1. Ano ang ginsiling ni David parte sa pagkamapainubuson ni Jehova?

MAPAINUBUSON gid man bala si Jehova? Huo. Si David nagsiling: “Ginaamligan mo ako paagi sa imo taming, kag ginapabantog ako sang imo pagkamapainubuson.” (2 Sam. 22:36; Sal. 18:35) Sang ginsulat ini ni David, mahimo ginahunahuna niya ang tion nga nagkadto si manalagna Samuel sa balay sang iya amay para haplasan ang masunod nga hari sang Israel. Si David ang kamanghuran sa walo ka lalaki, pero sia ang ginpili ni Jehova nga magabulos kay Hari Saul.—1 Sam. 16:1, 10-13.

2. Ano ang binagbinagon naton sa sini nga artikulo?

² Sigurado gid nga magakomporme si David sa ginsiling sang isa pa ka salmista parte kay Jehova: “Nagaduko sia sa pagtan-aw sa langit kag duta, ginapabangon niya ang kubos halin sa yab-ok. Ginapatindog niya ang imol . . . agod papungkuon sia upod sa mga dungganon.” (Sal. 113:6-8) Sa sini nga artikulo, una naton nga binagbinagon kon paano ginpakita ni Jehova ang pagkamapainubuson kag kon ano ang matun-an naton sa sini. Dayon binagbinagon naton kon ano ang matun-an naton kay Hari Saul, kay manalagna Daniel, kag kay Jesus.

3. Paano kita ginatamod ni Jehova, kag ano ang ginapakita sini?

³ Makita ang pagkamapainubuson ni Jehova sa iya pagtamod sa indi perpekto nga mga tawo nga nagasimba sa iya. Magluwas nga ginabaton niya ang aton pagsimba, ginakabig pa niya kita nga mga abyan. (Sal. 25:14) Si Jehova ang naghimo sing paagi para mangin abyan niya kita. Ginhatag niya ang iya Anak bilang halad-gawad sa aton mga sala. Maluluy-on gid si Jehova!

4. Ano ang ginhatag sa aton ni Jehova, kag ngaa?

 ⁴ Binagbinaga ang isa pa ka paagi nga ginapakita ni Jehova ang iya pagkamapainubuson. Bilang aton Manunuga, puede kuntani nga wala kita ginhatagan ni Jehova sang ikasarang nga magdesisyon kon ano ang gusto naton sa aton kabuhi. Pero wala niya ina ginhimo. Gintuga niya kita suno sa iya larawan kag ginhatagan niya kita sang ikasarang nga magdesisyon kon ano ang gusto naton nga himuon. Bisan pa daw indi kita salapakon kon ipaanggid kay Jehova, importante gid sa iya ang aton mga desisyon. Gusto niya nga alagaron naton sia bangod sang aton gugma sa iya kag bangod nagapati kita nga para sa aton kaayuhan ang pagtuman sa iya. (Deut. 10:12; Isa. 48:17, 18) Nagapasalamat gid kita kay mapainubuson si Jehova.

5. Paano kita ginatudluan ni Jehova nga mangin mapainubuson? (Tan-awa ang piktyur sa kober.)

⁵ Ginatudluan kita ni Jehova nga mangin mapainubuson paagi sa iya halimbawa. Si Jehova ang pinakamaalam nga Persona sa uniberso. Pero ginabaton niya ang panugda sang iban. Halimbawa, sang gintuga ni Jehova ang tanan nga butang, ginpabulig niya ang iya Anak. (Hulu. 8:27-30; Col. 1:15, 16) Kag bisan pa labing gamhanan si Jehova, ginahatagan niya sang responsibilidad ang iban. Halimbawa, gintangdo niya si Jesus nga mangin Hari sang Ginharian, kag hatagan Niya sang responsibilidad ang 144,000 ka tawo nga magagahom kaupod ni Jesus. (Luc. 12:32) Pat-od gid nga ginhanas ni Jehova si Jesus nga mangin Hari kag Mataas nga Saserdote. (Heb. 5:8, 9) Ginahanas man niya ang tanan nga kaupod ni Jesus nga magagahom para matuman nila ang ila asaynment, pero wala niya ginakontrol ang tanan nila nga hulag. Sa baylo, nagasalig sia nga himuon nila ang iya kabubut-on.—Bug. 5:10.

6-7. Ano ang matun-an naton sa aton Amay sa langit parte sa paghatag sang responsibilidad sa iban?

⁶ Kon ang aton Amay sa langit nagahatag  sang responsibilidad sa iban bisan pa indi niya kinahanglan ang bulig, indi bala nga dapat man naton ini himuon? Halimbawa, ulo ka bala sang pamilya ukon gulang sa kongregasyon? Iluga ang halimbawa ni Jehova paagi sa paghatag sang asaynment sa iban kag indi pagkontrola kon paano nila ginahimo ini. Kon ilugon mo si Jehova, matapos gid ang dapat himuon. Mahanas mo man ang iban kag madugangan ang ila kompiansa. (Isa. 41:10) Ano pa ang matun-an sang mga may responsibilidad sa halimbawa ni Jehova?

⁷ Ginapakita sang Biblia nga gusto mabal-an ni Jehova ang opinyon sang iya mga anghel. (1 Hari 22:19-22) Mga ginikanan, paano ninyo mailog ang halimbawa ni Jehova? Kon nagakaigo sa sitwasyon, pamangkuta ang inyo kabataan sang ila opinyon kon paano himuon ang isa ka ulubrahon. Kag kon maayo ang ila mga panugda, sunda ini.

8. Paano nangin mapinasensiahon si Jehova kay Abraham kag kay Sara?

⁸ Ginapakita man ni Jehova nga mapainubuson sia paagi sa iya pagkamapinasensiahon. Halimbawa, nangin mapinasensiahon si Jehova sa iya mga alagad nga nagkuestyon sa iya mga desisyon sing matinahuron. Ginpamatian niya ang mga ginakabalak-an ni Abraham sang nagdesisyon sia nga laglagon ang Sodoma kag Gomorra. (Gen. 18:22-33) Kag mapinasensiahon man si Jehova sa asawa ni Abraham nga si Sara. Wala sia naakig sang nagkadlaw si Sara sang mabatian niya ang promisa nga magabusong sia bisan tigulang na sia. (Gen. 18:10-14) Sa baylo, ginpakita niya nga naintiendihan niya si Sara.

9. Ano ang matun-an sang mga ginikanan kag mga gulang sa halimbawa ni Jehova?

⁹ Mga ginikanan kag mga gulang, ano ang matun-an ninyo sa halimbawa ni Jehova? Pamensara kon ano ang ginahimo mo kon wala nagakomporme ang imo kabataan ukon ang pila ka kauturan sa kongregasyon sa imo desisyon. Ginahambalan mo bala sila dayon nga indi nila dapat pagkuestyunon ang imo desisyon? Ukon ginatinguhaan mo bala nga hangpon ang ila opinyon? Maayo gid ang epekto sa mga pamilya kag mga kongregasyon kon ginailog sang mga ginikanan kag mga gulang si Jehova. Nabinagbinag na naton ang parte sa pagkamapainubuson ni Jehova kag kon ano ang matun-an naton sa sini. Binagbinagon naman naton ang pila ka halimbawa sa Biblia nga makabulig sa aton nga mangin mapainubuson.

10. Paano ginagamit ni Jehova ang halimbawa sang iban para tudluan kita?

¹⁰ Si Jehova amo ang aton “Daku nga Instruktor,” kag ginatudluan niya kita paagi sa mga halimbawa sa iya Pulong. (Isa. 30:20, 21) May matun-an kita kon pamalandungan naton ang mga kasaysayan sa Biblia sang mga tawo nga may maayo nga mga kinaiya, pareho sang pagkamapainubuson. May matun-an man kita sa natabo sa mga wala nagpakita sang sini nga mga kinaiya.—Sal. 37:37; 1 Cor. 10:11.

11. Ano ang matun-an naton sa indi maayo nga halimbawa ni Saul?

¹¹ Hunahunaa ang natabo kay Hari Saul. Sang pamatan-on pa sia, kabalo sia sang iya mga limitasyon kag daw indi pa gani niya pagbatunon ang dugang nga responsibilidad. (1 Sam. 9:21; 10:20-22) Pero sang nangin hari na si Saul, nangin bugalon sia kag ginhimo niya ang mga hilikuton nga wala sia sing kinamatarong nga himuon. Isa ka bes, tinak-an sia sa paghulat kay manalagna Samuel. Sa baylo nga magsalig nga buligan ni Jehova ang iya katawhan, naghalad si Saul sang halad nga sinunog bisan pa wala sia sing awtoridad nga himuon ini. Bangod sini, naakig si Jehova kay Saul kag ginsikway sia  bilang hari. (1 Sam. 13:8-14) Paandam gid sa aton ini nga halimbawa. Gani, indi gid naton paghimuon ang mga hilikuton nga wala kita sing kinamatarong nga himuon.

12. Ngaa isa ka maayo nga halimbawa si Daniel?

¹² Indi pareho kay Saul, maayo nga halimbawa si manalagna Daniel. Sa bilog nga kabuhi ni Daniel, mapainubuson gid sia nga alagad sang Dios kag pirme sia nagapagiya kay Jehova. Halimbawa, sang gingamit sia ni Jehova para ipaathag ang kahulugan sang damgo ni Nabocodonosor, wala nagsiling si Daniel nga sia ang dapat padunggan. Sa baylo, mapainubuson sia nga nagsiling nga si Jehova lang ang dapat dayawon kag padunggan. (Dan. 2:26-28) Ano ang matun-an naton sa sini? Kon nanamian ang mga kauturan sa aton pamulongpulong ukon may maayo kita nga mga eksperiensia sa ministeryo, dapat naton ihatag kay Jehova ang tanan nga kadungganan. Dapat naton batunon nga nahimo lang naton ini bangod ginbuligan kita ni Jehova. (Fil. 4:13) Kon himuon naton ini, ginailog man naton ang halimbawa ni Jesus. Ngaa masiling naton ini?

13. Ano ang matun-an naton sa ginsiling ni Jesus sa Juan 5:19, 30?

¹³ Nagsalig si Jesus kay Jehova bisan pa perpekto sia nga Anak sang Dios. (Basaha ang Juan 5:19, 30.) Wala gid niya gintinguhaan nga kuhaon ang responsibilidad sang iya Amay sa langit. Ang Filipos 2:6 nagasiling nga ‘wala maghunahuna si Jesus nga mang-agaw, buot silingon, nga mangin tupong sia sa Dios.’ Nahangpan ni Jesus nga may mga butang nga wala sia sing kinamatarong nga himuon kag nagpasakop sia sa awtoridad sang iya Amay.

14. Sang ginpangabay si Jesus nga himuon ang isa ka butang nga wala sia sing awtoridad, ano ang iya ginhimo?

¹⁴ Isa ka bes, ginpangabay si Jesus sang iya mga disipulo nga sanday Santiago kag Juan kag sang ila iloy nga hatagan sila sang pribilehiyo. Pero wala sing kinamatarong si Jesus nga ihatag ini. Ano ang iya ginhimo? Ginsilingan sila dayon ni Jesus nga ang iya lang Amay sa langit ang makadesisyon kon sin-o ang mapungko sa tuo kag sa wala ni Jesus sa Ginharian. (Mat. 20:20-23) Ginpakita ni Jesus nga kabalo sia nga may mga butang nga wala sia sing kinamatarong nga himuon. Kon wala sia ginhatagan ni Jehova sang awtoridad nga himuon ang isa ka butang, wala gid niya ini ginahimo. (Juan 12:49) Paano naton mailog ang halimbawa ni Jesus?

15-16. Paano naton iaplikar ang laygay sang Biblia sa 1 Corinto 4:6?

 ¹⁵ Ginailog naton ang halimbawa ni Jesus kon ginaaplikar naton ang laygay sang Biblia sa 1 Corinto 4:6. Nagasiling ini: “Indi kamo magsobra sa mga butang nga nasulat na.” Gani kon may nagapangayo sa aton sing laygay, indi gid naton dapat pag-ipilit ang aton opinyon ukon maglaygay lang dayon nga wala ini ginapamensaran. Sa baylo, dapat naton isiling kon ano ang ginalaygay sang Biblia kag sang aton mga publikasyon. Paagi sa sini, ginabaton naton nga wala naton nabal-an ang tanan. Ginapakita naton nga mapainubuson kita bangod ginabaton naton nga ang “matarong nga mga kasuguan” ni Jehova mas maayo gid sangsa aton opinyon.—Bug. 15:3, 4.

¹⁶ Magluwas nga gusto naton padunggan si Jehova, may iban pa nga mga rason kon ngaa dapat kita mangin mapainubuson. Binagbinagon naton kon paano ang pagkamapainubuson makabulig sa aton nga mangin malipayon kag mangin maayo ang aton kaangtanan sa iban.

17. Ngaa malipayon ang mga mapainubuson?

¹⁷ Kon mapainubuson kita, mas mangin malipayon kita. Ngaa? Kon ginabaton naton nga may pila ka butang nga indi naton masarangan nga himuon, magapasalamat gid kita sa bulig sang iban. Halimbawa, hunahunaa ang natabo sang gin-ayo ni Jesus ang napulo ka aruon. Isa lang sa ila ang nagbalik kay Jesus para pasalamatan sia sa pag-ayo niya sa ila sa sining makangilil-ad nga balatian. Mapainubuson ini nga tawo kay kabalo sia nga wala sia sing ikasarang nga ayuhon ang iya kaugalingon, gani nagpasalamat gid sia sa bulig ni Jesus. Bangod sini, ginhimaya niya ang Dios.—Luc. 17:11-19.

18. Paano ang pagkamapainubuson makabulig sa aton nga mangin maayo ang aton kaangtanan sa iban? (Roma 12:10)

 ¹⁸ Ang mga mapainubuson may maayo nga kaangtanan sa iban kag may suod sila nga mga abyan. Ngaa? May salig sila sa iban kay ginabaton nila nga may maayo man nga mga kinaiya ang iban. Nalipay sila kon nahimo sing maayo sang iban ang ila asaynment kag nagahatag sila dayon sang komendasyon kag ginapadunggan nila sila.—Basaha ang Roma 12:10.

19. Ngaa indi kita dapat mangin bugalon?

¹⁹ Ang mga bugalon nabudlayan maghatag sang komendasyon kay mas gusto nila nga sila ang dayawon. Ginakumparar nila ang ila kaugalingon sa iban kag gusto nila nga indi sila malabawan. Sa baylo nga hanason ang iban kag hatagan sila sang responsibilidad, masami nga nagasiling sila, “Kon gusto mo nga insakto ang pag-obra, ikaw mismo ang maobra.” Para sa ila, ang ila lang obra amo ang insakto. Gusto sang bugalon nga tawo nga mas importante sia sangsa iban, kag nahisa sia kon maayo ang hinimuan sang iban sangsa iya. (Gal. 5:26) Masami nga nagakadulaan sang abyan ini nga klase sang mga tawo. Kon matalupangdan naton nga may ara na kita sang bugal, dapat kita mangamuyo sing hanuot kay Jehova para buligan kita nga ‘bag-uhon ang aton panghunahuna’ kag madula naton ining malain nga kinaiya.—Roma 12:2.

20. Ngaa dapat kita mangin mapainubuson?

²⁰ Nagapasalamat gid kita sa halimbawa ni Jehova. Mapainubuson sia sa iya mga alagad kag gusto naton nga ilugon sia. Gusto man naton ilugon ang maayo nga halimbawa sang mapainubuson nga mga alagad ni Jehova nga mabasa sa Biblia. Kabay pa nga si Jehova ang pirme naton padunggan kag dayawon. (Bug. 4:11) Kon himuon naton ini, mangin abyan kita ni Jehova sing wala sing katapusan, bangod palangga niya ang mga mapainubuson.