Samuel Pahnihnak 9:1-13
-
Mefibosheth cung ah a fekmi dawtnak a langhter (1-13)
9 David nih “Saul chungkhar chung in a taangmi pakhatkhat an um ti maw? An um ahcun Jonathan sin ka biakam ning in an cung ah a fekmi dawtnak langhter ka duh” tiah a ti.
2 Saul chungkhar ah Ziba timi salpa pakhat a um. Anih cu David sinah an kalpi i “Ziba na si maw?” tiah a hal tikah “Ka si ko, ka bawipa” tiah a leh.
3 David nih “Saul chungkhar chung in a taangmi pakhatkhat an um ti maw? An um ahcun an cung ah Pathian ngeihmi a fekmi dawtnak langhter ka duh” tiah a ti tikah “Jonathan fapa pakhat cu a um ko, anih cu a ke hnih in a bei” tiah a leh.
4 “Khoika ah dah a um?” tiah a hal tikah Ziba nih “Lodebar khua i Ammiel fapa Makhir inn ah a um” tiah a leh.
5 Siangpahrang David nih Lodebar khua i Ammiel fapa Makhir inn ah mi a thlah colh hna i Mefibosheth cu a auhter hna.
6 Saul fapa Jonathan i a fapa Mefibosheth cu David hmai a phanhle cangka a kun i a bawk. David nih “Mefibosheth!” tiah a auh tikah “Chim ko, ka bawipa” tiah a ti.
7 David nih “Na thinphang hlah. Na pa Jonathan sin bia kaa kam ning in na cung ah a fekmi dawtnak ka langhter hrimhrim lai. Na pu Saul ta a simi lo vialte kha kaan pek ṭhan lai i ka cabuai ah rawl na ei zungzal lai” tiah a ti.
8 Cu tikah Mefibosheth cu a bawk ṭhan i “Uico a thimi bantuk men a simi na salpa hi ahodah ka si i ka zawn na ka ruah?” tiah a ti.
9 David nih Saul salpa Ziba cu a auh i “Na bawipa Saul le a chungkhar ta a simi thil vialte kha a tupa ka pek cang.
10 Nangmah, na fapale le na salle nih na bawipa tupa Mefibosheth cu lo nan ṭuanpiak lai. Theitlai nan zunpiak lai i a chungkhar ei awkah nan pek lai. Asinain Mefibosheth tu cu ka cabuai ah rawl a ei zungzal lai” tiah a ti.
Ziba cu fapa 15 le sal 20 a ngei.
11 Ziba nih “Ka bawipa siangpahrang, na ka fialmi ning in na salpa nih ka tuah lai” tiah a ti. Mefibosheth cu siangpahrang fapale lak i pakhat bantuk in David cabuai ah rawl a ei.
12 Mefibosheth nih Mika timi fapa pakhat a ngei. Ziba chungkharmi vialte cu Mefibosheth sal an hung si.
13 A ke hnih ning in a beimi Mefibosheth cu Jerusalem ah a um i siangpahrang cabuai ah rawl a ei zungzal.
