1 Samuel 19:1-24
19 Iti kamaudiananna ni Saul sinaona ken Jonatan nga anakna ken iti amin nga ad-adipenna ti panangpapatay ken David.+
2 No maipapan ken Jonatan, anak ni Saul, naragsakan iti napalalo ken David.+ Gapuna ni Jonatan imbagana ken David, a kunkunana: “Ikagkagumaan ni Saul nga amak a mapapataynaka. Ket ita agaluadka, pangngaasim, iti bigat, ket masapul nga agnaedka iti nalimed ket agtalinaedka a nakalemmeng.+
3 Ket siak, iti biangko, rummuarakto ket pudno unay nga agtakderak iti sibay ni amak idiay tay-ak nga ayanmonto, ket siak agsaoakto maipaay kenka ken amak, ket pudno unay a kitaekto no ania ti mapasamak, ket siguraduekto nga ibaga kenka.”+
4 Iti kasta ni Jonatan nagsao iti nasayaat+ ken Saul nga amana maipapan ken David ket kinunana kenkuana: “Saan koma nga agbasol ti ari+ maikaniwas iti adipenna a David, ta saan a nagbasol kenka ket nasayaat unay ti ar-aramidna kenka.+
5 Ket inkabilna ti kararuana iti dakulapna+ ket kinabilna ti Filisteo,+ iti kasta nangaramid ni Jehova iti dakkel a panangisalakan+ maipaay iti intero nga Israel. Nakitam dayta, ket nagrag-oka. Gapuna apay koma nga agbasolka maikaniwas iti awanan basol a dara iti panangpapataymo+ nga awan kapapay-anna ken David?”+
6 Idin nagtulnog ni Saul iti timek ni Jonatan, ket insapata ni Saul: “Kas sibibiag ni Jehova,+ isu saanto a mapapatay.”
7 Kalpasanna ni Jonatan inayabanna ni David ket imbaga kenkuana ni Jonatan amin dagitoy a sasao. Kalpasanna ni Jonatan inyegna ni David ken Saul, ket nagtultuloy iti sangona kas iti sigud.+
8 Idi agangay bimtak manen ti gubat ket rimmuar a dumarup ni David ket nakirupak kadagiti Filisteo ket kinabilna ida iti dakkel a pananggudas,+ ket nagtalawda iti sanguananna.+
9 Ket immay ken Saul ti dakes nga espiritu+ ni Jehova idi situtugaw iti balayna a ti pikana adda iti imana, bayat nga agtoktokar ni David babaen ti imana.
10 Iti kasta inkagumaan ni Saul a gayangen ni David a sumalpot iti diding+ babaen ti pika, ngem naglisi+ manipud sanguanan ni Saul, iti kasta naigayangna ti pika iti diding. Ket ni met laeng David nagtalaw tapno makapaglibas bayat dayta a rabii.+
11 Idi agangay nangibaon ni Saul kadagiti mensahero+ a mapan iti balay ni David tapno bantayanda dayta ken tapno isu mapapatayda iti bigat;+ ngem ni Mical nga asawana imbagana ken David, a kunkunana: “No saanmo a bay-an a makatalaw ti kararuam ita a rabii, inton bigat maysakanton a tao a napapatay.”
12 Dagus a pinaulog ni Mical ni David iti tawa, tapno makapan ken makataray ket aglibas.+
13 Kalpasanna innala ni Mical ti ladawan a terafim+ ket inkabilna iti sopa, ket nangikabil iti iket a dutdot ti kalding iti disso ti uluananna, a kalpasan dayta inabbonganna iti kawes.
14 Nangibaon ita ni Saul kadagiti mensahero a mangala ken David, ngem kinunana: “Isu masakit.”+
15 Gapuna imbaon ni Saul dagiti mensahero a kumita ken David, a kunkunana: “Iyegyo kaniak nga adda iti sopana tapno mapapatayko.”+
16 Idi simrek dagiti mensahero, ay ket, adda idi ti ladawan a terafim iti sopa ken ti maysa nga iket a dutdot ti kalding iti disso ti uluananna.
17 Gapu itoy ni Saul kinunana ken Mical: “Apay nga inallilawnak+ a kas itoy, iti kasta pinagtalawmo ti kabusorko+ tapno makapaglibas?” Kalpasanna ni Mical kinunana ken Saul: “Isu kinunana kaniak, ‘Pagtalawennak! Apay koma a papatayenka?’”
18 No maipapan ken David, nagtaray ket nakalibas+ ket nakagteng ken Samuel idiay Rama.+ Ket imbagana kenkuana ti isuamin nga inaramid kenkuana ni Saul. Kalpasanna isu ken ni Samuel pimmanawda, ket nagnaedda idiay Naiot.+
19 Idi agangay nakagteng ken Saul ti damag, a naikuna: “Adtoy! Adda ni David idiay Naiot sadi Rama.”
20 Madagdagus a nangibaon ni Saul kadagiti mensahero a mangala ken David. Idi nakitada dagidiay lallakay kadagiti mammadto nga agipadpadtoda, ket sitatakder ni Samuel iti saadna iti ngatuenda, immay ti espiritu+ ti Dios kadagiti mensahero ni Saul, ket nangrugida a nagtignay a kasla mammadto,+ isuda met.
21 Idi imbagada dayta ken Saul, dagus a nangibaon kadagiti sabali a mensahero, ket nangrugida a nagtignay a kasla mammadto, isuda met. Gapuna nangibaon manen ni Saul kadagiti mensahero, ti maikatlo a bunggoy, ket nangrugida a nagtignay a kasla mammadto, isuda met.
22 Kamaudiananna isu napan met idiay Rama. Idi nakagteng agingga iti dakkel a pagurnongan ti danum nga adda idiay Secu, rinugianna ti agimtuod ken agkuna: “Sadino ti ayan da Samuel ken David?” Iti daytoy kinunada: “Sadiay Naiot+ idiay Rama.”
23 Ket nagtultuloy iti dalanna manipud sadiay nga agturong idiay Naiot sadi Rama, ket naadda kenkuana ti espiritu+ ti Dios, wen, kenkuana, ket nagtultuloy a nagna ken intuloyna ti nagtignay a kasla mammadto agingga a nakagteng idiay Naiot sadi Rama.
24 Ket inuksobna met dagiti kawesna ket nagtignay, isu met, a kasla mammadto iti sango ni Samuel, ket nagidda a lamolamo iti intero dayta nga aldaw ken iti intero dayta a rabii.+ Dayta ti makagapu a kinunkunada: “Adda met kadi ni Saul iti tengnga dagiti mammadto?”+
