Samuel Pahnihnak 13:1-39
13 David fapa Absalom cu Tamar timi aa dawh ngaimi farnu pakhat a ngei. David fapa Amnon nih Tamar cu a duh.
2 Amnon cu ngaknu thiang a simi a farnu Tamar cung ah a duhnak tlinter awkah zeihmanh tuah khawh dawh a si lo caah a lung a rawk tuk i a um a nuam lo.
3 Amnon cu Jehonadab timi hawi pakhat a ngei. Anih cu David upa Shimeah fapa a si i a fimzer ngai.
4 Jehonadab nih “Siangpahrang fapa na si nain zeicah nifatin na hmai naa chiat ko? Rak ka chim tuah!” tiah a ti tikah Amnon nih “Ka nau Absalom farnu Tamar kha ka duh caah a si” tiah a leh.
5 Jehonadab nih “Na ihnak ah it law i zawtter. Na pa nih aan rak zoh tikah ‘Zaangfahnak in ka farnu Tamar kha rak thlah law amah theng nih ka hmaiah mizaw rawl ka chuanpiak seh law a ka pekmi kha ka ei lai’ tiin hal chunh te” tiah ruahnak a cheuh.
6 Cucaah Amnon cu a it i aa zawtter. Siangpahrang nih a rak zoh tikah “Zaangfahnak in ka farnu Tamar kha rak thlah law ka mithmuh ah changreu pahnih* in ser seh law a ka pekmi kha ka ei lai” tiah a ti.
7 David nih inn ah a ummi Tamar kha “Na ṭa Amnon inn ah va kal law ei awk va timhpiak” tiah bia a cah.
8 Cucaah Tamar cu a ṭa Amnon inn ah a va kal. Mah lioah Amnon cu a rak it ko. Tamar nih changvut kha a lak, a nawn i a ṭa mithmuh ah changreu cu a reu.
9 Cun changreu cu a chuah i Amnon cu a hunh. Asinain Amnon nih a ei duh lo i mi kha “Chuak dih u!” tiah nawl a pek hna tikah an chuak dih.
10 Amnon nih Tamar cu “Changreu kha ihnak khaan ah rak pu, na ka tuhmi kha ei ka duh” tiah a ti. Cucaah Tamar nih a sermi changreu cu ihnak khaan ah a ummi a ṭa Amnon sinah a put.
11 Changreu a rak put tikah Amnon nih a tlaih i “Ka far, ra law rak it ve” tiah a ti.
12 Asinain Tamar nih “Ka ṭa, a si kho lo. Ningzah rak ka thlaih hlah. Israel phun lakah hi bantuk thil hi tuah phung a si lo. Hi bantuk aa dawhcah lomi thil hi tuah hlah.
13 Ningzahnak cu zeitindah ka in khawh lai? Nang zong Israel mi lakah zah hngal lomi pa in hmuh na si lai. Cucaah siangpahrang kha chim law nangmah vat cu a ka thlauh lai lo” tiah a nawl.
14 Asinain Amnon nih Tamar chimmi kha a ngai duh lo. A thazaang a ṭhawn deuh caah hramhram in a ihpi i ningzah a thlaih.
15 Cutin a ihpi hnuah Amnon nih Tamar cu a huat tuk ṭhan. A huatnak cu a hmasa a rak duhnak nakin a fah deuh caah “Tho law kal zokzok!” tiin a ṭhawl.
16 Tamar nih “Ka ṭa, cutin tuah hlah, atu bantuk in na ka ṭhawlmi hi na ka ihpimi nakin a ṭha lo deuh” tiah a nawl nain a ngai duh lo.
17 Cun a salpa te kha a auh i “Mah minu hi ṭhawl law innka kha hrenh!” tiah nawl a pek.
18 (Tamar cu ngaknu thiang a simi siangpahrang fanu nih an i hruk tawn bang in dawh tein ṭamhmi angki fual kha aa hruk.) Amnon salpa nih leng ah a chuahter i innka cu a hrenh.
19 Tamar cu a lu cung ah vutcam aa phulh, aa hrukmi angki fual kha a thleh, a lu cung ah a kut a chuan i a ṭah buin a kal.
20 Cu tikah a ṭa Absalom nih “Na ṭa Amnon nih maw aan ihpi? Ka far, mah kong hi ahohmanh chim hna hlah. A ruah zong ruat tuk hlah. Amnon cu na ṭa pei a si cu” tiah a ti. Cucaah Tamar cu aho he hmanh i komh ti loin a ṭa Absalom inn ah cun a um.
21 Mah kong vialte kha siangpahrang David nih a theih tikah a thin a hung tuk. Asinain Amnon cu a fater a si i a dawt tuk caah a lung fahter a duh lo.
22 Absalom nih a far Tamar ningzah a thlaihtu Amnon kha a huat. Asinain Amnon cung ah bia ṭha siseh, bia ṭhalo siseh kaa khat hmanh a chim lo.
23 Kumhnih a rauh hnuah Absalom nih Efraim khua pawng Baal-hazor ah tuuhmul mehnak puai a tuah i siangpahrang fapale vialte kha a sawm hna.
24 Absalom cu siangpahrang sinah a kal i “Tuuhmul mehnak puai ka tuah lai. Zaangfahnak in nangmah le na salle zong nih rak ka telpi ve u” tiah a sawm.
25 Asinain siangpahrang nih “Um ko seh, ka fapa. Kan dihlak in kan rat ahcun na caah thilrit kan si sual lai” tiah a ti. Absalom nih a sawm chih nain a duh lo i thluachuah tu a pek.
26 Absalom nih “Nangmah na rat lo hmanh ah ka u Amnon cu ratter ko” tiah a ti tikah siangpahrang nih “Zeicah Amnon cu ratter na duh?” tiah a hal.
27 Asinain Absalom nih a nawl chih caah Amnon le a dang a fapale vialte kha a kalter hna.
28 Absalom nih a salle cu “Amnon kha ngia u law mitsur zu ruang ah lungnuam ngai in a um lioah ‘Amnon kha that u!’ tiah nawl kaan pek hna lai i nan rak thah lai. Keimah nih nawl kaan pekmi hna a si caah ṭih hlah u. Nan lung ṭhawng u law nan ralṭha ko u” tiah a ti hna.
29 Cucaah a salle nih Absalom nawl peknak ning in Amnon cu an thah. Mah tikah a dang siangpahrang fapale vialte cu an laa kha an i cit i an zam.
30 Lam i an um lioah “Absalom nih siangpahrang fapale vialte kha pakhat hmanh taang loin a thah dih hna” timi thawng kha David nih a theih.
31 Cu tikah siangpahrang cu a tho, a angki kha a thleh i ṭuang ah a ril. A salle vialte zong nih an angki kha an thleh ve i an dir.
32 Asinain David upa, Shimeah fapa Jehonadab nih “Ka bawipa, siangpahrang fapale vialte cu thah an si tiah ruat hlah. Amnon lawng thah a si, mah cu Absalom nawl peknak ruang ah a si i Amnon nih a far Tamar kha ningzah a thlaih ni thawk in cutin tuah awkah bia a rak khiah cang.
33 Cucaah ka bawipa, ‘Siangpahrang fapale vialte an thi’ timi thawng kha zum hlah; a thimi cu Amnon lawng a si” tiah a ti.
34 Mah lioah Absalom cu a rak zam diam cang. Cun khuavengtu cu hnulei a hei zoh tikah tlanglei kalnak lam ning in mi tampi an rak ratmi kha a hmuh.
35 Jehonadab nih siangpahrang cu “Zoh hmanh! Na salpa nih ka chim bantuk in na fapale cu an rak kir cang” tiah a ti.
36 Cutin a chim dihle cangka siangpahrang fapale cu an rak phan i aw thangpi in an ṭap. David le a salle vialte zong fakpi in an ṭap.
37 Asinain Absalom cu Geshur siangpahrang Ammihud fapa Talmai sinah a zam. David nih a fapa cu ni tampi chung a ṭah.
38 Cuticun Absalom cu Geshur ram ah a zam i cuka ah kum thum chung a va um.
39 A donghnak ah siangpahrang David nih Amnon a thihmi cung ah aa lungsak deuh i Absalom kha hmuh a hun duh tuk.
Footnotes
^ A hrampi, “lungthin pungsan changreu pahnih.”
