Samuel Pahnihnak 19:1-43
19 “Siangpahrang cu Absalom zun ngaih in a ṭap lengmang ko” tiah Joab cu an chimh.
2 Mi vialte nih siangpahrang cu a fapa kong ah a ngaih a chia tuk ti kha an theih caah mah ni ah an hmuhmi teinak cu ngaihchiatnak ah a cang.
3 Mah ni ah mi cu ral an sungh ruang ah ningzak ngai in a zammi bantuk in khua chung ah a thli tein an rak lut.
4 David cu a hmai aa khuh i “Ka fapa Absalom, ka fapa Absalom, ka fa!” tiin aw thangpi in a ṭap.
5 Cun Joab cu siangpahrang inn ah a va kal i “Nihin ah nangmah, na fale, na nupile le na nuchun hna nunnak a khamhtu na salle kha ningzah na thlaih cang hna.
6 Aan huatu kha na dawt hna i aan dawtu kha cu na huat hna. Na ralbawi hna le na salle cu na caah zeihmanh kan si lo ti kha nihin ah na langhter cang. Nihin ah kan dihlak in thi u sih law Absalom lawng hei nung seh law na caah a ṭha deuh lai ti kha ka hngalh cang.
7 Atu tho law na salle kha thape hna. Cutin na tuah lo ahcun tuzan na sinah ahohmanh an um ti lai lo ti kha Jehovah min chalh in ka chim ngam. Mah cu na no lioin atu tiang na tonmi harnak lakah a fak bikmi a si lai” tiah a ti.
8 Cucaah David cu a tho i khua hauka ah a va ṭhu. “Siangpahrang cu khua hauka ah a ṭhu” ti kha mi vialte nih an theih tikah a sinah an ra.
Asinain ral a sungmi Israel mi tu cu anmahle an inn cio ah an zam.
9 Israel phun vialte cu bia an i al i “Kan ral hna kut in a kan khamhtu cu siangpahrang a si, Filistin mi hna kut zong in a kan khamh. Asinain atu cu Absalom ruang ah ram kha a zamtak cang.
10 Kanmah uk awkah chiti kan thuhmi Absalom zong raltuknak ah a thi cang. Atu siangpahrang auh ṭhan loin zeicah kan um sawhsawh ko?” tiah pakhat le pakhat an i ti.
11 Siangpahrang David nih tlangbawi Zadok le Abiathar kha hitin bia a cah hna: “Judah upa hna sinah va kal u law ‘Israel mi hna bia cu ka umnak hmun ah a rak phan cang. Siangpahrang inn i keimah kirpi ṭhan awkah zeicah nan tlai?
12 Nannih cu ka unau nan si, ka thi le ka sa nan si. Cu a si ah siangpahrang a simi keimah hi auh ṭhan awkah zeicah nan tlai?’ tiah va ti hna u.
13 Cun Amasa kha ‘Nang cu ka thi le ka sa na si lo maw? Joab hmun ah ralbawi kaan ṭuanter lo ahcun Pathian nih ka cung ah dantatnak pakhat hnu pakhat in tlunter ko seh’ tiah nan va chimh lai.”
14 Cuticun David nih Judah mi vialte kha amahlei ah a ṭanter khawh dih hna. Annih nih “Siangpahrang, nangmah he, na salle vialte he rak kir ṭhan u” tiah bia an cah.
15 David cu a kir i Jordan Tiva ah a phan. Judah mi cu David don awk le Jordan Tiva tanpi awkah Gilgal ah an ra.
16 Bahurim khua i Benjamin mipa Gera fapa Shimei zong David ton awkah Judah pa pawl he khulrang in a rak ṭum ve.
17 A sinah Benjamin mi 1,000 zong an um. Saul innchungkhar salpa Ziba zong a fapa 15 le a sal 20 he siangpahrang hlanah Jordan Tiva ah khulrang in an rak ṭum ve.
18 Anih cu* siangpahrang chungkhar tiva tanpi awk le a duhmi paoh tuahpiak awkah ti puanhnak in ti cu a tan. Asinain Gera fapa Shimei tu cu siangpahrang nih Jordan Tiva a tan lai ah a hmaiah a kun i,
19 “Siangpahrang ka bawipa, ka sualnak hi ka ngaithiam ko. Jerusalem in na chuah ni ah na salpa nih na cung ah ka tuahmi palhnak kha ka philhpiak hram ko. Na lung chung ah chia ti hlah.
20 Na salpa nih ka sual cang ti kha ka hngalh. Cucaah nihin ah nangmah don awkah Josef chungkhar chung in ka rak phanh hmasa biknak a si” tiah a ti.
21 Cu tikah Zeruiah fapa Abishai nih “Shimei cu Jehovah chiti thuhmi kha chiat a rak serh caah a thih awk a si” tiah a ti colh.
22 Asinain David nih “Zeruiah fapa hna, keimah ralchanh in hi kong ah nan i thlak awk a si maw? Nihin ah Israel ram ah ahohmanh an thih awk a si lo. Zeicahtiah nihin ah Israel siangpahrang ka si ṭhan cang, a si ko lo maw?” tiah a ti.
23 Cun David nih Shimei cu “Na thi lai lo” tiah bia a kamh.
24 Saul tupa Mefibosheth zong David don awkah a rak ṭum ve. Anih cu siangpahrang a zam ni thawk in him tein a rak kir ni tiang a ke aa ṭawl lo, a khahmul aa riam lo, a thil zong a su lo.
25 A hnuah siangpahrang ton ding in Jerusalem i* a rat tikah David nih “Mefibosheth, zeicah ka sinah na rak kal ve lo?” tiah a hal.
26 Cu tikah Mefibosheth nih “Siangpahrang ka bawipa, ka salpa nih a rak ka rawi i a si. Kei cu a ke a beimi ka si caah ‘Laa kha kengdanh ka danhpiak law kaa cit lai i siangpahrang sinah ka kal ve lai’ tiah ka rak ti.
27 Ka salpa nih na sinah a ka thangchiat. Asinain siangpahrang ka bawipa, nang cu a hmaanmi Pathian vancungmi bantuk na si caah a ṭha na ti ning in tuah ko.
28 Siangpahrang ka bawipa nih ka pa innchungkhar vialte kha na thah khawh ko hna nain keimah hi na cabuai ah rawl einak nawl na ka pek. Cucaah siangpahrang sinah zeidah hal chapnak nawl ka ngeih ti lai?” tiah a ti.
29 Asinain David nih “Chim ti hlah. Nangmah le Ziba nih lo kha nan i cheu lai tiin bia ka khiah cang” tiah a ti.
30 Cu tikah Mefibosheth nih “A duh ahcun i lak dih ko seh. Atu ah cun siangpahrang ka bawipa cu inn ah him tein na rak phan ṭhan cang ko cu ta” tiah a ti.
31 Gilead rammi Barzillai cu David kha Jordan Tiva tiang thlah awkah Rogelim khua in Jordan Tiva ah a rak ṭum ve.
32 Barzillai cu kum 80 a si cang i a tar ngaingai cang. Anih cu a rum ngaimi a si i David Mahanaim khua a um lioah tirawl a rak pek.
33 David nih Barzillai cu “Keimah he khattalei ral ah kal ve law Jerusalem ah ka cabuai ah na ei ve lai” tiah a ti.
34 Asinain Barzillai nih “Siangpahrang he Jerusalem i ka kal hmanh ah kum zeizat dah ka nun chap hlei ti lai?
35 Kei cu kum 80 ka si cang. A ṭha le ṭhalo ka thleidang kho ti lo, eidin a thawtnam ka thei kho ti lo. Salnu, salpa hna hlasak thawng zong ka thei kho ti lo. Cucaah siangpahrang, na caah thilrit lehlam ka si lai.
36 Hi bantuk laksawng hi pek ka hau ti lo. Jordan Tiva tiang kaan thlah khawhmi hi kaa lungsak cang ko.
37 Ka khua ah ka kirter ko. Ka nu le ka pa vui an sinak hmun ah thi ve ko ning. Asinain hika ah na salpa Chimham a um ko. Amah hi i kalpi law a ṭha na ti ning paoh in tuahpiak ko” tiah a ti.
38 Cu tikah David nih “Chimham kha kaa kalpi lai. A ṭha na ti ning in a caah ka tuah lai, na ka halmi paoh ka tuah lai” tiah a ti.
39 Cun mi vialte nih Jordan Tiva cu an tan. Siangpahrang nih a kal lai ah Barzillai cu a hnamh i thluachuah a pek. Cu hnuah Barzillai cu inn ah a kir.
40 David nih tiva kha a tan i Gilgal lei a kal tikah Chimham nih a zulh. Judah mi vialte le Israel mi hnarcheu nih David kha tiva cu an tanpi.
41 A taangmi Israel mi hna cu siangpahrang sinah an ra i “Zeicah kan unau Judah mi nih an in fir i nangmah, na innchungkhar le na mi vialte he Jordan Tiva kha tan in an in ratpi hna?” tiah an ti.
42 Judah mi nih “Siangpahrang cu kan rualchan pei a si cu. Kan cung ah zeicah nan thin a hun? Siangpahrang nih rawl siseh, laksawng siseh zeihmanh a kan pek ṭung lo” tiah an leh hna.
43 Israel mi nih Judah mi kha “Kannih cu phun 10 kan si. Cucaah siangpahrang David he aa tlaiin nanmah nakin tuahnak nawl tam deuh kan ngei. Zei ruang ah dah zeirel loin nan kan pehtlaih? Siangpahrang a kirpi hmasa biktu ding cu kanmah kan si awk a si” tiah an ti hna. Asinain Judah mi hna bia nih Israel mi hna bia kha a tei.
