1 Samuel 24:1-22
24 Ket naaramid nga, apaman a nagsubli ni Saul manipud panangsurot kadagiti Filisteo,+ immayda impadamag kenkuana, a kunkunada: “Adtoy! Adda ni David idiay let-ang ti En-gedi.”+
2 Ket nangala ni Saul iti tallo ribu a napili a lallaki+ manipud iti intero nga Israel ket napanna sinapul ni David+ ken dagiti tattaona kadagiti pangalbuen a bato dagiti kalding iti bantay.+
3 Iti kamaudiananna dimteng kadagiti bato a pakayaponan dagiti karnero iti igid ti dalan, nga ayan idi ti maysa a rukib. Gapuna simrek ni Saul tapno umibleng,+ bayat a ni David ken dagiti tattaona addada iti kaunegan a paspaset ti rukib,+ a situtugawda.
4 Ket dagiti tattao ni David rinugianda a kunaen kenkuana: “Adtoy ti aldaw nga iti dayta kuna kenka ni Jehova, ‘Adtoy! Iyawatko ti kabusormo ita imam,+ ket masapul nga aramidem kenkuana kas iti pagarupem a naimbag kadagita matam.’”+ Gapuna timmakder ni David ket siuulimek a gineppasna ti pandiling ti awan manggasna a lambon a kukua ni Saul.
5 Ngem naaramid kalpasanna a ti puso ni David nagtultuloy a nangriribuk+ kenkuana gapu ta gineppasna ti pandiling ti awan manggasna a lambon a kukua ni Saul.
6 Gapuna kinunana kadagiti tattaona: “Narigat a pagarupen, iti biangko, manipud panangmatmat ni Jehova, nga aramidek daytoy a banag iti apok, ti pinulotan+ ni Jehova, babaen ti panangyunnatko iti imak maibusor kenkuana, ta isu ti pinulotan ni Jehova.”+
7 Iti kasta pinagwawara ni David dagiti tattaona babaen kadagitoy a sasao, ket saanna a pinalubosan ida a tumakder maibusor ken Saul.+ No maipapan ken Saul, timmakder manipud iti rukib ket nagtultuloy a napan iti dalanna.
8 Gapuna timmakder ni David kalpasanna ket rimmuar manipud iti rukib ket nagpukkaw a simmurot ken Saul, a kunkunana: “Apok+ nga ari!” Gapu itoy timmaliaw ni Saul iti likudanna, ket nagrukob ni David a ti rupana dumanon iti daga+ ket inruknoyna ti bagina.
9 Ket ni David kinunana ken Saul: “Apay nga umimdengka iti sasao ti tao,+ a kunana: ‘Adtoy! Ikagkagumaan ni David ti pannakadangranmo’?
10 Adtoy nakita dagita matam itoy nga aldaw no kasano nga inyawatnaka ni Jehova ita nga aldaw iti imak iti rukib; ket adda nagkuna a papatayenka,+ ngem naasianak kenka ket kinunak, ‘Saankonto nga iyunnat ti imak maibusor iti apok, ta isu ti pinulotan+ ni Jehova.’
11 Ket, amak,+ kitaem, wen, kitaem ti pandiling ti awan manggasna a lambon iti imak, ta idi gineppasko ti pandiling ti awan manggasna a lambonmo saanka a pinatay. Ammuem ken kitaem nga awan ti kinadakes+ wenno iyaalsa iti imak, ket saanak a nagbasol maikaniwas kenka, bayat a padpadaanam ti kararuak tapno alaem.+
12 Mangukom koma ni Jehova iti nagbaetanta;+ ket ibalesannakto+ ni Jehova kenka, ngem saanto nga agdisso kenka ti bukodko nga ima.+
13 Kas iti kuna ti proverbio dagidi kadaanan, ‘Manipud kadagidiay nadangkes rummuarto ti kinadangkes,’+ ngem saanto nga agdisso kenka ti bukodko nga ima.
14 Siasino ti sinursurot ti ari ti Israel? Siasino ti kamkamatem? Ti maysa a natay nga aso?+ Ti maymaysa a timel?+
15 Ket masapul nga agbalin nga ukom ni Jehova, ket masapul a mangukom iti nagbaetanta, ket kitaennanto ken tamingennanto ti legal a kaso+ maipaay kaniak ket ukomennak tapno wayawayaannak ita imam.”
16 Ket naaramid nga, idi kanito a nalpas a sinao ni David dagitoy a sasao ken Saul, kinuna ni Saul: “Timekmo kadi daytoy, anakko a David?”+ Ket nangrugi nga ipigsa ni Saul ti bukodna a timek ket nagsangit.+
17 Ket kinunana ken David: “Nalinlintegka ngem siak,+ ta sika ti nagaramid kaniak iti naimbag,+ ket siak ti nagaramid kenka iti dakes.
18 Ket sika—imbagam ita nga aldaw no ania ti naimbag nga inaramidmo mainaig kaniak ta insukonak ni Jehova ita imam+ ket saannak a pinatay.
19 Ita iti kasasaad a ti maysa a tao masarakanna ti kabusorna, papanawennanto kadi iti nasayaat a dalan?+ Gapuna ni met laeng Jehova gunggonaannakanto iti naimbag,+ gapu iti kinapudno nga inaramidmo dayta kaniak itoy nga aldaw.
20 Ket ita, adtoy! pagaammok unay a, di bumurong, agturaykanto kas ari,+ ken sigurado nga agtalinaedto ita imam ti pagarian ti Israel.
21 Gapuna ita isapatam kaniak babaen ken Jehova+ a saanmonto a gessaten ti bin-ik iti kalpasak ken saanmonto a talipuposen ti naganko manipud iti balay ni amak.”+
22 Iti kasta ni David nagsapata ken Saul, a kalpasan dayta napan ni Saul iti pagtaenganna.+ No maipapan ken David ken dagiti tattaona, simmang-atda a napan iti lugar a narigat nga asitgan.+
