Ezequiel 18:1-32
18 Ket ti sao ni Jehova nagtultuloy a dumteng kaniak, a kunkunana:
2 “Ania ti kayatna a sawen kadakayo ti panangyeb-ebkasyo iti daytoy a pagkukuna a proverbio iti daga ti Israel, a kunkunayo, ‘Dagiti amma isuda ti mangan kadagiti naata nga ubas, ngem dagiti ngipen ti annak isuda ti maalino’?+
3 “‘Kas sibibiagak,’ kuna ti Soberano nga Apo Jehova, ‘saanton nga agtultuloy a dakayo ti mangyebkas itoy a pagkukuna a proverbio iti Israel.
4 Adtoy! Amin dagiti kararua—kukuak ida.+ Kas iti kararua+ ti ama kasta met iti kararua ti anak—kukuak ida.+ Ti kararua nga agbasbasol+—dayta a mismo matayto.+
5 “‘Ket no maipapan iti maysa a lalaki, no kas pagarigan isu nalinteg ket nangipakat iti kinahustisia ken kinalinteg;+
6 iti bambantay+ saan a nangan+ ket saanna nga intangad dagiti matana kadagiti makadurmen nga idolo ti balay ti Israel,+ ket saanna a tinulawan ti asawa a babai ti kaduana+ ket iti babai nga adda iti kinarugitna saan nga umasideg;+
7 ket awan ti irurumenna a tao;+ ti tani nga innalana gapu iti nautang, isublina;+ awan ti rabnotenna a takawen;+ iti daydiay mabisin itedna ti bukodna a tinapay+ ket daydiay lamolamo abbonganna iti kawes;+
8 awan ti itedna nga addaan patubo+ ket saan a mangala iti am-am;+ manipud di kinahustisia isanudna ti imana;+ ipakatna ti pudno a kinahustisia iti nagbaetan ti tao ken tao;+
9 isu nagtultuloy a nagna kadagiti paglintegak+ ket sinalimetmetanna dagiti hudisial a pangngeddengko tapno ipakatna ti kinapudno,+ isu nalinteg.+ Di bumurong nga agtultuloyto nga agbiag,’+ kuna ti Soberano nga Apo Jehova.
10 “‘Ket no ti maysa nagbalin nga ama ti anak a mannanakaw,+ maysa a manangibukbok iti dara,+ a nagaramid iti umasping iti maysa kadagitoy a banag
11 (ngem isu awan ti inaramidna kadagitoy met laeng a banag); no kas pagarigan nangan met iti rabaw ti bambantay,+ ket tinulawanna ti asawa a babai ti kaduana;+
12 inrurumenna daydiay naparigatan ken napanglaw;+ nangrabnot iti bambanag tapno takawenna,+ ti naitani a banag saanna nga isubli;+ ket intangadna dagiti matana kadagiti makadurmen nga idolo,+ nakarimrimon a banag ti inaramidna.+
13 Nangted nga addaan iti am-am,+ ket nangala iti patubo,+ ket di bumurong a saanto nga agtultuloy nga agbiag. Inaramidna amin dagitoy a nakarimrimon a banag.+ Di bumurong a mapapatayto. Ti bukodna a dara maaddanto kenkuana.+
14 “‘Ket, adtoy! ti maysa nagbalin nga ama ti anak, nga agtultuloy a makakitkita kadagiti amin a basol ni amana nga inaramidna, ket makitana ket saan nga agaramid iti bambanag a kas kadagita.+
15 Iti bambantay saan a nangan, ket saanna nga intangad dagiti matana kadagiti makadurmen nga idolo ti balay ti Israel;+ saanna a tinulawan ti asawa a babai ti kaduana;+
16 ket awan ti inrurumenna a tao,+ awan inagawna a tani,+ ket awan innalana a takawen;+ iti daydiay mabisin intedna ti bukodna a tinapay,+ ket daydiay lamolamo inabbonganna iti kawes;+
17 manipud iti daydiay naparigatan insanudna ti imana; awan innalana nga am-am+ ken patubo;+ intungpalna dagiti hudisial a pangngeddengko;+ nagna kadagiti paglintegak;+ isu saanto a matay gapu iti biddut ni amana.+ Di bumurong nga agtultuloyto nga agbiag.+
18 No maipapan iti amana, agsipud ta nakaaramid iti nalawag a panangsaur,+ nangrabnot iti maysa a banag tapno takawanna ti maysa a kabsat,+ ket aniaman a di naimbag inaramidna iti tengnga dagiti kailianna,+ adtoy! ngarud masapul a matay gapu iti biddutna.+
19 “‘Ket sigurado a kunaenyonto: “Apay a ti anak saan a kasapulan nga awitenna ti aniaman gapu iti biddut ti ama?”+ Ita no maipapan iti anak, impakatna ti kinahustisia ken kinalinteg,+ sinalimetmetanna amin dagiti paglintegak ket itultuloyna nga aramiden ida.+ Di bumurong nga agtultuloyto nga agbiag.+
20 Ti kararua nga agbasbasol—dayta a mismo matayto.+ Ti met laeng anak saanto nga agikaro gapu iti biddut ti ama, ket ti met laeng ama saanto nga agikaro gapu iti biddut ti anak.+ Ti mismo a kinalinteg daydiay nalinteg maaddanto iti bagina,+ ket ti mismo a kinadakes daydiay nadangkes maaddanto iti bagina.+
21 “‘Ita no maipapan iti maysa a nadangkes, no kas pagarigan tumallikud kadagiti amin a basolna nga inaramidna+ ket pudno a salimetmetanna amin a paglintegak ket ipakatna ti kinahustisia ken kinalinteg,+ di bumurong nga agtultuloyto nga agbiag. Saanto a matay.+
22 Amin a salungasingna a naaramidanna—saandanto a malagip maibusor kenkuana.+ Gapu iti kinalintegna nga inaramidna isu agtultuloyto nga agbiag.’+
23 “‘Adda aya aniaman a ragsakko iti ipapatay ti maysa a nadangkes,’+ kuna ti Soberano nga Apo Jehova, ‘ket saan nga iti panagtallikudna koma kadagiti dalanna ket pudno nga agtultuloy nga agbiag?’+
24 “‘Ita no ti maysa a nalinteg tumallikud iti kinalintegna ket pudno nga agaramid iti di kinahustisia;+ maitunos iti amin a nakarimrimon a bambanag nga inaramid daydiay nadangkes isu agtultuloy nga agaramid+ ket isu sibibiag, awanto ti malagip kadagiti amin a nalinteg nga aramidna nga inaramidna.+ Gapu iti saanna a kinamatalek a naaramidanna ken gapu iti basolna a nagbasolanna, gapu kadagita isu matayto.+
25 “‘Ket sigurado a kunaenyonto: “Ti dalan ni Jehova saan a siuumiso a naatur.”+ Denggem, pangngaasim, O balay ti Israel. Saan aya a ti bukodko a dalan siuumiso a naatur?+ Saan kadi a dagiti dalanyo ti saan a siuumiso a naatur?+
26 “‘No ti maysa a nalinteg tumallikud iti kinalintegna ket pudno nga agaramid iti di kinahustisia+ ket matay maigapu kadakuada, gapu iti di kinahustisia nga inaramidna isu matayto.+
27 “‘Ket no ti maysa a nadangkes tumallikud iti kinadangkesna nga inaramidna ket ipakatna ti kinahustisia ken kinalinteg,+ isu ti makataginayonto a sibibiag iti bukodna a kararua.+
28 No makitana+ ket tumallikud kadagiti amin a salungasingna nga inaramidna,+ di bumurong nga agtultuloyto nga agbiag. Saanto a matay.+
29 “‘Ket sigurado a kunaento ti balay ti Israel: “Ti dalan ni Jehova saan a siuumiso a naatur.”+ No maipapan kadagiti dalanko, saan kadi a siuumiso a naatur, O balay ti Israel?+ Saan kadi a dagiti dalanyo isuda dagidiay saan a siuumiso a naatur?’+
30 “‘Gapuna tunggal maysa maitunos kadagiti dalanna kastanto ti panangukomko kadakayo,+ O balay ti Israel,’ kuna ti Soberano nga Apo Jehova.+ ‘Tumallikudkayo, wen, mangaramidkayo iti panagtallikud kadagiti amin a salungasingyo,+ ket awan koma ti agbalin a pakaitibkolanyo a makagapu iti biddut.+
31 Ipalladawyo manipud iti bagbagiyo dagiti amin a salungasingyo nga insalungasingyo+ ket iyaramidanyo ti bagbagiyo iti baro a puso+ ken baro nga espiritu,+ ta apay koma a rebbeng a mataykayo,+ O balay ti Israel?’
32 “‘Ta awan aniaman a ragsakko iti ipapatay ti maysa a matay,’+ kuna ti Soberano nga Apo Jehova. ‘Gapuna mangaramidkayo iti panagtallikud ket agtultuloykayo nga agbiag,+ O dakayo a tattao.’”
