Ezequiel 35:1-15
35 Ket ti sao ni Jehova nagtultuloy a dumteng kaniak, a kunkunana:
2 “Anak ti tao, iturongmo ta rupam+ maibusor iti nakabambantay a rehion ti Seir+ ket agipadtoka maibusor iti dayta.+
3 Ket masapul a kunaem iti dayta, ‘Daytoy ti kinuna ti Soberano nga Apo Jehova: “Adtoy bumusorak kenka, O nakabambantay a rehion ti Seir,+ ket iyunnatkonto ti imak maibusor kenka+ ket pagbalinenka a langalang a rebbek, langalang a mismo.+
4 Isaadkonto dagiti siudadmo a kas walangwalang a disso, ket sika agbalinkanto a bin-ig a langalang a rebbek;+ ket kasapulanto a maammuam a siak ni Jehova,+
5 iti rason a naaddaanka iti di nakedngan ti kapautna a panagginnura+ ket inyaw-awatmo ti annak ti Israel iti pannakabalin ti kampilan,+ iti tiempo ti pannakadidigrada,+ iti tiempo ti kamaudianan a biddutda.”’+
6 “‘Gapuna kas sibibiagak,’ kuna ti Soberano nga Apo Jehova, ‘agsipud ta isagsaganaka idi maipaay iti dara, ti met laeng dara kamatennakanto met.+ Sigurado a ti dara isu ti ginuram, ket ti met laeng dara kamatennakanto.+
7 Ket pudno unay a pagbalinekto ti nakabambantay a rehion ti Seir a maysa a langalang a rebbek, langalang a mismo,+ ket gessatekto iti dayta daydiay lumaslasat ken daydiay agsubsubli.+
8 Ket punnuekto ti bambantayna kadagiti napapatay kenkuana; no maipapan kadagiti turodmo ken kadagiti gingetmo ken kadagiti amin a pagayusan ti waigmo, dagidiay mismo a napapatay iti kampilan mapasagdanto kadakuada.+
9 Pagbalinenkanto a di nakedngan ti kapautna a langalang a rebrebbek, ket saanto a mapagnaedan dagiti bukodmo a siudad;+ ket kasapulanto a maammuanyo a siak ni Jehova.’+
10 “Gapu iti panangikunam, ‘Dagitoy dua a nasion ken dagitoy dua a daga—agbalindanto a kukuak, ket sigurado a tagikuaenminto ti tunggal daga,’+ idinto ta ni met laeng Jehova adda idi sadiay,+
11 ‘gapuna kas sibibiagak,’ kuna ti Soberano nga Apo Jehova, ‘agtignayakto met maitunos iti ungetmo ken maitunos iti panagimonmo nga inyebkasmo gapu kadagiti pannakariknam iti gura kadakuada;+ ket ipakaammokto ti bagik iti tengngada inton ukomenka.+
12 Ket kasapulanto a maammuam a siak, ni Jehova, nangngegko amin a di mangraem a bambanagmo a sinaom maipapan iti bambantay ti Israel,+ a kinunam: “Napaglangalangdan. Naitedda kadatayo a kas taraon.”+
13 Ket nagtigtignaykayo iti napalalo nga estilo maibusor kaniak babaen kadagiti ngiwatyo,+ ket pinaaduyo ti sasaoyo maibusor kaniak.+ Siak nangngegko ida.’+
14 “Daytoy ti kinuna ti Soberano nga Apo Jehova, ‘Iti isu met laeng a tiempo nga agrag-o ti intero a daga, aramidenkanto a langalang a rebbek.
15 No kasano nga adda idi panagrag-o iti biangmo gapu iti tawid ti balay ti Israel agsipud ta napaglangalang, aramidekto kenka ti isu met laeng a banag.+ Langalang a rebbek ti pagbalinamto, O nakabambantay a rehion ti Seir, uray ti intero nga Edom, ti intero dayta;+ ket kasapulanto a maammuanda a siak ni Jehova.’”+
