Samuel Pahnihnak 18:1-33
18 David nih a sinah a ummi kha a rel hna i mi thong khat haotu le za khat haotu tiin a chiah hna.
2 Mi kha phu thum ah a ṭhen hna. Joab kut tang ah phu khat, Zeruiah fapa Joab a upa, Abishai kut tang ah phu khat, Gath khuami Ittai kut tang ah phu khat tiin a chiah hna. Cun “Kei zong raltuknak ah ka kal ve lai” tiah a ti hna.
3 Asinain annih nih “Na kal lai lo. Kannih cu kan zam ah siseh, hnarcheu kan thih ah siseh an zeihmanh a poi lai lo. Nang tu cu kanmah ralkap 10,000 nakin na sunglawi deuh. Cucaah khua chung hin rak kan bawm law a ṭha deuh lai” tiah an ti.
4 David nih “A ṭha nan ti ning paoh in ka tuah ko lai” tiah a ti hna i khua hauka pawng ah a dir. Ralkap pawl cu a zaza in le a thongthong in an i thawh.
5 David nih “Keimah mithmai zoh in ka fapa Absalom kha nem tein va ti u” tiah Joab, Abishai le Ittai kha nawl a pek hna. Haotu pawl cutin nawl a pekmi hna kha mi vialte nih an theih.
6 David a mi hna cu Israel mi doh awkah khua chung in an rak chuak. An i dohnak hmun cu Efraim tupi ah a si.
7 David salle nih Israel mi cu an tei hna i cu ni ah mi tampi an thah hna. A thimi cu 20,000 an si.
8 Cuka pawngkam vialte ah ral a tho dih. Mah ni ah vainam in a thimi nakin tupi ah harnak tong in a thimi an tam deuh.
9 A donghnak ah Absalom le David salle cu hmaitonh in an i ton caah Absalom cu a zam. Asinain aa citmi laa cu a nge tampi a ummi thingkung nganpi tang in a tli. Cu tikah Absalom lu cu thingnge ah a taap. A laa nih a tliktak caah vawlei tawng loin aa thlai ko.
10 Mah kha mi pakhat nih a hmuh i “Thingkung nganpi ah Absalom aa thlaimi kha ka hmuh” tiah Joab cu a chimh.
11 Joab nih “Na hmuh komi cu zeicah cuka ah na thah colh lo? Rak that law cu ngun phar 10 le taisawm kaan pek hnga” tiah a ti.
12 Asinain mipa nih “Ngun phar 1,000 ka hmuh ding a si hmanh ah siangpahrang fapa cu harnak ka pe lai lo. Siangpahrang nih ‘Ka fapa Absalom kha zohkhenh u’ tiah nangmah le Abishai le Ittai nawl aan pekmi hna kha kan theih.
13 Nawlngai loin rak that ning law mah kong cu siangpahrang sinin thuh khawh a si hlei lai lo. Cun nangmah zong nih na ka huhphenh fawn lai lo” tiah a ti.
14 Cu tikah Joab nih “Nangmah he biaruah cu ka caan a pam” tiah a ti i fei tawi pathum kha aa lak. Cun thingkung nganpi ah a nung in a rak i thlaimi Absalom kha a lung ah tleng lakin a hei khawh.
15 Joab hriamnam putu pahra zong an rak phan i Absalom cu an thah.
16 Joab nih saki a tum tikah ralkap pawl cu Israel mi an dawi hnanak in an rak kir ṭhan. Joab nih dawi ti lo ding in nawl a pek hna.
17 Absalom ruak cu tupi chung khor nganpi ah an hlonh i a cung ah lungpon nganpi an pon. Israel mi vialte cu an inn cio ah an zam.
18 Absalom nih a nun lioah “Ka min a loh nakhnga lo a kilvengtu fapa ka ngei lo” tiah a ti i Siangpahrang Nelrawn ah lung pakhat a bunh. Lungphun cu a min in a auh i nihin ni tiang Absalom Lungphun tiah auh a si.
19 Zadok fapa Ahimaaz nih “Siangpahrang sinah va tli ning law thawng va thanh ning, zeicahtiah Jehovah nih a ral hna kut in a luatter i ding tein bia a ceihpiak cang” tiah a ti.
20 Asinain Joab nih “Nihin ah thawng na thanh lai lo, nidang ah na thanh te lai. Nihin cu siangpahrang fapa thih ni a si caah kal hlah” tiah a ti.
21 Joab nih Kush mi pakhat kha “Siangpahrang sinah va kal law na hmuhmi hi va chim” tiah a ti tikah Kush mipa cu Joab hmaiah a kun, cun a tli colh.
22 Zadok fapa Ahimaaz nih “Zeiti a si zong ah Kush mipa hnulei in ka tlikter ve ko” tiah a nawl ṭhan tikah Joab nih “Ka fapa, zeicah na tlik lai? Chim ding zei thawngpang hmanh na ngeih ṭung lo” tiah a ti.
23 “Zeiti a si zong ah rak ka tlikter ve ko” tiah a nawl chih ṭhan caah Joab nih “Va tli!” tiah nawl a pek. Ahimaaz cu Jordan Nelrawn lei ah a kalmi lam ning in a tli i Kush mipa cu a lonh.
24 David cu khua kulhnak ralhau a chunglei hauka le a lenglei hauka karlak ah a ṭhu. Mah lioah ralvengtu cu hauka cung ah a kai i khua a cuanh tikah mipa pakhat amah lawng in a rak tlikmi kha a hmuh.
25 Ralvengtu nih a hei chimh tikah siangpahrang nih “Amah lawng in a si ahcun thawngpang a rak phorh i a si lai” tiah a ti. Mipa nih khua cu a rak naih chin tikah,
26 ralvengtu nih midang pakhat a rak tlik vemi kha a hmuh. Cu tikah hauka cawngtu kha “Midang pakhat a rak tli ṭhan!” tiah a hei chimh. Siangpahrang nih “Anih zong thawngpang phortu a si ve ko lai” tiah a ti.
27 Ralvengtu nih “A hmasa pa a tlik dan cu Zadok fapa Ahimaaz a lo” tiah a ti tikah siangpahrang nih “Anih cu miṭha a si, thawngṭha a rak phorh ko lai” tiah a ti.
28 Ahimaaz nih “Thawngṭha ka rak phorh!” tiah a ti i siangpahrang hmaiah cun a bawk. Cun “Ka bawipa siangpahrang a ralchanhtu hna a sunghtertu Jehovah na Pathian cu thangṭhat si ko seh” tiah a ti.
29 David nih “Ka fapa Absalom tah zeidah a lawh?” tiah a hal tikah Ahimaaz nih “Joab nih siangpahrang salpa le na salpa hi a kan thlah lioah thil sining cu aa tuai-ur tuk, zeidah a cang ti cu ka hngal lo” tiah a leh.
30 David nih “Ka pawng ah rak dir” tiah a ti tikah a pawng ah a kal i a dir.
31 Kush mipa zong a rak phan i “Ka bawipa siangpahrang caah thawngpang ka rak phorh. Nihin ah Jehovah nih ralchanhtu hna kut in aan luatter i ding tein bia aan ceihpiak cang” tiah a ti.
32 David nih Kush mipa cu “Ka fapa Absalom tah zeidah a lawh?” tiah a hal tikah “Ka bawipa siangpahrang, na ral vialte le nangmah aan ralchanhtu hna cu Absalom bantuk si ko hna seh!” tiah a ti.
33 Cu tikah David cu a ngaih a chiat tuk caah khua hauka cung ah a ummi cungdot khaan ah a kai i a ṭap. A kai pah cun “Ka fapa Absalom, ka fapa, ka fapa Absalom! Nangmah canah keimah tu hei thi ning law a ṭha deuh hnga, maw ka fapa Absalom, ka fapa!” tiah a ṭap.
