Samuel Pahnihnak 3:1-39
3 Saul innchungkhar le David innchungkhar cu caan saupi ral an i do. David cu a ṭhawng chin i Saul chungkhar tu cu an ṭumchuk thluahmah.
2 Hebron in a uk lioah David nih fapa a ngeih hna. A fater cu Amnon a si i a nu cu Jezreel khuami Ahinoam a si.
3 A pahnihnak cu Khileab a si i a nu cu Nabal nupi a rak si balmi Karmel khuami Abigail a si. A pathumnak cu Absalom a si i a nu cu Geshur siangpahrang Talmai fanu Maakah a si.
4 A palinak cu Adonijah a si i a nu cu Haggith a si. A panganak cu Shefatiah a si i a nu cu Abital a si.
5 A paruknak cu Ithream a si i a nu cu Eglah a si. Annih cu David nih Hebron ah a ngeihmi an si.
6 Saul innchungkhar le David innchungkhar an i doh chung ah Abner nih Saul innchungkhar ah a nawlngeihnak kha a ṭhawnter chin.
7 Saul nih Aiah fanu Rizpah timi nuchun a rak ngei. Ishbosheth nih Abner kha “Zeicah ka pa nuchun cu na ihpi?” tiah a ti.
8 Ishbosheth bia ruang ah Abner cu a thin a hung tuk i “Judah ram i uico fihnung ah maw na ka ruah? Kei nih cun na pa Saul chungkhar le a unau le a hawile cung ah nihin ni tiang a fekmi dawtnak ka langhter. Nangmah zong kaan rawi lo i David kut ah kaan chaan lo. Atu nu pakhat ruang ah maw sual na hei ka phawt?
9 Jehovah nih bia a kamh ning in David caah ka tuah lo ahcun Pathian nih keimah Abner cung ah dantatnak pakhat hnu pakhat in tlunter ko seh.
10 Pennak kha Saul chungkhar sinin ka lak lai i David bawiṭhutdan kha Dan in Beersheba tiang Israel ram le Judah ram ah ka fehter lai tiin Pathian nih chiat a ser” tiah a ti.
11 Ishbosheth nih Abner kha a ṭih caah kaa khat hmanh a let ngam lo.
12 Abner nih David sinah lamkal a hei thlah colh hna i “Ram cu aho ta dah a si? Keimah he biakamnak ser law Israel mi vialte nangmah lei an ṭan nakhnga ka tuah khawhmi zeipaoh ka tuah lai” tiah a ti.
13 Cu tikah David nih “A ṭha! Nangmah he biakamnak ka ser lai. Asinain thil pakhat hal kaan duh. Keimah ton awk i na rat tikah Saul fanu Mikhal kha na rak ratpi lai. Cu lo ahcun na ka tong kho lai lo” tiah a ti.
14 David nih Saul fapa Ishbosheth sinah lamkal a thlah hna i “Filistin mi 100 cuarpar in ka rak ṭhitmi ka nupi Mikhal kha rak ka pe” tiah bia a cah.
15 Cucaah Ishbosheth nih mi a hei thlah hna i Mikhal cu a vapa a simi, Laish fapa Palti sinin a va auhter hna.
16 Asinain a vapa nih a ṭah buin Bahurim tiang a rak zulh. Cucaah Abner nih “Va kir cang!” tiah a ti i a kir.
17 Abner nih Israel upa hna sinah mi a hei thlah hna i “A hmasa lio tein David kha siangpahrang ṭuanter nan duh, a si lo maw?
18 Atu ṭuanter cang ngat u. Jehovah nih ‘Ka sal David kha hmang in ka miphun Israel mi kha Filistin mi le an ral hna kut in ka khamh hna lai’ tiin David sinah a chim cang” tiah bia a cah hna.
19 Abner nih Benjamin mi zong kha a chimh hna. Cun Israel mi le Benjamin phun an hna a tlaknak kong pumpak in David chimh awkah Hebron khua ah a va kal.
20 Abner le a mi 20 cu Hebron khua an phanh tikah David nih rawl danghnak puai a tuahpiak hna.
21 Abner nih “Siangpahrang ka bawipa, Israel mi vialte nangmah he biakamnak an ser nakhnga ka va pumh hna lai. Cuticun siangpahrang nih na duh ning in Israel mi vialte kha na uk khawh hna lai” tiah David cu a ti. Cucaah David nih a thlah i Abner cu him tein a kir.
22 Cu lioah Joab le David salle cu raldohnak in an rak kir i hranchaw tampi an rak phorh. Abner tu cu Hebron ah a um ti lo. Zeicahtiah David nih a thlah ṭhan caah him tein a kir cang.
23 Joab cu ralkap pawl he an rak phanh tikah “Ner fapa Abner cu siangpahrang sinah a ra. Asinain siangpahrang nih a thlah ṭhan caah him tein a kir cang” tiah an chimh.
24 Joab cu David sinah a va kal i “Zei thil dah na tuah? Abner na sinah a ra nain zeicah na thlah ṭhan? A luat cang hih!
25 Ner fapa Abner kong cu na hngalh ko cu ta. Nangmah hlen awkah le na cawlcangh ning le zeidah na tuah ti ngiat awkah a ratmi pei a si cu” tiah a ti.
26 Joab cu David sinin a chuak i Abner auh ṭhan awkah mi a hei thlah hna. Annih nih Abner cu Sirah tikhor in an rak kirpi ṭhan. Mah kong kha David nih a hngal lo.
27 Abner cu Hebron khua a phanh tikah an pahnih lawng in biaruah awkah Joab nih hauka chunglei kam ah a kalpi. Cuka ah Abner cu a paw ah nam in a sawh i a thi. Cutin a tuahmi cu a nau Asahel kha a rak thah caah teirul cham awkah a si.
28 A hnuah David nih mah kong kha a theih i hitin a ti: “Keimah le ka pennak cu Ner fapa Abner thisen chuah mawhnak in kan luat hrimhrim ti kha Jehovah nih a hngalh.
29 Thisen chuah mawhnak cu Joab le a pa innchungkhar cung ah tla ko seh. Joab chungkhar lakah a chiaṭha in a bangmi hang a chuakmi pa, thinghmui zawtnak a ngeimi, la a thlurmi pa,* vainam in a thimi le a ṭamhalmi um zungzal ko hna seh.”
30 Joab le a u Abishai nih Abner kha an thah. Zeicahtiah Gibeon i raldohnak ah an nau Asahel kha Abner nih a rak thah caah a si.
31 David nih Joab le mi vialte kha “Nan angki thlek u. Buri puan i aih u law Abner kha ṭah u” tiah a ti hna. Cun amah theng ruak phorhnak laang hnu khan a zulh.
32 Abner cu Hebron ah an vui. Siangpahrang cu Abner thlan ah aw thangpi in a ṭap. Mi vialte zong an ṭap ve.
33 Siangpahrang David nih Abner caah hitin ṭah hla a lawh:
“Abner cu khuaruah khawhnak a ngei lomi bang in maw a thih ko?
34 Na kut cu ṭem an si lo,Na ke zong cikcin khih an si lo.
Misual nih thahmi bantuk in na thi ai cang.”
Cun mi vialte cu an ṭap ṭhan.
35 A hnuah mi cu David hnemh awkah an ra i khua a muih hlanah a ei awk rawl an rak put. Asinain David nih “Ni a tlak hlanah pakhatkhat ka ei ahcun Pathian nih ka cung ah dantatnak pakhat hnu pakhat in tlunter ko seh” tiah chiat a ser.
36 Mah kha mi nih an theih tikah an lung a si ngaingai. David nih zei a tuah paoh ah mi cu an lung a tling.
37 Ner fapa Abner thihnak kong ah David cu ṭuanvo a ngei lo ti kha cu ni ah a mi pawl le Israel mi vialte nih an hun hngalh.
38 Cu hnuah siangpahrang David nih a salle kha “Nihin cu Israel ram i mi lianngan le bawi pakhat a thih ni a si.
39 Kei cu siangpahrang in chiti thuh ka si nain atu cu ka tha a der. Zeruiah fapale cu an puarhrang tuk. Jehovah nih thil ṭhalo a tuahtu cu a ṭhatlonak ning in cham ko seh” tiah a ti.
Footnotes
^ Pum tlamtlin lo ruang ah nu rian a ṭuanmi pa kha a chim duhmi a si kho men.
