Samuel Pahnihnak 23:1-39
23 Mah hi David nih hmanung bik a phuahmi hla a si:
“Kei cu Jesse fapa David ka si,Cunglei ah hlorh a simi pa,Jakob Pathian nih chiti a thuhmi,Israel mi hna hla kha aw dawh ngai in a satu ka si.
2 Jehovah thlarau nih keimah hmang in bia a chim;A bia cu ka lei ah a um.
3 Israel Pathian nih a chim;Israel Lungpi nih ka sinah a chim:
‘Minung a uktu cu miding a si i,Pathian ṭihzah buin a uk ahcun,
4 A uknak cu minmei a thian lio le,Ni a tlan lio i zingka ceunak bantuk a si.
Vawlei in ramhring a khohtertu,Ruah a sur dihka i ceunak bantuk a si.’
5 Ka chungkhar uknak cu Pathian hmaiah cutin a si.
Keimah he zungzal biakamnak kha a ser,A dikthliar in a timhtuah i a fehter.
Mah biakamnak cu ka caah khamhnak tling le kaa lawmh biknak a si,Cucaah ka chungkhar kha a ṭhanchoter.
6 Mi zei ruaram lo cu hlingbur bantuk in hlonh an si,Hlingbur cu kut in lak khawh a si lo.
7 Hlingbur lak tikah,Thir le fei fung hman a hau,Hlingbur cu an khohnak hmun ah khangh dih cikcek awk a si.”
8 David i a ṭhawngmi ralkap pathum lakah pakhat cu Takhemon mi Josheb-basshebeth a si. Anih cu an pathum lakah haotu a si. Voi khat cu a fei kha hmang in mi 800 a thah hna.
9 Amah a changtu cu Ahohi fapa Dodo i a fapa Eleazar a si. Israel mi doh awkah Filistin mi an rak i pumh tikah David a miṭhawng pathum nih an zuamcawh hna. An lakah Eleazar zong aa tel ve. Israel mi cu an zam tikah,
10 Eleazar cu a dir i vainam kha fek tein aa tlaih. Filistin mi kha a ban tha a dih i a kut a fah tiang a thah hna. Cucaah Jehovah nih mah ni ah teinak nganpi a pek hna. Mi nih Eleazar hnu kha an zulh i a thimi hna an thilri kha an i lak.
11 Amah a changtu cu Harar mi Agi fapa Shammah a si. Filistin mi cu Lehi ah an i pum, cuka ah khat lakin pe an cinnak lo a um. Filistin mi hna ruang ah Israel mi an zam dih tikah,
12 Shammah cu lo laifang ah a dir i lo cu a ven. Filistin mi kha a thah thluahmah hna. Cucaah Jehovah nih teinak nganpi a hmuhter hna.
13 Rawlṭuan caan chung ah haotu 30 lak i pathum cu Adullam lungkua ah a ummi David sinah an kal. Filistin ralkapbu cu Repha Horkuang ah riahhmun an khuar.
14 Mah lioah David cu ralhruang chung ah a um i Filistin khuavengtu ralkapbu tu cu Bethlehem khua ah an um.
15 David nih “Bethlehem khua hauka pawng i a ummi tikhor ti kha din ka hei duh dah!” tiah ngai ruangmang in a ti.
16 Cucaah a ṭhawngmi ralkap pathum nih Filistin riahhmun kha tan in Bethlehem khua hauka pawng i tikhor ti kha an va than. Asinain an rak putmi ti kha David nih a ding duh lo i Jehovah hmaiah a thlet.
17 Cun David nih “Maw Jehovah, an thanmi ti din ding cu a ruah hmanh ka ruat ngam lo. An nunnak thap in a kalmi hna an thi cu ka din awk a si maw?” tiah a ti i a ding duh lo. Mah thil vialte cu David a miṭhawng pathum nih an tuahmi thil a si.
18 Zeruiah fapa Joab a upa Abishai cu a dang miralṭha pathum lakah haotu a si. A fei kha hmang in mi 300 a thah hna. Anih zong a hmasa miṭhawng pathum bantuk in a min a thang ve.
19 Anih cu miralṭha pathum lakah a laar bikmi le an haotu a si nain a hmasa miṭhawng pathum kha cu a tluk hna lo.
20 Jehoiada fapa Benaiah zong miralṭha a si ve i Kabzeel khua ah thil lianngan tampi a tuah. Anih nih Moab mi Ariel fapa pahnih kha a thah hna. Hawhra a tlak ni ah khor chung ah a ṭum i chiandeih pakhat kha a thah.
21 Cun Izipt mi, minganpi pakhat zong kha a thah. Izipt mipa cu fei a ngei nain Benaiah nih fung pakhat in a doh. Izipt mipa fei kha a chuh i fei cun a thah.
22 Mah thil vialte cu Jehoiada fapa Benaiah nih a tuahmi a si. Anih zong a hmasa miṭhawng pathum bantuk in a min a thang ve.
23 Benaiah cu haotu 30 nakin a min a thang deuh ko nain miṭhawng pathum kha cu a tluk hna lo. Asinain David nih a pum runvengtu ah a chiah.
24 Joab nau Asahel zong haotu 30 lakah aa tel ve. Miṭhawng cheukhat cu Bethlehem khuami Dodo fapa Elhanan,
25 Harod mi Shammah, Harod mi Elika,
26 Pelet khuami Helez, Tekoa khuami Ikkesh fapa Ira,
27 Anathoth khuami Abiezer, Hushah khuami Mebunnai,
28 Ahohi mi Zalmon, Netofah khuami Maharai,
29 Netofah khuami Baanah fapa Heleb, Gibeah khuami Benjamin phun Ribai fapa Ittai,
30 Pirathon khuami Benaiah, Gaash tivarek ah a ummi Hiddai,
31 Arabah khuami Abialbon, Bahurim khuami Azmaveth,
32 Shaalbim khuami Eliahba, Jashen fapa hna, Jonathan,
33 Harar mi Shammah, Harar mi Sharar fapa Ahiam,
34 Maakath mi Ahasbai fapa Elifelet, Gilon khuami Ahithofel fapa Eliam,
35 Karmel khuami Hezro, Arbi khuami Paarai,
36 Zobah khuami Nathan fapa Igal, Gad mi Bani,
37 Ammon mi Zelek, Zeruiah fapa Joab a hriamnam putu Beeroth khuami Naharai,
38 Ithri mi Ira, Ithri mi Gareb le
39 Hit mi Uriah an si. An dihlak fonh ah 37 an si.
