1 Samuel 7:1-17
7 Iti kasta immay dagiti tattao ti Kiriat-jearim+ ket insang-atda ti lakasa ni Jehova ket inyegda iti balay ni Abinadab+ iti turod, ket ni Eleazar nga anakna ti sinantipikarda a mangbantay iti lakasa ni Jehova.
2 Ket naaramid a manipud iti aldaw a panagnaed ti Lakasa idiay Kiriat-jearim nagtultuloy nga immadu ti al-aldaw, gapuna nagdagupda iti duapulo a tawen, ket ti intero a balay ti Israel nagun-unnoy a timmurong ken Jehova.+
3 Ket kinuna ni Samuel iti intero a balay ti Israel: “No buyogen ti isuamin a pusoyo nga agsublikayo ken Jehova,+ iwaksiyo ti ganggannaet a didios manipud nagtetengngaanyo+ ken kasta met dagiti ladawan ni Astoret,+ ket iturongyo a di maisin ti pusoyo ken Jehova ket isu laeng ti pagserbianyo,+ ket ispalennakayto iti ima dagiti Filisteo.”+
4 Iti kasta ti annak ti Israel inwaksida dagiti Baal+ ken dagiti ladawan ni Astoret+ ket rinugianda ti nagserbi ken Jehova laeng.
5 Kalpasanna kinuna ni Samuel: “Ummongenyo a sangsangkamaysa ti intero nga Israel+ idiay Mizpa,+ tapno agkararagak+ ken Jehova maigapu kadakayo.”
6 Gapuna naummongda a sangsangkamaysa idiay Mizpa, ket nagsakdoda iti danum ket imbukbokda iti sango ni Jehova ket nagayunarda iti dayta nga aldaw.+ Ket rinugianda a kinuna sadiay: “Nagbasolkami a maikaniwas ken Jehova.”+ Ket inukom ni Samuel+ ti annak ti Israel idiay Mizpa.
7 Ket nangngeg dagiti Filisteo a naguummong a sangsangkamaysa idiay Mizpa ti annak ti Israel, ket simmang-at ti aliado nga appo+ dagiti Filisteo maibusor iti Israel. Idi nangngeg dayta ti annak ti Israel, nangrugida nga agbuteng maigapu kadagiti Filisteo.+
8 Gapuna ti annak ti Israel kinunada ken Samuel: “Dika agulimek maipagapu kadakami iti iyaasug ken Jehova a Diostayo maipaay ti tulong,+ tapno isalakannatayo koma iti ima dagiti Filisteo.”
9 Idin nangala ni Samuel iti agsussuso a kordero ket indatonna a kas daton a mapuoran, maysa a sibubukel a daton,+ ken Jehova; ket rinugian ni Samuel ti immasug ken Jehova maipaay ti tulong maigapu iti Israel,+ ket sinungbatan ni Jehova.+
10 Ket naaramid a bayat nga idatdaton ni Samuel ti daton a mapuoran, dagiti met laeng Filisteo immasidegda a makibakal iti Israel. Ket pinaggurruod ita ni Jehova iti natbag a daranudor+ iti dayta nga aldaw maibusor kadagiti Filisteo, tapno riribukenna ida;+ ket naabakda iti sango ti Israel.+
11 Iti kasta rimmuar a dumarup dagiti lallaki ti Israel manipud Mizpa ket kinamatda dagiti Filisteo ket intultuloyda a kinabil ida agingga idiay abagatan ti Bet-car.
12 Kalpasanna nangala ni Samuel iti maysa a bato+ ket insaadna iti nagbaetan ti Mizpa ken Jesana ket rinugianna a panaganan iti Ebenezer. Iti kasta kinunana: “Agingga ita tinulongannatayo ni Jehova.”+
13 Gapuna naparukma dagiti Filisteo, ket saandan a simrek uray kaanoman iti teritoria ti Israel;+ ket ti ima ni Jehova nagtultuloy a bumusor kadagiti Filisteo iti amin nga al-aldaw ni Samuel.+
14 Ket dagiti siudad nga innala dagiti Filisteo manipud Israel nagtultuloy a naisubli iti Israel manipud Ekron agingga iti Gat, ket ti teritoriada inispal ti Israel iti ima dagiti Filisteo.
Ket naadda ti talna iti nagbaetan ti Israel ken dagiti Amoreo.+
15 Ket ni Samuel inuk-ukomna ti Israel iti amin nga al-aldaw ti panagbiagna.+
16 Ket nagdaliasat iti tinawentawen ket rinikusna ti Bethel+ ken Gilgal+ ken Mizpa+ ket inukomna ti Israel+ kadagitoy amin a lugar.
17 Ngem nagsubli idiay Rama,+ agsipud ta sadiay idi ti ayan ti balayna, ket inukomna sadiay ti Israel. Ket nangbangon sadiay iti altar ken Jehova.+
