1 Samuel 6:1-21
6 Ket ti lakasa+ ni Jehova adda idi iti tay-ak dagiti Filisteo iti pito a bulan.
2 Ket dagiti Filisteo inayabanda ti papadi ken dagiti mammadles,+ a kunkunada: “Ania ti aramidenmi iti lakasa ni Jehova? Ipakaammoyo kadakami no ania ti rebbeng a pangpapanawmi a mapan iti lugarna.”
3 Iti daytoy kinunada: “No papanawenyo ti lakasa ti Dios ti Israel, dikay papanawen nga awanan daton, ta siguraduenyo koma a mangipaaykayo kenkuana iti daton gapu iti babak.+ Kalpasanna mapaimbagkayton, ket maipakaammonto kadakayo no apay a saan a pumanaw kadakayo ti imana.”
4 Gapu itoy kinunada: “Ania ti daton gapu iti babak a rebbeng nga isublimi kenkuana?” Idin kinunada: “Maitunos iti bilang ti aliado nga appo+ dagiti Filisteo, lima a nabalitokan a busigit ken lima a nabalitokan a jerbo, ta tunggal maysa kadakayo ken iti aliado nga appoyo addaan iti isu met laeng a pannaplit.
5 Ket masapul a mangaramidkayo iti ladladawan dagiti busigityo ken ladladawan dagiti jerboyo+ a mangdaddadael iti daga, ket masapul nga idayawyo+ ti Dios ti Israel. Bareng palag-anennanto ti imana manipud kadakayo ken iti diosyo ken iti dagayo.+
6 Kasta met, apay a pagbalinenyo nga awanan panagtignay ti pusoyo kas iti wagas a ti Egipto ken ni Faraon pinagbalinda nga awanan panagtignay ti pusoda?+ Saan kadi a pinapanawda ida apaman a nakilangen a siiinget kadakuada,+ ket napanda?+
7 Ket ita mangalakayo ken mangaramidkayo iti baro a kareson,+ ken dua a baka nga agpaspasuso, a saan pay a naparabawan iti sangol,+ ket masapul nga isingkawyo dagiti baka iti kareson, ket pagawidenyo dagiti urbonda manipud isusurot kadakuada.
8 Ket masapul nga alaenyo ti lakasa ni Jehova ket ikabilyo iti kareson, ket dagiti nabalitokan nga aruaten+ a masapul nga isubliyo kenkuana kas daton gapu iti babak+ rebbeng nga ikabilyo iti maysa a kahon iti sikiganna. Ket papanawenyonto, ket mapanto.
9 Ket kitaenyonto: no sumang-at iti dalan nga agturong iti teritoriana, iti Bet-semes,+ isu ti nangaramid kadatayo itoy dakkel a pakadaksan; ngem no saan, ammuentayto a saan a ti imana ti nangsagid kadatayo; maysa nga aksidente+ ti napasamak kadatayo.”
10 Ket kasta ti inaramid dagiti lallaki. Gapuna nangalada iti dua a baka nga agpaspasuso ket insingkawda ida iti kareson, ket dagiti urbonda impupokda iti pagtaengan.
11 Kalpasanna inkabilda ti lakasa ni Jehova iti rabaw ti kareson,+ ken kasta met ti kahon ken dagiti nabalitokan a jerbo ken ti ladladawan dagiti busigitda.
12 Ket nangrugi a magna dagiti baka nga agtartarus iti dalan nga agturong iti Bet-semes.+ Napanda iti maysa a kangrunaan a kalsada, nga agem-emmakda bayat a mapmapanda, ket saanda a simiasi iti makannawan wenno iti makannigid. Bayat dayta ti aliado nga appo+ dagiti Filisteo sumarsarunoda idi kadakuada agingga iti beddeng ti Bet-semes.
13 Ket dagiti umili ti Bet-semes agan-anida idi iti anien a trigo+ idiay nababa a tanap. Idi intangwada dagiti matada ket nakitada ti Lakasa, nagragrag-oda iti pannakakitada iti dayta.
14 Ket ti met laeng kareson dimteng iti talon ni Josue a Bet-semita ket nagintek sadiay, nga ayan ti dakkel a bato. Ket pinispisida ti kayo ti kareson, ket indatonda dagiti baka+ a kas mapuoran a daton ken Jehova.+
15 Ket dagiti met laeng Levita+ imbabada ti lakasa ni Jehova ken ti kahon a naikuyog iti dayta, nga ayan idi dagiti nabalitokan nga aruaten, ket inkabilda iti rabaw ti dakkel a bato. Ket dagiti tattao ti Bet-semes,+ iti biangda, nagidatonda iti datdaton a mapuoran, ket nagtultuloyda a nagidatag kadagiti sakripisio ken Jehova iti dayta nga aldaw.
16 Ket nakita dayta ti mismo a lima nga aliado+ nga appo dagiti Filisteo ket nagsublida idiay Ekron iti dayta nga aldaw.
17 Ita dagitoy ti nabalitokan a busbusigit nga insubli dagiti Filisteo kas daton gapu iti babak ken Jehova:+ agpaay iti Asdod+ maysa, agpaay iti Gaza+ maysa, agpaay iti Ascalon+ maysa, agpaay iti Gat+ maysa, agpaay iti Ekron+ maysa.
18 Ket dagiti nabalitokan a jerbo maitunosda iti bilang dagiti amin a siudad dagiti Filisteo a kukua ti lima nga aliado nga appo, manipud iti nasarikedkedan a siudad agingga iti purok ti nawayang nga away.
Ket ti dakkel a bato a nangiparabawanda iti lakasa ni Jehova maysa a saksi agingga itoy nga aldaw idiay talon ni Josue a Bet-semita.
19 Ket kinabilna dagiti lallaki ti Bet-semes,+ agsipud ta kinitada ti lakasa ni Jehova. Gapuna nangpapatay kadagiti umili iti pitopulo a lallaki—limapulo a ribu a lallaki—ket nangrugi a nagleddaang dagiti umili gapu ta kinabil ni Jehova dagiti umili iti dakkel a pananggudas.+
20 Kanayonanna, kinuna dagiti tattao ti Bet-semes: “Siasinonto ti makabael nga agtakder iti sango ni Jehova daytoy nasantuan a Dios,+ ket siasino ti pagturonganna iti ipapanawnanto kadatayo?”+
21 Kamaudiananna nangibaonda kadagiti mensahero a mapan kadagiti agnanaed idiay Kiriat-jearim,+ a kunkunada: “Insubli dagiti Filisteo ti lakasa ni Jehova. Sumalogkayo. Alaenyo nga isang-at kadakayo.”+
