Ezequiel 25:1-17
25 Ket ti sao ni Jehova nagtultuloy a dumteng kaniak, a kunkunana:
2 “Anak ti tao, isangom ta rupam iti annak ti Ammon ket agipadtoka maibusor kadakuada.+
3 Ket masapul a kunaem maipapan iti annak ti Ammon, ‘Denggenyo ti sao ti Soberano nga Apo Jehova. Daytoy ti kinuna ti Soberano nga Apo Jehova: “Iti rason a kinunam Aha! maibusor iti santuariok, agsipud ta natabbaawan, ken maibusor iti daga ti Israel, agsipud ta napaglangalang, ken maibusor iti balay ti Juda, agsipud ta naidestieroda,+
4 gapuna adtoy iyawatka kadagiti taga Daya kas maysa a banag a tagikuaen,+ ket ipasdekdanto kenka dagiti napaderan a pakarsoda ket sigurado nga isaaddanto kenka dagiti tabernakuloda. Isuda kanendanto ti bungam, ket isuda inumendanto ti gatasmo.+
5 Ket pagbalinekto ti Rabba+ a pagpaaraban kadagiti kamelio ket ti annak ti Ammon maysa a lugar a paginanaan ti arban;+ ket kasapulanto a maammuanyo a siak ni Jehova.”’”+
6 “Ta daytoy ti kinuna ti Soberano nga Apo Jehova, ‘Iti rason a pinagtipatmo dagiti ima+ ket impaddakmo dagiti saka ket nagragrag-oka buyogen ti isuamin a pananglais iti biangmo ita kararuam maibusor iti daga ti Israel,+
7 gapuna adtoyak; inyunnatko ti imak maibusor kenka,+ ket iyawatkanto a kas maysa a banag a samsamen kadagiti nasion; ket gessatenkanto kadagiti ili ken dadaelenka manipud iti dagdaga.+ Talipuposenkanto,+ ket kasapulanto a maammuam a siak ni Jehova.’
8 “Daytoy ti kinuna ti Soberano nga Apo Jehova, ‘Iti rason a ti Moab+ ken ti Seir+ kinunada: “Adtoy! Ti balay ti Juda ket kas iti amin a sabsabali a nasnasion,”+
9 gapuna adtoy luktak ti darisdis ti Moab kadagiti siudad, kadagiti siudadna nga agturong iti lindorasna, ti arkos ti daga, ti Bet-jesimot,+ Baal-meon,+ uray pay agingga iti Kiriataim,+
10 kadagiti taga Daya,+ kasta met ti annak ti Ammon;+ ket pagbalinekto a maysa a banag a tagikuaen, tapno saan koma a malagip,+ awan sabali, ti annak ti Ammon, iti tengnga dagiti nasion.
11 Ket iti Moab mangipakatakto kadagiti aramid ti panangukom;+ ket kasapulanto a maammuanda a siak ni Jehova.’+
12 “Daytoy ti kinuna ti Soberano nga Apo Jehova, ‘Iti rason a ti Edom nagtignay nga agibales iti balay ti Juda ket sisasaknap nga inar-aramidda ti dakes ket imbalesanda ti bagbagida kadakuada,+
13 gapuna daytoy ti kinuna ti Soberano nga Apo Jehova: “Iyunnatkonto met ti imak maibusor iti Edom+ ket gessatekto iti dayta ti tao ken ti naamo nga animal,+ ket pagbalinekto a walangwalang a disso manipud Teman,+ uray pay agingga iti Dedan.+ Mapasagdanto babaen ti kampilan.
14 ‘Ket iyegkonto ti pammalesko iti Edom babaen iti ima ti ilik nga Israel;+ ket masapul nga aramidenda iti Edom ti maitunos iti ungetko ken maitunos iti pungtotko; ket kasapulanto a maammuanda no ania ti pammalesko,’+ kuna ti Soberano nga Apo Jehova.”’
15 “Daytoy ti kinuna ti Soberano nga Apo Jehova, ‘Iti rason a nagtignay dagiti Filisteo buyogen ti pammales+ ket imbalbalesanda ti bagbagida iti pammales nga addaan pananglais iti kararua, tapno mangdadaelda,+ buyogen ti di nakedngan ti kapautna a panagginnura,+
16 gapuna daytoy ti kinuna ti Soberano nga Apo Jehova: “Adtoy iyunnatko ti imak maibusor kadagiti Filisteo,+ ket gessatekto dagiti Kereteo+ ken dadaelek ti nabatbati a paset ti igid ti baybay.+
17 Ket mangipakatakto kadakuada iti dadakkel nga ar-aramid ti pammales, agraman kadagiti nadawel a pannubngar;+ ket kasapulanto a maammuanda a siak ni Jehova inton iyegko kadakuada ti pammalesko.”’”+
