Samuel Pahnihnak 4:1-12
4 Saul fapa Ishbosheth nih Hebron ah Abner a thi ti thawng a theih tikah a ṭih tuk. Israel mi vialte zong lungrethei in an um.
2 Saul fapa Ishbosheth ta a simi dotu ralkapbu lakah haotu pahnih an um. Pakhat cu Baanah a si i a dang pakhat cu Rekhab a si. Annih cu Benjamin phun Beeroth khuami Rimmon fapale an si. (Beeroth khua cu Benjamin ram chung ah a um ve.
3 Beeroth khuami cu Gittaim ah an zam i cuka hmun ah ramdang mi in nihin ni tiang khua an sa.)
4 Saul fapa Jonathan cu fapa pakhat a ngei i a ke a bei. Saul le Jonathan an thihnak kong Jezreel khua in thawngpang a rak phanh lioah anih cu kum 5 a si. A zohkhenhtu nu nih a cawi i thinphan thlalau in a tlikpi caah a thlak sual i a bei. A min cu Mefibosheth a si.
5 Beeroth khuami Rimmon fapale Rekhab le Baanah cu chun a linh saling ah Ishbosheth inn ah an va kal. Ishbosheth cu chikkhat a rak i hngilh lio a si.
6 Annih cu changvut a la dingmi bantuk in innchung ah an lut i Ishbosheth kha a paw ah nam in an sawh i an thah. Cu hnuah Rekhab le Baanah cu an zam.
7 Innchung an rak luh lioah Ishbosheth cu a ihkhun cung ah a rak it ko. An thah i a lu kha an tan. Cun a lu kha an i put i Arabah lei kalnak lam in zan khuadei an kal.
8 Ishbosheth lu kha Hebron ah a ummi David sinah an rak put i “Maw siangpahrang, mah hi nangmah thah aan zaltu na ral Saul fapa Ishbosheth lu a si. Nihin ah Jehovah nih Saul le a tefa cung ah phu aan hlampiak cang” tiah an ti.
9 Asinain David nih Beeroth khuami Rimmon fapale Rekhab le Baanah kha hitin a ti hna: “Harnak vialte chung in a ka khamhtu Jehovah a nun bang in ka chim lai,
10 mi pakhat nih ‘Saul a thi’ tiah thawng a rak ka thanh. Anih nih thawngṭha ka rak phorh tiah a ruah nain ka tlaih i Ziklag ah ka thah. Mah cu thawngpang phortu nih ka sinin a hmuhmi laksawng a si.
11 Miding mi pakhat a inn i a ihkhun cung ah a thattu miṭhalo nannih chinchin cu dan kaan tat hrimhrim hna awk a si. Nan kut chung in a thisen man kha kaan hal hna lai i vawleicung in kaan hloh hna lai.”
12 Cu hnuah David nih anmah thah awkah a mi pawl kha nawl a pek hna. An kut le an ke kha an tan hna i Hebron khua tikhor pawng ah an thlai hna. Asinain Ishbosheth lu kha cu Hebron khua i Abner thlan ah an vui.
