Samuel Pahnihnak 5:1-25
5 A hnuah Israel mi vialte cu Hebron ah a ummi David sinah an ra i “Kannih cu na thi le na sa kan si.
2 Saul kan siangpahrang a rak si lioin Israel mi kha raltuknak ah na rak hruai hna. Cun Jehovah nih ‘Nangmah cu ka miphun Israel mi zohkhenhtu* le Israel mi hruaitu na si lai’ aan rak ti” tiah an ti.
3 Cucaah Israel upa vialte cu Hebron ah an ra. Siangpahrang David nih Hebron i Jehovah hmaiah anmah he biakamnak a ser. Annih nih David cu Israel siangpahrang in chiti an thuh.
4 David cu kum 30 a si ah siangpahrang a hung si i kum 40 chung a uk.
5 Hebron in Judah ram kha kum 7 le thla 6 chung a uk, Jerusalem in Judah ram le Israel ram vialte kha kum 33 a uk.
6 Siangpahrang David le a mi hna cu Jerusalem khua ah a ummi Jebus mi hna doh awkah an i thawh. Jebus mi nih David cu “Hika khua ah zeitik hmanh ah na lut kho lai lo. Mitcaw le kebei hmanh nih an in ṭhawl lai” tiah an nehsawh. Annih nih ‘David cu hika khua ah zeitik hmanh ah a lut kho lai lo’ tiah an ruah.
7 Asinain David nih Zion ralhruang kha a lak i a hnuah David Khua tiah auh a si.
8 Cu ni ah David nih “Jebus mi a va dotu hna, vawlei tang ti laknak lam ning in kal u law David nih a huatmi ‘kebei le mitcaw’ kha va that hna u!” tiah a ti hna. Cuticun “Mitcaw le kebei cu innchung ah zeitik hmanh ah an lut lai lo” timi bia a hung um.
9 David cu Zion ralhruang chung ah khua a sa. Cucu David Khua tiah auh a si. Cun Tlangbo* cung ah le khua chung ah kulhnak hau le a dang inn hna zong a sak.
10 David cu a lianngan chin lengmang i ralkapbu Pathian Jehovah nih a umpi.
11 Tair siangpahrang Hiram nih David sinah lamkal a hei thlah hna i sidar thing, lehtama le inn vanpang saknak caah lung remhtu hna kha a kuat. Annih nih David caah inn sak hram an thawk.
12 David nih Israel mi cung ah siangpahrang ka sinak kha Jehovah nih a fehter cang ti le a miphun Israel mi ṭhatnak caah ka pennak a hlorh cang ti kha a hngalh.
13 David cu Hebron in Jerusalem a phanh hnuah nupi le nuchun a ṭhit chap hna i fanu le fapa a ngei chap hna.
14 Jerusalem khua ah a ngeihmi a fapale cu Shammua, Shobab, Nathan, Solomon,
15 Ibhar, Elishua, Nefeg, Japhia,
16 Elishama, Eliada le Elifelet an si.
17 David cu Israel siangpahrang in chiti thuh a si cang ti kha Filistin mi nih an theih tikah David kawl awkah an rak i thawh. Mah cu David nih a theih tikah ralhruang ah a va i thup.
18 Filistin mi cu an ra i Repha Horkuang thluangthluan ah hmun an la.
19 David nih Jehovah kha “Filistin mi cu ka do hna lai maw? Ka kut chung ah na ka pe lai maw?” tiah a hal tikah Jehovah nih “Va do hna, Filistin mi cu na kut chung ah kaan pek hrimhrim lai” tiah a ti.
20 Cucaah David cu Baal-perazim ah a ra i Filistin mi kha a tei hna. Cun “Ti nih kahcham a hrawh bantuk in Jehovah nih ka hmai in ka ral pawl kha a hrawh hna” tiah a ti i cuka hmun cu Baal-perazim tiah min a pek.
21 Cuka ah Filistin mi nih an siasal hna kha an kaltak. Mah kha David le a mi pawl nih an lak i an kalpi.*
22 A hnuah Filistin mi cu an ra ṭhan i Repha Horkuang thluangthluan ah hmun an la ṭhan.
23 David nih Jehovah a hal tikah “Va do colh hna hlah. An hnulei in va hel hna law Baka burbuk hmaiah chuah hnawh hna.
24 Baka burbuk a par in ralkap kal thawng bantuk na theih tikah chuak law do colh hna. Zeicahtiah Jehovah cu na hmai in a kal lai i Filistin ralkap kha a doh hna lai” tiah a ti.
25 Cucaah David nih Jehovah nawl pekmi ning in a tuah i Filistin mi kha Geba khua in Gezer khua tiang a thah hna.
