Samuel Pahnihnak 14:1-33
14 Siangpahrang nih Absalom a ngai tuk cang ti kha Zeruiah fapa Joab nih a hngalh.
2 Cucaah Tekoa khua ah mi a thlah hna i a fim ngaimi nu pakhat kha a auhter hna. Minu cu “Mithi a ṭahmi bantuk in i umter, ngaihchiat lio caan i hrukmi thilpuan kha i hruk law chiti i thuh hlah. Ni tampi chung a ṭap cangmi nu bantuk in i umter.
3 Cun siangpahrang sinah va kal law hitin na va chim lai” tiah a ti i a chim dingmi bia kha a chimh.*
4 Tekoa minu cu siangpahrang sin a va phanh tikah a kun, a bawk i “Maw siangpahrang, ka bawm ko!” tiah a ti.
5 Siangpahrang nih “Zeidah a cang?” tiah a hal tikah “Kei cu nuhmei ka si. Ka va cu a thi cang.
6 Na salnu nih hin fapa pahnih ka ngei. Lo ah pakhat le pakhat an i ṭhua i a ṭhentu ahohmanh an um lo caah pakhat nih a dang pakhat kha a thah.
7 Atu ka chungkharmi vialte nih an ka chuah hnawh i ‘A unau a thattu kha kan kut ah rak kan pe! Rocotu a si hmanh ah a unau nunnak ca i phuhlam awkah kan thah lai!’ tiah an ka ti. Hmanung bik kaa ruahchannak* a simi ka fapa kha thah an duh i vawleicung in ka vapa min le a tefa kha an hloh hnik cang” tiah a ti.
8 Siangpahrang nih minu cu “Na inn ah va ṭin cang. Keimah nih kaan tawlrelpiak lai” tiah a ti.
9 Cu tikah Tekoa minu nih “Maw ka bawipa siangpahrang, mawhchiatnak cu keimah le ka pa chungkhar cung ah tlung ko seh. Siangpahrang le a bawiṭhutdan cung ah tlung hlah seh” tiah a ti.
10 Cun David nih “Mi pakhatkhat nih aan ti ṭhan ahcun zeitik hmanh ah hna aan hnawh ti nakhnga lo ka sinah ratpi” tiah a ti.
11 Asinain minu nih “Ka fapa kha thisen phuhlamtu nih harnak a pek i a thah nakhnga lo Jehovah na Pathian min chalh in chiatser”* tiah a ti tikah David nih “Jehovah a nun bang in ka chim lai, na fapa a samfa fa khat hmanh vawlei ah a tla lai lo” tiah a leh.
12 Minu nih cun “Ka bawipa siangpahrang, na salnu hi bia kaa khat tein chimnak nawl ka pe rih” tiah a nawl tikah “Chim ko!” tiah a ti.
13 Minu nih cun “Siangpahrang, cu a si ah zeicah Pathian miphun cung ah harnak a chuahter khomi thil na tuah? Na fapa kha na ṭhawl i na auh ṭhan lo caah atu na chim ning in cun na sual cang.
14 Kan dihlak in kan thi ko lai i vawlei ah thletmi, lak ṭhan khawh ti lomi ti bantuk kan si lai. Asinain Pathian nih cun nunnak pakhat hmanh kha hloh a duh lo i a sinin ṭhawlmi kha auh ṭhan khawhnak lam a kawl.
15 Mi nih an ka tlerh caah mah kong hi chim awkah ka ratmi a si. Na salnu nih hin ‘Siangpahrang hi ka chimh tuah lai. Ka halmi ning in a ka tuahpiak ko hnga.
16 Siangpahrang nih ka bia a ka ngaihpiak lai i Pathian nih a kan pekmi ro in keimah le ka fapa hloh awkah aa zuammi pa kut in a ka khamh ko lai’ tiah ka ruah.
17 Cun na salnu nih ‘Ka bawipa siangpahrang bia nih ka hna a ka ngamter ko lai’ tiah ka rak ruah. Zeicahtiah nang cu a hmaanmi Pathian vancungmi bantuk in a ṭha le a ṭha lo kha na thleidan khawh. Jehovah na Pathian cu na sinah um ko seh” tiah a ti.
18 David nih minu cu “Bia kaan hal lai, pakhat hmanh thup loin rak ka chim” tiah a ti tikah “Rak ka hal ko, ka bawipa” tiah a leh.
19 Siangpahrang nih “Hitin tuah awkah aan fialtu cu Joab a si maw?” tiah a hal tikah minu nih “Siangpahrang ka bawipa, na nun bang in ka chim lai! Na chim ning in a si ko. Na salpa Joab nih a ka fialmi a si i mah bia vialte hi a ka chimter.
20 Thil sining na hmuh ning aa thlen nakhnga na sal Joab nih a tuahmi a si. Asinain ka bawipa cu a hmaanmi Pathian vancungmi bantuk in fimnak a ngeimi na si i ram chung ah thil a cangmi vialte kha na hngalh dih” tiah a ti.
21 Cu tikah siangpahrang nih Joab cu “A ṭha, na duh ning in ka tuah lai. Va kal law tlangval Absalom cu va au” tiah a ti.
22 Joab cu a kun, a bawk i siangpahrang cu a thangṭhat. Cun “Maw siangpahrang ka bawipa, nihin ah na salpa nih kaan halmi ning in na ka tuahpiak caah na mithmai ṭha ka hmu ti kha ka hngalh cang” tiah a ti.
23 Joab cu Geshur ah a kal i Absalom kha Jerusalem ah a kirpi.
24 Asinain siangpahrang nih “A inn ah va ṭinter, rak ka tong hlah seh” tiah a ti. Cucaah Absalom nih siangpahrang kha a tong lo i a inn ah a ṭin.
25 Israel mi vialte lakah Absalom tluk in a muisam lei ah thangṭhat a tongmi pa ahohmanh an um lo. A luthlung in a kechik tiang soi awk zeihmanh a um lo.
26 A sam cu a rih tuk caah kum dih fatin aa met tawn. An mehmi a sam cu siangpahrang inn i hmanmi thlainak* in shekel 200* a rit.
27 Absalom cu fapa 3 le fanu 1 a ngei. A fanu min cu Tamar a si i muidawh ngai a si.
28 Absalom cu Jerusalem khua ah kum 2 chung a um cang nain siangpahrang kha a tong kho rih lo.
29 Cucaah Absalom nih Joab cu siangpahrang sinah thlah a duh caah a auh nain a ra duh lo. A voihnihnak a auh ṭhan nain a ra duh hlei lo.
30 A donghnak ah Absalom nih a salle kha “Joab lo cu ka lo pawng ah a um. Cuka ah barli a cin. Va kal u law mei in va duah u!” tiah a ti hna. Cucaah a salle nih Joab lo kha mei an va duah.
31 Joab cu Absalom inn ah a va kal colh i “Zeicah na salle nih ka lo cu mei an duah?” tiah a hal.
32 Absalom nih Joab cu “Na sinah mi ka rak thlah hna i ‘Siangpahrang sinah “Geshur ram in zeicah ka rak kir? Khika ah rak um ko ning law ka caah a ṭha deuh hnga. Atu nangmah he ka tonter ko. Sualnak ka ngeih ahcun ka that ko” tiah rak ka chimhpiak’ tiin bia kaan cah ko kha ta” tiah a leh.
33 Cucaah Joab nih siangpahrang cu a va chimh. David nih Absalom cu a auh i a rak phanh tikah siangpahrang hmaiah a kun i a bawk. Cun David nih Absalom cu a hnamh.
