1 Samuel 15:1-35
15 Kalpasanna ni Samuel kinunana ken Saul: “Siak idi ti imbaon ni Jehova a mangpulot+ kenka kas ari iti ilina nga Israel, ket ita imdengam ti timek ti sasao ni Jehova.+
2 Daytoy ti kinuna ni Jehova ti buybuyot,+ ‘Masapul nga isingirko+ ti inaramid ti Amalek iti Israel idi insaadna ti bagina maibusor kenkuana iti dalan bayat a sumangsang-at manipud Egipto.+
3 Ita mapanka, ket masapul a kabilem ti Amalek+ ket ipaaymo iti pannakadadael+ agraman ti isuamin nga adda kenkuana, ket dika maasian kenkuana, ket masapul a papatayem ida,+ ti lalaki kasta met ti babai, ti ubing kasta met ti agsussuso,+ ti toro kasta met ti karnero, ti kamelio kasta met ti asno.’”+
4 Gapuna pinaayaban ni Saul dagiti tattao ket binilangna ida idiay Telaim,+ dua gasut a ribu a lallaki a magmagna ken sangapulo a ribu a lallaki ti Juda.+
5 Ket dimteng ni Saul agingga iti siudad ti Amalek ket nagsaneb iti sibay ti naapres a ginget.
6 Kabayatanna kinuna ni Saul kadagiti Keneo:+ “Mapankayo, pumanawkayo,+ sumalogkayo manipud iti nagtetengngaan dagiti Amalekita, tapno saanka a mapunas a mairaman kadakuada. No maipapan kenka, winatwatmo ti naayat a kinamanangngaasi iti amin nga annak ti Israel+ idi tiempo ti isasang-atda manipud Egipto.”+ Gapuna pimmanaw dagiti Keneo iti tengnga ti Amalek.
7 Kalpasan dayta kinabil ni Saul ti Amalek+ manipud Havila+ agingga iti Sur,+ nga adda iti sango ti Egipto.
8 Ket natiliwna a sibibiag ni Agag+ nga ari ti Amalek, ket ti amin a sabsabali a tattao impaayna iti pannakadadael babaen ti tadem ti kampilan.+
9 Ngem ni Saul ken dagiti tattao naasianda ken Agag ken iti kasayaatan iti arban ken iti pangen+ ken kadagidiay nalulukmeg ken kadagiti kalakian a karnero ken iti isuamin a naimbag, ket saanda a kinayat nga ipaay ida iti pannakadadael.+ No maipapan iti amin a sansanikua a makapasimron ken nailaksid, dagitoy impaayda iti pannakadadael.
10 Ti sao ni Jehova dimteng ita ken Samuel, a kunkunana:
11 “Pagladingitak+ a pinagturayko ni Saul kas ari, agsipud ta timmallikud+ manipud isusurot kaniak, ket saanna nga intungpal ti sasaok.”+ Ket makariribuk idi dayta ken Samuel,+ ket nagtultuloy nga immasug ken Jehova iti intero nga agpatnag.+
12 Kalpasanna bimmangon a nasapa ni Samuel a mangsarak ken Saul iti bigat. Ngem naipadamag ken Samuel, a naikuna: “Ni Saul dimteng iti Carmelo,+ ket, adtoy! nangipatakder iti monumento+ maipaay kenkuana, ket kalpasanna nagbuelta ket bimmallasiw ket simmalog idiay Gilgal.”
13 Iti kamaudiananna ni Samuel dimteng ken Saul, ket rinugian a kunaen kenkuana ni Saul: “Benditonaka+ ni Jehova. Intungpalko ti sao ni Jehova.”+
14 Ngem kinuna ni Samuel: “Ania ngarud ti kaipapanan daytoy uni ti arban kadagiti lapayagko, ken ti uni ti pangen a mangmangngegko?”+
15 Iti daytoy kinuna ni Saul: “Inyegda ida manipud kadagiti Amalekita, agsipud ta naasian dagiti tattao+ iti kasayaatan iti arban ken iti pangen, iti panggep a panagisakripisio ken Jehova a Diosmo;+ ngem ti natedda impaaymi iti pannakadadael.”
16 Gapu itoy ni Samuel kinunana ken Saul: “Agsardengka! Ket ibagakto kenka no ania ti sinao kaniak ni Jehova idi rabii.”+ Gapuna kinunana kenkuana: “Agsaoka!”
17 Ket kinuna ni Samuel: “Saan kadi nga idi bassitka iti bukodmo a matmata+ sika ti pannakaulo dagiti tribu ti Israel, ket pinulotannaka+ ni Jehova kas ari iti Israel?
18 Idi agangay imbaonnaka ni Jehova iti maysa a mision ket kinunana, ‘Mapanka, ket masapul nga ipaaymo dagiti managbasol,+ dagiti Amalekita, iti pannakadadael, ket masapul a makirupakka kadakuada agingga a natalipuposmonton ida.’+
19 Gapuna apay a saanka a nagtulnog iti timek ni Jehova no di ket siaagum a tinaraymo ti samsam+ ken inaramidmo ti dakes kadagiti mata ni Jehova?”+
20 Nupay kasta, ni Saul kinunana ken Samuel: “Ngem nagtulnogak+ iti timek ni Jehova ta napanak iti mision a nangibaonan kaniak ni Jehova ket inyegko ni Agag+ nga ari ti Amalek, ngem ti Amalek impaayko iti pannakadadael.+
21 Ket dagiti umili+ nagalada manipud samsam iti karkarnero ken bakbaka, ti kasayaatan kadakuada kas banag a naikeddeng iti pannakadadael, tapno isakripisioda+ ken Jehova a Diosmo idiay Gilgal.”+
22 Kinuna ni Samuel kalpasanna: “Ad-adda kadi a pakaragsakan ni Jehova dagiti daton a mapuoran+ ken sakripisio ngem ti panagtulnog iti timek ni Jehova? Adtoy! Ti panagtulnog+ nasaysayaat ngem iti sakripisio,+ ti panangipangag ngem iti taba+ dagiti kalakian a karnero;
23 ta ti kinarebelioso+ kas met laeng ti basol a panagpadles,+ ket ti panagtignay a sidudursok kas met laeng ti panagusar iti karkarna a pannakabalin ken terafim.+ Yantangay linaksidmo ti sao ni Jehova,+ ngarud isu laksidennaka iti kinaarim.”+
24 Kalpasanna ni Saul kinunana ken Samuel: “Nagbasolak;+ ta sinalungasingko ti bilin ni Jehova ken ti sasaom, agsipud ta nagbutengak kadagiti umili+ ket ngarud nagtulnogak iti timekda.
25 Ket ita, pangngaasim, pakawanem+ ti basolko ket makipagsublika kaniak tapno mairuknoyko+ ti bagik ken Jehova.”
26 Ngem ni Samuel kinunana ken Saul: “Saanakto a makipagsubli kenka, ta linaksidmo ti sao ni Jehova, ket laksidennaka ni Jehova iti panagtultuloymo nga ari iti Israel.”+
27 Idi timmallikud ni Samuel a pumanaw, dagus a ginammatanna ti pandiling ti awan manggasna a lambonna, ngem napisang.+
28 Gapu itoy kinuna kenkuana ni Samuel: “Pinisang ni Jehova+ ti naarian a panagturay ti Israel manipud kenka ita nga aldaw, ket sigurado nga itednanto dayta iti padam a tao a nasaysayaat ngem sika.+
29 Ket, malaksid iti dayta, ti Natan-ok Unay ti Israel+ saanto nga agulbod,+ ket saanto nga agbabawi, ta Isu saan a naindagaan a tao tapno agbabawi.”+
30 Gapu itoy kinunana: “Nagbasolak. Ita padayawannak,+ pangngaasim, iti sango ti lallakay dagiti kailiak ken iti sango ti Israel ket makipagsublika kaniak, ket sigurado nga iruknoykonto ti bagik ken Jehova a Diosmo.”+
31 Gapuna nagsubli ni Samuel a simmurot ken Saul, ket inruknoy ni Saul ti bagina ken Jehova.
32 Kalpasan dayta kinuna ni Samuel: “Iyasidegyo kaniak ni Agag nga ari ti Amalek.” Idin ni Agag agsarsarimadeng a napan kenkuana, ket rinugian a kunaen ni Agag iti bagina: “Pudno unay pimmanaw ti napait a kapadasan ti ipapatay.”
33 Nupay kasta, kinuna ni Samuel: “No kasano a ti kampilanmo+ inulilana dagiti babbai iti annak, iti kasta a wagas agbalinto ti inam+ a kangrunaan a naulila iti annak iti tengnga dagiti babbai.”+ Gapuna ni Samuel tinagbatagbatna a rinangrangkay ni Agag iti sango ni Jehova idiay Gilgal.+
34 Napan itan ni Samuel idiay Rama, ket ni Saul, iti biangna, simmang-at a napan iti bukodna a balay idiay Gabaa+ ni Saul.
35 Ket ni Samuel saannan a kinita ni Saul agingga iti aldaw ti ipapatayna, agsipud ta nagledleddaang ni Samuel+ gapu ken Saul. No maipapan ken Jehova, nagladingitanna ti panamagbalinna ken Saul nga ari iti Israel.+
