Samuel Pahnihnak 6:1-23
6 David nih Israel ram ah raldoh a thiam bikmi 30,000 kha a pumh hna.
2 Cu hnuah David le a mi pawl cu a hmaanmi Pathian biakamnak kuang va lak awkah Baale-judah khua ah an kal. Mi cu cherubim hna cung* ah a ṭhumi ralkapbu Bawipa Jehovah min auh in biakamnak kuang hmaiah thla an cam tawn.
3 A hmaanmi Pathian biakamnak kuang kha cawleng thar cung ah an chiah i tlang cung ah a ummi Abinadab inn in an kalpi. Abinadab fapale Uzzah le Ahio nih caw cu an hruai.
4 A hmaanmi Pathian biakamnak kuang kha tlang cung ah a ummi Abinadab inn in an rak phorh tikah Ahio cu kuang hmaiah a kal.
5 David le Israel mi vialte cu junipar thing in sermi ringawn tumnak a phunphun, tingtang, hri sihmi awdawh tumnak, khuangte, sumsel le a dang ringawn hna an tum i Jehovah hmaiah puai an tuah.
6 Nakon phuhri an rak phanh tikah caw ruang ah a hmaanmi Pathian biakamnak kuang cu a tla dengmang. Cucaah Uzzah nih a hei banh i a tlaih.
7 Cu tikah Jehovah thinhunnak cu Uzzah cung ah a alh. Upatnak a ngei lomi a tuahsernak ruang ah a hmaanmi Pathian nih dan a tat i biakamnak kuang pawng ah a thi.
8 Jehovah thinhunnak cu Uzzah cung ah a alh caah David cu a thin a hung. Cucaah mah hmun cu Perez-uzzah* tiah nihin ni tiang auh a si.
9 Mah ni ah David nih Jehovah kha a ṭih i “Jehovah biakamnak kuang cu ka khua ah zeitindah ka phorh khawh ti lai?” tiah a ti.
10 Jehovah biakamnak kuang kha a umnak David Khua ah kalpi a duh lo. Cucaah Gath mi Obed-edom inn ah a chiahter hna.
11 Jehovah biakamnak kuang cu Gath mi Obed-edom inn ah thla 3 a um. Jehovah nih Obed-edom le a chungkhar vialte kha thluachuah a pek hna.
12 “A hmaanmi Pathian biakamnak kuang a um caah Jehovah nih Obed-edom le amah ta a simi vialte thluachuah a pek” timi thawng kha David nih a theih. Cucaah a hmaanmi Pathian biakamnak kuang kha Obed-edom inn in David Khua ah lunglawm thanuam in a ratpi.
13 Jehovah biakamnak kuang a putu hna nih kar 6 an kar hnuah David nih cawtum pakhat le a thaumi saṭil pakhat kha rai a thawi.
14 David cu khiangraang tlangbawi angki aa hruk i Jehovah hmaiah lungtho, thatho in a laam.
15 David le Israel mi vialte cu saki tum pah in lunglawm, thanuam in an au i Jehovah biakamnak kuang cu an ratpi.
16 David Khua ah Jehovah biakamnak kuang an luhpi lioah Saul fanu Mikhal cu thlalang awng in khua a cuan. Siangpahrang David cu Jehovah hmaiah aa hlok i a laam len ko kha a hmuh tikah a lung chung in a nihsawh.
17 Jehovah biakamnak kuang cu David sakmi thlam chung ah an luhpi i a umnak ding hmun ah an chiah. Cun David nih khangh thawinak le hawikomhnak thawinak kha Jehovah hmaiah a pekchanh.
18 Khangh thawinak le hawikomhnak thawinak a pekchanh dih hnuah David nih mi kha ralkapbu Bawipa Jehovah min in thluachuah a pek hna.
19 Cun Israel mi vialte nu he, pa he changreu kual pakhat cio, tum thei nenmi thlar khat cio le mitsur car nenmi thlar khat cio a phawt hna. Cu hnuah mi cu anmahle an inn cio ah an ṭin.
20 David cu a chungkharmi pawl thluachuah pek ding in a rak ṭin tikah Saul fanu Mikhal cu amah don awkah a rak chuak i “Nihin ah a rianṭuantu bawi hna salnule hmaiah a thil aa phoihmi Israel siangpahrang cu upat awk ngai a va si dah! Thluak ngei lomi pa nih mi hmaiah a thil aa phoih bantuk a si” tiah a soi.
21 Cu tikah David nih Mikhal cu “Jehovah hmaiah puai ka tuahmi pei a si cu! Jehovah nih na pa le a chungkhar canah keimah hi a miphun Israel mi hruaitu ah a ka thim. Cucaah Jehovah hmaiah puai ka tuah awk a si ko lo maw?
22 Hi nakhmanh in kaa toidor deuh awk le kaa ṭhumh deuh awk a si. Asinain na chimmi salnu hna nih cun upatnak an ka pek lai” tiah a leh.
23 Saul fanu Mikhal cu a thih tiang fa a ngei lo.
