1 Samuel 14:1-52
14 Ket naaramid iti maysa nga aldaw a ni Jonatan+ nga anak ni Saul kinunana iti katulongan nga agaw-awit kadagiti igamna: “Umayka ket umallatiwta iti kampo dagiti Filisteo nga adda sadiay ballasiw.” Ngem saanna nga imbaga dayta ken amana.+
2 Ket agnanaed idi ni Saul iti wayaway ti Gabaa+ iti sirok ti kayo a granada nga adda idiay Migron; ket dagiti tattao a naikuyog kenkuana agarup innem a gasut a lallaki.+
3 (Ket ni Ahias nga anak ni Ahitub,+ ti kabsat ni Icabod,+ ti anak ni Finehas,+ ti anak ni Eli,+ ti padi ni Jehova idiay Silo,+ aw-awitenna idi ti efod.)+ Ket dagiti met laeng tattao saanda nga ammo a napanen ni Jonatan.
4 Ita iti baet dagiti pagdalanan a sinapul ni Jonatan a pagallatiwanna maibusor iti kampo+ dagiti Filisteo adda napasdok a bato a kasla ngipen iti daytoy a sikigan ken maysa a napasdok a bato a kasla ngipen iti daydiay a sikigan, ket ti nagan ti maysa Bozez ket ti nagan ti sabali Sene.
5 Ti maysa a ngipen ket adigi iti amianan a sumango iti Micmas,+ ket ti sabali adda iti abagatan a sumango iti Geba.+
6 Gapuna kinuna ni Jonatan iti katulongan, ti agaw-awit iti armasna: “Umayka ket umallatiwta iti kampo dagitoy di nakugit+ a lallaki. Nalabit agaramidto ni Jehova maipaay kadata, ta awan ti makalapped ken Jehova a mangisalakan babaen ti adu wenno babaen ti bassit.”+
7 Gapu itoy kinuna kenkuana ti agaw-awit iti armasna: “Aramidem ti aniaman nga adda ita pusom. Agturongka iti kayatmo. Adtoy addaak kenka a siaannurot iti pusom.”+
8 Kalpasanna kinuna ni Jonatan: “Adtoy umallatiwta kadagiti lallaki, ket agparangta kadakuada.
9 No kastoy ti sawenda kadata, ‘Agintekkayo agingga a makaasidegkami kadakayo!’ agtakdertanto ngarud iti ayanta, ket saanta a sumang-at a mapan kadakuada.
10 Ngem no kastoy ti sawenda, ‘Sumang-atkayo a maibusor kadakami!’ sumang-attanto ngarud, agsipud ta sigurado nga iyawatto ida ni Jehova iti imata, ket daytoy ti pagilasinan maipaay kadata.”+
11 Gapuna isuda a dua nagparangda iti kampo dagiti Filisteo. Ket kinuna dagiti Filisteo: “Adtoy dagiti Hebreo a rumrummuar kadagiti abut a naglemmenganda.”+
12 Gapuna dagiti lallaki iti kampo simmungbatda ken Jonatan ken iti agaw-awit iti armasna ket kinunada: “Sumang-atkayo nga umay kadakami, ket ipakaammominto kadakayo ti maysa a banag!”+ Madagdagus a kinuna ni Jonatan iti agaw-awit iti armasna: “Sumang-atka a sumurot kaniak, agsipud ta sigurado nga iyawatto ida ni Jehova iti ima ti Israel.”+
13 Ket nagtultuloy a simmang-at ni Jonatan nga inkalabkabna ti im-imana+ ken saksakana, ket sumarsaruno kenkuana ti agaw-awit iti armasna; ket nangrugida a mapasag iti sango ni Jonatan,+ ket ti agaw-awit iti armasna pinapatayna ida iti likudanna.+
14 Ket ti umuna a pananggudas a pinangpapatay kadakuada ni Jonatan ken ti agaw-awit iti armasna nagdagup iti agarup duapulo a lallaki iti uneg ti agarup kagudua ti gurit ti inarado iti maysa nga acre ti talon.
15 Kalpasanna napasamak ti panagpigerger+ iti pakarso iti tay-ak ken iti amin a tattao ti kampo; ket nagpigerger ti puersa dagiti manangkamkam,+ isuda a mismo, ket nangrugi a nagkintayeg ti daga,+ ket nagbalin dayta a panagpigerger manipud iti Dios.+
16 Ket nakita dayta dagiti managwanawan a kukua ni Saul idiay Gabaa+ ti Benjamin, ket, adtoy! nasayyasayya ti bellaak ditoy ken idiay.+
17 Ket kinuna ni Saul kadagiti tattao a naikuyog kenkuana: “Agbilangkayo, pangngaasiyo, ket kitaenyo no siasino ti rimmuar manipud kadatayo.” Idi nagbilangda, ay ket, adtoy! awan sadiay ni Jonatan ken ti agaw-awit iti armasna.
18 Ni Saul kinunana ita ken Ahias:+ “Iyasidegmo ti lakasa ti pudno a Dios!”+ (Ta ti lakasa ti pudno a Dios adda idi iti annak ti Israel iti dayta nga aldaw.)+
19 Ket naaramid a bayat nga agsasao ni Saul iti padi,+ ti bellaak nga adda iti pakarso dagiti Filisteo nagtultuloy, dumegdegdeg a dumegdegdeg. Idin kinuna ni Saul iti padi: “Isanudmo ta imam.”
20 Iti kasta naayaban ni Saul ken ti amin a tattao a naikuyog kenkuana.+ Gapuna dimtengda agingga iti bakal, ket sadiay ti kampilan ti tunggal maysa bimmusor iti padana a tao;+ dakkel unay ti pannakariribuk.
21 Ket dagiti Hebreo a nagbalin a kukua dagiti Filisteo+ kas iti sigud ken nakipagsang-at kadakuada iti pakarso iti aglikmut, uray isuda met indasigda ti bagbagida iti Israel a naikuyog kada Saul ken Jonatan.
22 Amin met dagiti lallaki ti Israel a naglemmeng+ iti nakabambantay a rehion ti Efraim nangngegda a nagtalaw dagiti Filisteo, ket isuda met kimmamatda a siaasideg kadakuada iti bakal.
23 Ket ni Jehova insalakanna ti Israel iti dayta nga aldaw,+ ket ti met laeng bakal bimmallasiw agingga idiay Bet-aven.+
24 Ket dagiti met laeng tattao ti Israel marigrigatanda iti dayta nga aldaw, ket kaskasdi a pinagkari ni Saul dagiti tattao iti maysa a sapata,+ a kunkunana: “Mailunod ti tao a mangan iti tinapay sakbay ti rabii ken agingga a nakaibalesakon+ kadagiti kabusorko!” Ket awan kadagiti tattao ti nangraman iti tinapay.+
25 Ket amin dagidiay adda iti daga simrekda iti kakaykaywan, idi nga adda diro+ iti rabaw ti tay-ak.
26 Idi a dagiti tattao simrekda iti kakaykaywan, ay ket, adtoy! agtedtedted ti diro,+ ngem awan ti asinoman a nangikabil ti imana iti ngiwatna, agsipud ta mabuteng idi dagiti tattao iti sapata.+
27 No maipapan ken Jonatan, saanna a naimdengan idi pinagsapata ni amana dagiti tattao,+ gapuna inyunnatna ti murdong ti sarukod nga adda iti imana ket insawsawna iti rara ket insanudna ti imana nga inturong iti ngiwatna, ket nangrugi nga aglawag dagiti matana.+
28 Gapu itoy simmungbat ti maysa kadagiti tattao ket kinunana: “Ni amam sidadaeg a pinagsapatana dagiti tattao, a kinunana, ‘Mailunod ti tao a mangan iti tinapay ita nga aldaw!’”+ (Ket nangrugi a mabannog dagiti umili.)+
29 Nupay kasta, kinuna ni Jonatan: “Inyeg ni amak ti pannakailaksid+ iti daga. Kitaenyo, pangngaasiyo, no kasano a naglawag dagiti matak gapu ta rinamanak daytoy sangkabassit a diro.+
30 Anian nga ad-adda pay no dagiti tattao nanganda koma+ ita nga aldaw manipud iti samsam dagiti kabusorda a nasarakanda!+ Ta ita saan a dakkel ti pananggudas kadagiti Filisteo.”+
31 Ket iti dayta nga aldaw intultuloyda a kinabil dagiti Filisteo manipud Micmas+ agingga iti Ajalon,+ ket nabannog unay dagiti tattao.+
32 Ket dagiti tattao siaagum a tinarayda ti samsam+ ket nangalada kadagiti karnero ken bakbaka ken kigaw a bakbaka ket pinartida ida iti daga, ket dagiti tattao nagkakaanda agraman iti dara.+
33 Gapuna imbagada ken Saul, a kunkunada: “Adtoy! Agbasbasol dagiti tattao maikaniwas ken Jehova babaen ti pannanganda agraman iti dara.”+ Gapu itoy kinunana: “Nakilangenkayo a sigugulib. Umuna iti amin, mangitulidkayo kaniak iti dakkel a bato.”
34 Kalpasan dayta kinuna ni Saul: “Agwaraskayo iti nagtetengngaan dagiti tattao, ket masapul a kunaenyo kadakuada, ‘Iyasidegyo kaniak, tunggal maysa kadakayo, ti torona ken, tunggal maysa, ti karnerona, ket masapul nga agpartikayo iti daytoy a lugar ken mangankayo, ket dikay agbasol maikaniwas ken Jehova babaen ti pannanganyo agraman iti dara.’”+ Iti kasta ti amin a tattao inyasidegda tunggal maysa ti torona nga adda iti imana iti dayta a rabii ket nagpartida sadiay.
35 Ket ni Saul nangbangon iti altar+ ken Jehova. Babaen iti dayta rinugianna ti panagbangon iti altar ken Jehova.+
36 Idi agangay kinuna ni Saul: “Sumalogtayo a sumurot kadagiti Filisteo iti rabii ket agsamsamtayo kadakuada agingga nga aglawag ti bigat,+ ket saantayo a mangitedda iti uray maysa kadakuada.”+ Iti daytoy kinunada: “Aniaman a banag a naimbag kadagita matam aramidem.” Kalpasanna kinuna ti padi: “Umadanitayo ditoy iti pudno a Dios.”+
37 Ket rinugian ni Saul nga imtuoden iti Dios: “Sumalogakto kadi a mangsurot kadagiti Filisteo?+ Iyawatmonto kadi ida iti ima ti Israel?”+ Ket isu saan a simmungbat kenkuana iti dayta nga aldaw.+
38 Gapuna kinuna ni Saul: “Umasidegkayo ditoy,+ dakayo amin a kangrunaan a lallaki dagiti tattao,+ ket ammuenyo ken kitaenyo no iti ania a pamay-an a naadda daytoy a basol ita nga aldaw.
39 Ta kas ni Jehova, a Manangispal iti Israel, sibibiag, uray pay no adda ken Jonatan nga anakko, kaskasdi nga isu matayto a di bumurong.”+ Ngem awan ti asinoman a simmungbat kenkuana manipud iti amin a tattao.
40 Ket kinunana iti intero nga Israel: “Dakayo addakayto iti maysa a bangir, ket siak ken ni Jonatan nga anakko—addakamto iti sabali a bangir.” Gapu itoy dagiti tattao kinunada ken Saul: “No ania ti naimbag kadagita matam aramidem.”+
41 Ket ni Saul kinunana ken Jehova: “O Dios ti Israel, itdem ti Tummim!”+ Idin da Jonatan ken Saul ti naala, ket dagiti met laeng tattao rimmuarda.+
42 Kinuna ita ni Saul: “Agbibinnunotkayo+ tapno ikeddengyo iti nagbaetanmi ken Jonatan nga anakko.” Ket ni Jonatan ti naala.
43 Idin ni Saul kinunana ken Jonatan: “Ibagam kaniak, Ania ti inaramidmo?”+ Gapuna imbaga kenkuana ni Jonatan ket kinunana: “Kinapudnona nangramanak iti bassit a diro iti murdong ti sarukod nga adda iti imak.+ Adtoyak! Bay-annak a matay!”
44 Gapu itoy kinuna ni Saul: “Kasta koma ti aramiden ti Dios ken kasta koma ti inayonna iti dayta,+ no saanka a matay a di bumurong,+ Jonatan.”
45 Ngem dagiti tattao kinunada ken Saul: “Matay kadi ni Jonatan, a nangaramid itoy naindaklan a pannakaisalakan+ iti Israel? Narigat a pagarupen!+ Kas sibibiag ni Jehova,+ awanto ti matnag iti daga nga uray maysa a buok+ ti ulona; ta iti Dios a nakipagaramid itoy nga aldaw.”+ Iti kasta dagiti tattao sinubbotda+ ni Jonatan, ket saan a natay.
46 Gapuna nagsanud ni Saul iti panangsurotna kadagiti Filisteo, ket dagiti met laeng Filisteo napanda iti lugarda.+
47 Ket ni met laeng Saul innalana ti kinaari iti Israel+ ket nakigubgubat iti aglikmut kadagiti amin a kabusorna, iti Moab+ ken iti annak ni Ammon+ ken iti Edom+ ken iti ar-ari ti Zoba+ ken kadagiti Filisteo;+ ket sadinoman a pagbaw-inganna impaayna ti panangkondenar.+
48 Ket nagtignay a simamaingel+ ket kinabilna ti Amalek+ ket inispalna ti Israel iti ima ti manangkamkam kadakuada.
49 Ket ti annak ni Saul isu da Jonatan+ ken Isvi ken Malqui-sua,+ ket, no maipapan iti nagnagan ti dua nga annakna a babbai, ti nagan daydiay immuna a nayanak Merab+ ket ti nagan daydiay ub-ubing Mical.+
50 Ket ti nagan ti asawa ni Saul Ahinoam nga anak a babai ni Ahimaaz, ket ti nagan ti panguluen ti buyotna Abner+ nga anak ni Ner, ti uliteg ni Saul.
51 Ket ni Kis+ isu ti ama ni Saul, ket ni Ner+ nga ama ni Abner isu ti anak ni Abiel.
52 Ket nagtultuloy a nakaro ti pannakigubat kadagiti Filisteo iti amin nga al-aldaw ni Saul.+ No makakita ni Saul iti asinoman a nabileg a lalaki wenno asinoman a maingel a tao, alaenna a maipaay kenkuana.+
