1 Samuel 23:1-29
23 Idi agangay immayda impadamag ken David, a kunkunada: “Adtoy dagiti Filisteo makigubgubatda iti Keila,+ ket kamkamkamenda dagiti pagirikan.”+
2 Ket ni David nagimtuod+ ken Jehova, a kunkunana: “Mapanak kadi, ket kabilekto dagitoy a Filisteo?” Kalpasanna ni Jehova kinunana ken David: “Mapanka, ket kabilemto dagiti Filisteo ket isalakanmo ti Keila.”
3 Gapu itoy dagiti tattao ni David kinunada kenkuana: “Adtoy! Mabutengtayo bayat nga addatayo ditoy Juda,+ ket anian a nakarkaro pay no kas pagarigan mapantayo idiay Keila a maibusor kadagiti linia ti bakal dagiti Filisteo!”+
4 Gapuna ni David kaskasdi a nagimtuod manen ken Jehova.+ Sinungbatan ita ni Jehova ket kinunana: “Tumakderka, sumalogka agingga idiay Keila, agsipud ta iyawatko dagiti Filisteo ita imam.”+
5 Iti kasta napan ni David idiay Keila agraman dagiti tattaona ket nakirupakda kadagiti Filisteo ket pinagtalawda ida agraman dinguenda, ngem kinabilda ida iti dakkel a pananggudas; ket nagbalin ni David a manangisalakan dagiti agnanaed iti Keila.+
6 Ita naaramid nga idi a nagtaray ni Abiatar+ nga anak ni Ahimelec agingga ken David idiay Keila, simmalog nga adda maysa nga efod+ iti imana.
7 Idi agangay naidanon ti damag ken Saul: “Immay ni David iti Keila.”+ Ket rinugian a kunaen ni Saul: “Isu inlako ti Dios iti imak,+ ta impupokna ti bagina babaen ti iyaayna iti siudad nga addaan ruruangan ken balunet.”
8 Gapuna pinaayaban ni Saul dagiti amin nga umili a mapanda iti gubat, tapno sumalogda agingga iti Keila, tapno lakubenda ni David ken dagiti tattaona.
9 Ket naammuan ni David a mangparpartuat ni Saul iti pannakadangran+ maibusor kenkuana. Gapuna kinunana ken Abiatar a padi: “Iyasidegmo ti efod.”+
10 Ket kinuna ni David: “O Jehova a Dios ti Israel,+ silalawag a nangngeg ti adipenmo nga ikagkagumaan ni Saul ti umay iti Keila tapno rebbekenna ti siudad maigapu kaniak.+
11 Dagiti agtagtagikua iti daga iti Keila isukodakto kadi iti imana? Sumalogto kadi ni Saul kas iti nangngeg ti adipenmo? O Jehova a Dios ti Israel, ibagam iti adipenmo, pangngaasim.” Iti daytoy kinuna ni Jehova: “Isu sumalogto.”+
12 Ket kinuna ni David: “Dagiti agtagtagikua iti daga iti Keila isukodakto kadi ken dagiti tattaok iti ima ni Saul?” Kinuna ni Jehova kalpasanna: “Isukodakanto.”+
13 Madagdagus a timmakder ni David agraman dagiti tattaona, agarup innem a gasut a tattao,+ ket pimmanawda iti Keila ket nagtultuloyda a nagna iti sadinoman a mabalinda a pagnaan. Ket naipadamag ken Saul a nagtalaw ni David idiay Keila, ket ngarud inidiannan ti mapan.
14 Ket nagnaed ni David iti let-ang kadagiti lugar a narigat nga asitgan, ket nagtultuloy a nagnaed iti nakabambantay a rehion idiay let-ang ti Zif.+ Ket isu kanayon a sinapsapul ni Saul,+ ket saan nga inyawat ti Dios iti imana.+
15 Ket nagtultuloy a sibubuteng ni David agsipud ta rimmuar ni Saul a mangsapul iti kararuana bayat nga adda ni David idiay let-ang ti Zif idiay Hores.+
16 Timmakder ita ni Jonatan nga anak ni Saul ket napan ken David idiay Hores, tapno mapapigsana+ ti imana maipapan iti Dios.+
17 Ket kinunana kenkuana: “Dika agbuteng;+ ta saannakanto a masarakan ti ima ni Saul nga amak, ket sika agarikanto+ iti Israel, ket siak agbalinakto a maikadua kenka; ket ni Saul nga amak ammona met nga agbanagto a kasta.”+
18 Kalpasanna isuda a dua namatalgedda iti tulag+ iti sango ni Jehova; ket nagtultuloy a nagnaed ni David idiay Hores, ket ni met laeng Jonatan napan iti bukodna a pagtaengan.
19 Idi agangay dagiti lallaki a taga Zif+ simmang-atda a napan ken Saul idiay Gabaa,+ a kunkunada: “Saan aya nga aglemlemmeng ni David+ iti asidegmi kadagiti lugar a narigat nga asitgan idiay Hores,+ iti turod ti Haquila,+ nga adda iti makannawan a deppaar ti Jesimon?+
20 Ket ita maitunos iti isuamin a panaggartem ta kararuam,+ O ari, a sumalog, sumalogka, ket ti biangmi isunto ti panangisuko kenkuana iti ima ti ari.”+
21 Gapu itoy kinuna ni Saul: “Benditonakayo ni Jehova,+ ta naasiankayo kaniak.
22 Mapankayo, pangngaasiyo, ad-adda a reggetanyo pay ket ammuenyo ken kitaenyo ti lugarna no sadino ti dumanonan ti sakana—siasinoman ti nakakita kenkuana sadiay—ta naikuna kaniak nga isu sigurado a nasikap.+
23 Ket kitaenyo ken ammuenyo maipapan kadagiti amin a paglemmengan a lugar a paglemmenganna; ket agsublikayto kaniak agraman ti pammaneknek, ket kumuyogakto kadakayo; ket mapasamakto a, no isu adda iti daga, birokekto met a siaannad iti amin a rinibu+ ti Juda.”
24 Gapuna timmakderda ket napanda iti Zif+ nga immun-una ngem ni Saul, bayat a ni David ken dagiti tattaona addada idiay let-ang ti Maon+ iti Araba+ iti agpaabagatan ti Jesimon.
25 Idi agangay dimteng ni Saul agraman dagiti tattao tapno isu sapulenda.+ Idi imbagada ken David, madagdagus a simmalog a napan iti napasdok a bato+ ket nagtultuloy a nagnaed idiay let-ang ti Maon. Idi nangngeg dayta ni Saul, kinamatna+ ni David iti let-ang ti Maon.
26 Iti kamaudiananna dimteng ni Saul iti daytoy a sikigan ti bantay, ket ni David ken dagiti tattaona addada iti dayta a sikigan ti bantay. Gapuna nagdardaras ni David a pumanaw+ gapu ken Saul; bayat dayta ni Saul ken dagiti tattaona al-alikubkobenda idi ni David ken dagiti tattaona tapno kemmegenda ida.+
27 Ngem adda mensahero nga immay ken Saul, a kunkunana: “Agganatka ket mapanka, ta dagiti Filisteo rinubbuotda ti daga!”
28 Iti kasta nagsubli ni Saul manipud panangkamatna ken David+ ket napanna sinango dagiti Filisteo. Dayta ti makagapu a pinanagananda dayta a disso iti Napasdok a Bato ti Panagsisina.
29 Kalpasanna simmang-at ni David manipud sadiay ket nagnaed kadagiti lugar a narigat nga asitgan idiay En-gedi.+
