Samuel Pahnihnak 21:1-22
21 David chan ah kum thum chung i peh in mangṭam a tlun caah David nih Jehovah kha a hal. Cu tikah “Saul nih Gibeon khuami kha a rak thah hna caah amah le a chungkhar cung ah thisen chuah mawhnak a um” tiah Jehovah nih a ti.
2 Cucaah David nih Gibeon khuami cu a auh hna i bia a ruah hna. (Gibeon khuami cu Israel mi an si lo, Amor mi a taangmi an si. Kan in zuah ko hna lai tiah Israel mi nih chiatserh in bia an rak kamh hna nain Saul cu Israel mi le Judah mi bawmh awkah a lung a thawh tuk caah Gibeon khuami kha thah a duh hna.)
3 David nih “Mah sualnak hi zeitindah ka hloh khawh lai? Jehovah miphun caah* thluachuah nan hal khawh nakhnga zeidah kaan tuahpiak hna lai?” tiah a hal hna tikah,
4 Gibeon khuami nih “Saul le a chungkhar nih kan cung ah an tuahmi kha sui le ngun in rulh khawh a si lo. Cun kannih cu Israel ram ah mi thahnak nawl kan ngei fawn lo” tiah an ti. Cu tikah David nih “Nan ka halmi paoh kaan tuahpiak hna lai” tiah a ti hna.
5 Annih nih “Cu pa cu kanmah thah awk le Israel ram in kan phun ning in hloh awkah a rak i zuam.
6 Cucaah a fapa pasarih kha rak kan pe. An ruak kha Jehovah thimmi Saul a khua Gibeah ah Jehovah hmaiah kan thlai hna lai” tiah an ti tikah David nih “Kaan pek hna lai” tiah a leh hna.
7 Asinain David le Saul fapa Jonathan nih Jehovah hmaiah chiatserh in biakamnak an rak ser caah David nih Jonathan fapa Mefibosheth cung ah zaangfahnak a langhter.
8 Cucaah Aiah fanu Rizpah nih Saul a hrinpiakmi fapa pahnih Armoni le Mefibosheth kha a lak hna. Cun Saul fanu Mikhal* nih Meholath khuami Barzillai fapa Adriel a hrinpiakmi fapa panga zong kha a lak hna.
9 Cun Gibeon khuami cu a pek hna. An thah hna i an ruak kha Jehovah hmai tlang cung ah an thlai hna. Rawlṭuan caan a thawkka, barli ṭuan hram an thawkka ah an pasarih ning in hmunkhat ah thah an si.
10 Aiah fanu Rizpah nih buri puan kha a lak i lung cung ah a phah. Rawlṭuan caan a thawkka in van ruah a sur tiang cuka ah a um. Chun ah ruak cung ah va an i fut nakhnga lo le zan ah sahrang an rat nakhnga lo a kilven hna.
11 Aiah fanu, Saul nuchun Rizpah nih a tuahmi kha David cu an chimh.
12 Cu tikah Saul le a fapa Jonathan ruh kha Jabesh-gilead khua upa hna* sinah a va lak. Filistin mi nih Gilboa Tlang i Saul an rak thah ni ah Beth-shan khua chung tual ah an thlaimi Saul le a fapa Jonathan ruak kha Jabesh-gilead khuami nih an rak fir.
13 David nih Saul le Jonathan ruh kha a lak, tlang cung ah thlaimi hna ruh zong kha a pumhter hna.
14 Saul le Jonathan ruh kha Benjamin ram Zela khua i Saul a pa Kish thlan ah an vui. David chimmi ning in an tuah dih hnuah Israel mi nih an ram ca i an nawlnak kha Pathian nih a ngaihpiak hna.
15 Filistin mi le Israel mi hna karlak ah ral a tho ṭhan. David le a salle cu an va ṭum i Filistin mi kha an doh hna tikah David cu a ba tuk.
16 Shekel 300* a ritmi dar fei le vainam thar aa putmi Repha mi Ishbi-benob nih David cu thah a timh.
17 Zeruiah fapa Abishai nih David cu a rak bawmh colh i Filistin mipa cu a thah. Cu tikah David cu a mi hna nih “Kan sinah raltuknak ah na kal hrimhrim ti lai lo. Israel meiinn kha na hmih sual lai” tiin an thlauh.*
18 A hnuah Gob timi hmun ah Filistin mi he ral an i do ṭhan. Mah tan ah Hushah mi Sibbekai nih Repha mi Saph kha a thah.
19 Gob ah Filistin mi he ral an i do ṭhan. Bethlehem khuami Jaare-oregim fapa Elhanan nih Gath khuami Goliath kha a thah. Goliath i a fei fung cu thiam tlang tia a si.
20 Gath khua ah ral a tho ṭhan. Cuka ah Repha mi minganpi pakhat a um. Kutdong 6 veve, kedong 6 veve, a dihlak fonh ah 24 a ngei.
21 Mah pa nih Israel mi kha a zuamcawh lengmang hna caah David upa, Shimei fapa Jonathan nih a thah.
22 Mah pa pali cu Gath khua ah a ummi Repha mi an si i David le a mi hna kut in an thi.
