti Edom idi ti komersiantem gapu iti kinaruay dagiti aramidmo. Maipaay iti turkesa,+ delana a natinaan iti lumabaga a purpura ken material a nadumaduma ti marisna ken napino nga abel ken dagiti korales ken rubrubi, naited dagiti pempenmo a kasukat.
17 “‘“Ti Juda ken ti daga ti Israel a mismo ket agtagtagilakom. Maipaay iti trigo+ ti Minnit+ ken naisangsangayan a pagtaraon ken diro+ ken lana ken balsamo,+ naited ti bambanag a pakisinnukatmo.+
18 “‘“Ti Damasco+ idi ti komersiantem gapu iti kinaruay dagiti aramidmo, gapu iti kinaruay ti amin a napateg a bambanagmo, agraman ti arak+ ti Helbon ken ti delana a lumabaga a maris-dapo.
19 Ti Vedan ken Javan manipud Uzal—intedda a maipaay kadagiti pempenmo. Ti landok nga ar-aramid a pinanday, kasia ken unas+—isuda idi ti bambanag a pakisinnukatmo.
20 Ti Dedan+ idi ti agtagtagilakom kadagiti kawes nga inabel a material a pagsakay.
21 Dagiti met laeng Arabo+ ken amin dagiti panguluen ti Quedar+ komersianteda nga agtartrabaho maipaay kenka. Kadagiti kalakian a kordero ken kalakian a karkarnero ken kalakian a kalkalding+—kadagita ket komersiantem ida.
22 Dagiti met laeng agtagtagilako ti Sheba+ ken Raama+ isuda dagiti agtagtagilakom; maipaay iti kasayaatan kadagiti amin a kita dagiti bangbanglo ken maipaay kadagiti amin a kita ti napateg a batbato ken balitok, naited dagiti pempenmo.+
23 Ti Haran+ ken Canne ken Eden,+ dagiti agtagtagilako ti Sheba,+ Assur+ ken Kilmad isuda dagiti agtagtagilakom.
24 Isuda dagiti agtagtagilakom kadagiti nangayed a kawes, kadagiti balkut nga asul a material ken material a nadumaduma ti marisna ken kadagiti alpombra a dua ti marisna, kadagiti tali a tiniritir ken natibker ti pannakaaramidna, iti sentro a paglakuam.
25 “‘“Dagiti barko ti Tarsis+ isuda dagiti sangkakuyogan a managbiahem a maipaay iti bambanag a pakisinnukatmo, iti kasta mapnoka ket agbalinka a nadayag unay iti puso ti nawayang a baybay.+
26 “‘“Dagidiay mangigagaud kenka impandaka iti nakalawlawa a dandanum.+ Ti met laeng wayaway nga angin binuraknaka iti puso ti nawayang a baybay.+
27 Ti napateg a bambanagmo ken dagiti pempenmo,+ ti bambanag a pakisinnukatmo,+ dagiti marinom ken dagiti lumalayagmo,+ dagiti mananggalagala iti nagsasaipam+ ken dagidiay makisinsinnukat iti bambanag a tagilakom ken amin dagiti lallakim ti gubat,+ nga adda kenka ken iti intero a kongregasionmo, isuda nga adda iti tengngam,—matnagdanto iti puso ti nawayang a baybay iti aldaw ti pannakatnagmo.+
28 “‘“Iti uni ti ikkis dagiti lumalayag agyugayogto ti nawayang nga away.+
29 Ket amin dagidiay agig-iggem iti gaud, dagiti marino, amin dagiti lumalayag iti baybay, sigurado a bumabadanto manipud kadagiti barkoda; agtakderdanto iti rabaw ti daga.+
30 Ket sigurado nga ipangngegdanto ti timekda maipapan kenka ket umkisda a sipapait.+ Ket mangipuruakdanto iti tapok kadagiti uloda.+ Agiladdanto iti dapdapo.+
31 Ket kalbuendanto ti bagbagida iti panagkalbo gapu kenka,+ ket agbarikesda iti tinakpil+ ken sangitandaka iti kinapait ti kararua,+ buyogen ti napait a panagdung-aw.
32 Ket maipaay kenka iti panagun-unnoyda sigurado a mangipigsadanto iti dung-aw ken dayyengandaka,+
“‘“‘Siasino ti kas iti Tiro,+ kas kenkuana a napagulimek iti tengnga ti baybay?+
33 Idi rimmuar dagiti pempenmo+ manipud iti nawayang a baybay,+ pinennekmo ti adu nga ili.+ Babaen iti kinaruay ti napateg a bambanagmo ken ti bambanag a pakisinnukatmo pinabaknangmo ti ar-ari ti daga.+
34 Ita binuraknakan ti nawayang a baybay, iti kaadalman ti dandanum.+ No maipapan iti bambanag a pakisinnukatmo ken iti intero a kongregasionmo,+ narbadan iti tengngam.
35 Amin dagiti agnanaed kadagiti isla+—sigurado a sisisiddaaw a mulagatandakanto, ket ti met laeng ar-arida siaaligagaw nga agpigergerdanto.+ Agbalinto a naaburido dagiti rupa.+
36 No maipapan kadagiti komersiante iti tengnga dagiti ili, sigurado a sagawisiwandakanto.+ Dagiti kellaat a pagaligagetan isu ti pagbalinamto, ket awankanton agingga iti tiempo a di nakedngan.’”’”+
