Ezequiel 39:1-29
39 “Ket no maipapan kenka, O anak ti tao, agipadtoka maibusor ken Gog,+ ket masapul a kunaem, ‘Daytoy ti kinuna ti Soberano nga Apo Jehova: “Adtoy bumusorak kenka, O Gog, sika a kangrunaan a panguluen ti Mesec+ ken Tubal.+
2 Ket ibaw-ingkanto ken iturongka+ ken pasang-atenka manipud iti kaadaywan a paspaset ti amianan+ ken iyegka iti rabaw ti bambantay ti Israel.
3 Ket tippayekto ti baim iti makannigid nga imam, ket dagiti panam pagtinnagekto manipud iti bukodmo a makannawan nga ima.
4 Mapasagkanto iti rabaw ti bambantay ti Israel,+ sika ken amin dagiti bunggoymo ken dagiti ili a maikuyogto kenka. Kadagiti tumatayab nga agsippayot, kadagiti tumatayab nga addaan iti tunggal kita ti payak, ken kadagiti atap nga animal iti tay-ak itedkanto a kas taraon.”’+
5 “‘Mapasagkanto iti rabaw ti tay-ak,+ ta siak sinaok,’ kuna ti Soberano nga Apo Jehova.
6 “‘Ket mangibaonakto iti apuy iti Magog+ ken kadagidiay nga agnanaed a sitatalged kadagiti isla;+ ket kasapulanto a maammuan dagiti tattao a siak ni Jehova.
7 Ket ti nasantuan a naganko ipakaammokto iti tengnga ti ilik nga Israel, ket saankonton a palubosan a matabbaawan ti nasantuan a naganko;+ ket kasapulanto a maammuan dagiti nasion a siak ni Jehova,+ Daydiay Santo iti Israel.’+
8 “‘Adtoy! Masapul nga umay dayta ket masapul a maaramid,’+ kuna ti Soberano nga Apo Jehova. ‘Daytoy ti aldaw a maipapan iti dayta nagsaoak.+
9 Ket sigurado a rummuarto dagiti agnanaed kadagiti siudad ti Israel ket agpuor ken mangpataudda kadagiti apuy babaen iti armas ken kadagiti sarapa ken kadagiti dadakkel a kalasag,—babaen kadagiti bai ken babaen kadagiti pana ken babaen kadagiti pika ken babaen kadagiti gayang; ket babaen kadakuada mangpasgeddanto kadagiti apuy+ iti pito a tawen.
10 Ket saandanto a mangawit kadagiti ruting ti kayo manipud iti tay-ak, saandanto met nga agurnong iti sungrod manipud kadagiti bakir, ta babaen kadagiti armas mangpasgeddanto kadagiti apuy.’
“‘Ket sigurado a gam-udandanto dagidiay manggamgam-ud kadakuada,+ ket samsamanda dagidiay mangsamsamsam kadakuada,’ kuna ti Soberano nga Apo Jehova.
11 “‘Ket mapasamakto iti dayta nga aldaw nga itdekto ken Gog+ ti maysa a disso sadiay, maysa a lugar a pagitabonan iti Israel, ti ginget dagidiay lumablabas iti daya ti baybay, ket pasardengennanto dagidiay lumablabas. Ket sadiay itabondanto ni Gog ken ti intero a bunggoyna, ket sigurado nga awagandanto dayta iti Ginget ti Bunggoy ni Gog.+
12 Ket dagiti kameng ti balay ti Israel itabondanto ida iti panggep a panangdalus iti daga, iti pito a bulan.+
13 Ket amin dagiti umili iti daga agitabondanto, ket sigurado nga agbalinto dayta kadakuada a banag nga agdindinamag iti aldaw a panangpadayagko iti bagik,’+ kuna ti Soberano nga Apo Jehova.
14 “‘Ket addanto ilasinda a lallaki a maipaay iti agtultuloy a panagtrabaho, a lumabasda iti daga, nga agitabonda, agraman dagidiay lumablabas, dagidiay nabatbati iti rabaw ti daga, tapno dalusanda dayta. Agingga iti ngudo ti pito a bulan itultuloydanto ti agbirok.
15 Ket dagidiay lumablabas masapul a lumasatda iti daga, ket no ti maysa pudno a makitana ti tulang ti maysa a tao masapul met a mangibangon iti abayna iti pangmarka, agingga a dagidiay agitabtabon naitabondanton dayta iti Ginget ti Bunggoy ni Gog.+
16 Ket kasta met a Hamona ti naganto ti siudad. Ket dalusandanto ti daga.’+
17 “Ket no maipapan kenka, O anak ti tao, daytoy ti kinuna ti Soberano nga Apo Jehova, ‘Kunaem kadagiti tumatayab nga addaan tunggal kita ti payak ken kadagiti amin nga atap nga animal iti tay-ak:+ “Aguummongkayo a sangsangkamaysa ket umaykayo. Iti intero nga aglikmut aguurnongkayo a sangsangkamaysa iti sakripisiok, nga isakripisiok maipaay kadakayo, maysa a naindaklan a sakripisio iti rabaw ti bambantay ti Israel.+ Ket pudno unay a mangankayto iti lasag ken uminumkayo iti dara.+
18 Kanenyonto ti lasag dagidiay mannakabalin,+ ket inumenyonto ti dara dagidiay panguluen ti daga, dagiti kalakian a karnero, dagiti urbon a kalakian a karnero,+ ken dagiti kalakian a kalding, urbon a tortoro,+ dagiti napalukmeg ti Basan isuda amin.+
19 Ket sigurado a mangankayto iti taba agingga a mapnekkayo+ ken uminumkayo iti dara agingga a mabartekkayo, manipud iti sakripisiok nga isakripisiokto maipaay kadakayo.”’
20 “‘Ket mapnekkayto iti lamisaanko kadagiti kabalio ken kumakaruahe, nabileg a tattao ken amin a kita ti mannakigubat,’ kuna ti Soberano nga Apo Jehova.+
21 “‘Ket isaadkonto ti dayagko iti tengnga dagiti nasion; ket amin dagiti nasion kasapulan a makitadanto ti panangukomko nga impakatko+ ken ti imak nga inkabilko iti tengngada.+
22 Ket dagiti kameng ti balay ti Israel kasapulanto a maammuanda a siak ni Jehova a Diosda manipud iti dayta nga aldaw ken agpatpatuloy.+
23 Ket kasapulanto a maammuan dagiti nasion a gapu idi iti biddutda nga isuda, ti balay ti Israel, naidestieroda,+ maigapu iti kinapudno a saanda a nagmatalek kaniak, iti kasta inlingedko ti rupak manipud kadakuada+ ket inyawatko ida iti ima dagiti kabusorda, ket nagtultuloyda a napasag, isuda amin, babaen iti kampilan.+
24 Maitunos iti kinarugitda ken maitunos kadagiti salungasingda ti inaramidko kadakuada,+ ket intultuloyko nga inlinged ti rupak manipud kadakuada.’
25 “Gapuna daytoy ti kinuna ti Soberano nga Apo Jehova, ‘Itan ti panangisublik kadagidiay kautibo ken Jacob+ ken pudno a panangngaasik iti intero a balay ti Israel;+ ket ipakitakto ti naipamaysa a debosion maipaay iti nasantuan a naganko.+
26 Ket sinagabadanton ti pannakaipababada+ ken ti isuamin a saanda a panagmatalek kaniak,+ inton agnaedda a sitatalged iti dagada,+ nga awan asinoman a mamagpigerger kadakuada.+
27 Inton isublik ida manipud kadagiti ili ket pudno nga ummongek ida a sangsangkamaysa manipud iti dagdaga dagiti kabusorda,+ santipikarekto met ti bagik iti tengngada iti imatang dagiti adu a nasion.’+
28 “‘Ket kasapulanto a maammuanda a siak ni Jehova a Diosda, inton paipanko ida iti pannakaidestiero kadagiti nasion ken pudno nga iyegko a pagkaykaysaen ida iti dagada,+ iti kasta awanton kadakuada ti ibatik sadiay.+
29 Ket saankonton nga ilinged ti rupak manipud kadakuada,+ agsipud ta iparukpokkonto ti espirituk iti balay ti Israel,’+ kuna ti Soberano nga Apo Jehova.”
