Ezequiel 20:1-49
20 Ita naaramid iti maikapito a tawen, iti maikalima a bulan, iti maikasangapulo nga aldaw ti bulan, a dagiti lallaki manipud kadagiti lallakay ti Israel immayda tapno agimtuodda ken Jehova,+ ket nagtugawda iti sanguanak.+
2 Idin ti sao ni Jehova dimteng kaniak, a kunkunana:
3 “Anak ti tao, makisaoka kadagiti lallakay ti Israel, ket masapul a kunaem kadakuada, ‘Daytoy ti kinuna ti Soberano nga Apo Jehova: “Umaykayo kadi tapno agimtuod kaniak?+ ‘Kas sibibiagak, saandakto a mapagimtuodan,’+ kuna ti Soberano nga Apo Jehova.”’
4 “Ukomemto aya ida? Ukomemto aya ida, O anak ti tao?+ Ipakaammom kadakuada ti nakarimrimon a bambanag dagidi ammada.+
5 Ket masapul a kunaem kadakuada, ‘Daytoy ti kinuna ti Soberano nga Apo Jehova: “Iti aldaw a panangpilik iti Israel,+ intag-ayko met ti imak+ iti maysa a sapata iti bin-i ti balay ni Jacob+ ket impakaammok ti bagik kadakuada idiay daga ti Egipto.+ Wen, intag-ayko ti imak iti maysa a sapata kadakuada, a kinunak, ‘Siak ni Jehova a Diosyo.’+
6 Iti dayta nga aldaw intag-ayko ti imak+ iti maysa a sapata kadakuada nga iruarko ida manipud daga ti Egipto nga ipan iti daga a sinimisimko maipaay kadakuada, maysa a pagay-ayusan ti gatas ken diro.+ Arkos idi dayta dagiti amin a daga.+
7 Ket kinunak kadakuada, ‘Ibellengyo, tunggal maysa kadakayo, ti makarimon a bambanag dagiti matana,+ ket kadagiti makadurmen nga idolo ti Egipto dikay tulawan ti bagbagiyo.+ Siak ni Jehova a Diosyo.’+
8 “‘“Ket nangrugida nga agrebelde kaniak,+ ket saanda nga immannugot nga agimdeng kaniak. Ti makarimon a bambanag dagiti matada saan nga imbelleng ti tunggal maysa kadakuada, ket dagiti makadurmen nga idolo ti Egipto saanda a pinanawan,+ iti kasta inkarik nga ibuyatko ti pungtotko kadakuada, tapno ipatinggak ti ungetko kadakuada iti tengnga ti daga ti Egipto.+
9 Ket nagtignayak maipagapu iti bukodko a nagan tapno saan a matabbaawan iti imatang dagiti nasion nga iti tengngada ti ayanda idi,+ agsipud ta impakaammok ti bagik kadakuada iti imatangda iti panangiruarko kadakuada manipud daga ti Egipto.+
10 Iti kasta inruarko ida manipud daga ti Egipto ket inyegko ida iti let-ang.+
11 “‘“Ket intedko kadakuada dagiti paglintegak;+ ket impakaammok kadakuada dagiti hudisial a pangngeddengko,+ tapno iti kasta ti tao nga agtultuloy a mangaramid kadakuada makapagtultuloy met nga agbiag babaen kadakuada.+
12 Ket intedko met kadakuada dagiti sabbathko,+ tapno agbalin a pagilasinan iti nagbaetanmi,+ tapno maammuanda a siak ni Jehova a mangsansantipikar kadakuada.
13 “‘“Ngem isuda, ti balay ti Israel, nagrebeldeda kaniak idiay let-ang.+ Saanda a nagna kadagiti paglintegak,+ ket linaksidda dagiti hudisial a pangngeddengko,+ a, no koma itultuloy nga aramiden ti tao, agtultuloyto met nga agbiag babaen kadakuada.+ Ket dagiti sabbathko tinabbaawanda iti kasta unay,+ iti kasta inkarik nga ibuyatko ti rungsotko kadakuada idiay let-ang, tapno talipuposek ida.+
14 Ngem nagtignayak maipagapu iti bukodko a nagan tapno saan koma a matabbaawan iti imatang dagiti nasion, nga iti imatangda inruarko ida.+
15 Ket siak intag-ayko met ti imak iti maysa a sapata kadakuada idiay let-ang,+ a saanko nga ipan ida iti daga nga intedko, maysa a pagay-ayusan ti gatas ken diro,+ (arkos dayta dagiti amin a daga,)+
16 iti rason a linaksidda dagiti bukodko a hudisial a pangngeddeng; ket no maipapan kadagiti paglintegak, saanda a nagna kadakuada, ket tinulawanda dagiti sabbathko, agsipud ta dagiti makadurmen nga idoloda ti simmurotan ti pusoda.+
17 “‘“Ket ti matak nangrugi a maasian kadakuada a lapdannak a mangdadael kadakuada,+ ket saanko a tinalipupos ida idiay let-ang.
18 Ket kinunak iti annakda idiay let-ang,+ ‘Dikay magna kadagiti alagaden dagidi ammayo,+ ket dikay salimetmetan dagiti panangukomda,+ ket dikay tulawan ti bagbagiyo kadagiti makadurmen nga idoloda.+
19 Siak ni Jehova a Diosyo.+ Magnakayo kadagiti bukodko a paglintegan,+ ket salimetmetanyo dagiti bukodko a hudisial a pangngeddeng+ ket aramidenyo ida.+
20 Ket santipikarenyo dagiti bukodko a sabbath,+ ket masapul nga agserbida a kas pagilasinan iti nagbaetantayo, tapno maammuanyo a siak ni Jehova a Diosyo.’+
21 “‘“Ket ti annak nangrugida nga agrebelde kaniak.+ Saanda a nagna kadagiti paglintegak, ket saanda a sinalimetmetan dagiti hudisial a pangngeddengko babaen iti panangaramid kadakuada, a, no koma itultuloy nga aramiden ti tao, agtultuloyto met nga agbiag babaen kadakuada.+ Tinabbaawanda dagiti sabbathko.+ Iti kasta inkarik nga ibuyatko ti pungtotko kadakuada, tapno ipatinggak ti ungetko kadakuada idiay let-ang.+
22 Ket insanudko ti imak+ ket nagtignayak maipagapu iti bukodko a nagan, tapno saan koma a matabbaawan iti imatang dagiti nasion, nga iti imatangda inruarko ida.+
23 Kasta met, siak intag-ayko ti imak iti maysa a sapata kadakuada idiay let-ang,+ a pagwarawaraek ida kadagiti nasion ken iwarawarak ida kadagiti daga,+
24 iti rason a saanda nga intungpal dagiti bukodko a hudisial a pangngeddeng+ ken linaksidda dagiti bukodko a paglintegan+ ket tinabbaawanda dagiti bukodko a sabbath,+ ket dagiti makadurmen nga idolo dagidi ammada ti simmurotan dagiti matada.+
25 Ket siak binay-ak met ida a maaddaan kadagiti alagaden a saan a naimbag ken kadagiti hudisial a pangngeddeng a babaen kadagita saanda a makapagtultuloy nga agbiag.+
26 Ket bay-ak ida nga agbalin a natulawan babaen kadagiti sagutda idi a ti tunggal ubing a manglukat iti aanakan pinalasatda iti apuy,+ tapno iti kasta mapagbalinko ida a nabaybay-an, tapno iti kasta maammuanda a siak ni Jehova.”’+
27 “Gapuna agsaoka iti balay ti Israel, O anak ti tao, ket masapul a kunaem kadakuada,+ ‘Daytoy ti kinuna ti Soberano nga Apo Jehova: “Kaskasdi maipapan itoy a banag, dagidi ammayo nagsaoda a sibabassawang maipapan kaniak, iti panagtignayda maibusor kaniak buyogen ti di kinamatalek.+
28 Ket impanko ida iti daga+ a nangitag-ayak iti imak iti maysa a sapata tapno itedko kadakuada.+ Idi nakakitada iti tunggal nangato a turod+ ken tunggal nasanga a kayo, ngarud rinugianda nga insakripisio sadiay dagiti sakripisioda+ ken impaay sadiay dagiti makaparurod a datonda, ken indiaya sadiay dagiti makapainana a sayamusomda+ ken imbuyat sadiay dagiti datonda nga inumen.+
29 Iti kasta kinunak kadakuada, ‘Ania ti kayat a sawen ti nangato a disso a papananyo, tapno ti naganna rebbeng a maawagan iti Nangato a Disso agingga itoy nga aldaw?’”’+
30 “Gapuna kunaem iti balay ti Israel, ‘Daytoy ti kinuna ti Soberano nga Apo Jehova: “Tultulawanyo kadi ti bagbagiyo kas iti wagas dagidi ammayo,+ ket iti makarimon a bambanagda sumursurotkayo kadi buyogen ti imoral a pannakidenna?+
31 Ket iti panangitag-ayyo kadagiti sagutyo babaen ti panangpalasat iti annakyo iti apuy,+ tultulawanyo kadi ti bagbagiyo gapu kadagiti amin a makadurmen nga idoloyo agingga itoy nga aldaw?+ Kabayatanna siak pagimtuodandakto kadi, O balay ti Israel?”’+
“‘Kas sibibiagak,’ kuna ti Soberano nga Apo Jehova, ‘saandakto a mapagimtuodan.+
32 Ket daydiay sumsumrek iti espirituyo+ di bumurong a saanto a maaramid dayta,+ iti panangikunayo: “Agbalintayo koma a kas kadagiti nasion, kas kadagiti pamilia ti daga,+ iti panagserbi iti kayo ken bato.”’”+
33 “‘Kas sibibiagak,’ kuna ti Soberano nga Apo Jehova, ‘babaento iti napigsa nga ima ken babaen iti siuunnat a takiag+ ken babaen iti naiparukpok a pungtot nga agturayakto a kas ari kadakayo.+
34 Ket iruarkayto manipud kadagiti ili, ket ummongenkayto a sangsangkamaysa manipud kadagiti daga a nakaiwarawaraanyo babaen ti napigsa nga ima ken babaen ti siuunnat a takiag ken babaen ti naiparukpok a pungtot.+
35 Ket ipankayto iti let-ang dagiti ili+ ket ikabilkonto ti bagik a mangukom kadakayo sadiay iti rupanrupa.+
36 “‘No kasano nga inkabilko ti bagik a nangukom kadagidi ammayo idiay let-ang ti daga ti Egipto,+ kasta ti panangikabilkonto ti bagik a mangukom kadakayo,’ kuna ti Soberano nga Apo Jehova.
37 ‘Ket paglasatenkayto iti baba ti sarukod+ ket iyegkayo iti singgalut ti tulag.+
38 Ket punasekto kadakayo dagiti managalsa ken managsalungasing+ a maikaniwas kaniak, ta manipud iti daga a pagnaedanda kas ganggannaet iruarkonto ida, ngem saandanto nga umay iti daga ti Israel;+ ket kasapulanto a maammuanyo a siak ni Jehova.’+
39 “Ket dakayo, O balay ti Israel, daytoy ti kinuna ti Soberano nga Apo Jehova, ‘Mapankayo agserbi tunggal maysa kadakayo kadagiti bukodna a makadurmen nga idolo.+ Ket kalpasanna no saankayo nga umim-imdeng kaniak, ngarud saanyonton a tabbaawan ti nasantuan a naganko babaen kadagiti sagutyo ken babaen kadagiti makadurmen nga idoloyo.’+
40 “‘Ta iti nasantuan a bantayko, iti bantay ti kangatuan ti Israel,’+ kuna ti Soberano nga Apo Jehova, ‘sadiay nga isuda, ti intero a balay ti Israel iti pakabuklanna, agserbidanto kaniak, iti daga.+ Sadiay pagragsakakto ida, ket sadiay singirekto dagiti kontribusionyo ken ti umuna a bungbunga dagiti parangkapyo iti amin a nasantuan a bambanagyo.+
41 Gapu iti makabang-ar a sayamusom pagragsakankayto,+ inton iruarkayo manipud kadagiti ili ket pudno nga ummongenkayo a sangsangkamaysa manipud kadagiti daga a nakaiwarawaraanyo,+ ket dakayo ti pakasantipikarakto iti imatang dagiti nasion.’+
42 “‘Ket kasapulanto a maammuanyo a siak ni Jehova,+ inton iyegkayo iti daga ti Israel,+ iti daga a nangitag-ayak iti imak iti maysa a sapata tapno itedko kadagidi ammayo.
43 Ket sigurado a malagipyonto sadiay dagiti dalanyo+ ken amin dagiti pannakilangenyo a pinangtulawyo iti bagbagiyo,+ ket pudno a karumenyonto dagiti bukodyo a rupa gapu iti amin a dakes a bambanagyo nga inaramidyo.+
44 Ket kasapulanto a maammuanyo a siak ni Jehova+ inton agtignayak kadakayo maipagapu iti naganko,+ saan a maitunos kadagiti dakes a dalanyo wenno maitunos kadagiti rinuker a pannakilangenyo,+ O balay ti Israel,’ kuna ti Soberano nga Apo Jehova.”
45 Ket ti sao ni Jehova nagtultuloy a dumteng kaniak, a kunkunana:
46 “Anak ti tao, isangom ta rupam+ iti makin-abagatan a kuartel ket mangyibbatka+ iti sasao iti abagatan, ket agipadtoka a maiturong iti bakir ti tay-ak ti abagatan.
47 Ket masapul a kunaem iti bakir ti abagatan, ‘Denggem ti sao ni Jehova. Daytoy ti kinuna ti Soberano nga Apo Jehova: “Adtoy mangpagayebgebak iti apuy maibusor kenka,+ ket alun-onennanto kenka ti tunggal naata pay laeng a kayo ken ti tunggal nagango a kayo.+ Ti sumsumged a gil-ayab saanto a maiddep,+ ket babaen iti dayta maksetto dagiti amin a rupa manipud iti abagatan agingga iti amianan.+
48 Ket amin dagidiay addaan lasag makitadanto a siak, ni Jehova, ti nangpasged iti dayta, tapno iti kasta saanto a maiddep.”’”+
49 Ket kinunak: “Ay, O Soberano nga Apo Jehova! Kunkunada maipapan kaniak, ‘Saan aya a mangputputar kadagiti pagkukuna a proverbio?’”+
