Samuel Pahnihnak 12:1-31
12 Jehovah nih Nathan cu David sinah a thlah. A va phanh tikah hitin a ti: “Khua pakhat ah pa pahnih an um. Pakhat cu a rum i a dang pakhat cu a si a fak.
2 Mirum pa cu tuu le caw tampi a ngei.
3 Misifak pa tu cu a cawkmi tuu a nute pakhat lawng a ngei. A bawipa nih a zohkhenh, a chungkhar sinah a um ve i a ṭhang thluahmah. A bawipa ngeihmi te kha a ei, a hrai in ti a ding ve i a ṭang cung ah a it, a fanu bantuk te a hung si.
4 A hnuah mirum pa cu khual pakhat a ngei. A khual dangh awkah a tuu le a caw kha a that duh lo. Mah canah misifak pa tuu te kha a lak riangmang i a thah, cun a khual cu a dangh.”
5 Cu tikah David cu mirum pa cung ah a thin a hung tuk i “Jehovah a nun bang in ka chim lai. Mah mipa cu thih awkah aa tlak.
6 Cutin zaangfahnak ngei loin a tuah caah tuu pali in a cham ṭhan awk a si” tiah a ti.
7 Cu tikah Nathan nih David cu hitin a ti: “Mah mipa cu nangmah hi na si! Israel Pathian Jehovah bia cu hihi a si: ‘Keimah theng nih Israel siangpahrang si awkah chiti kaan thuh i Saul kut in ka rak in khamh.
8 Na bawipa pennak kha kaan pek i a nupile zong kha kaan pek. Cun Israel phun le Judah phun zong kaan pek. Mah hmanh cu naa zat rih lo ahcun pek chap ding in timhcia ka si ko.
9 Keimah Jehovah mithmuh ah thil ṭhalo kha na tuah i ka bia kha zei ah na rel lo, Hit mi Uriah kha na thah. Ammon mi hna vainam in na thah hnuah a nupi kha naa lak.
10 Zei ah na ka rel lo i Hit mi Uriah nupi kha naa lak caah na chungkhar ah vainam in a thimi an um zungzal lai.’
11 Jehovah nih hitin a ti chap: ‘Harnak aan petu ding kha na innchungkhar chung lila in ka chuahter lai. Na mithmuh ah na nupi kha ka lak hna lai i midang ka pek hna lai. Amah nih chun laicer ah na nupile cu a ihpi hna lai.
12 Nang nih cun a thlithup in na tuah nain kei nih cun Israel mi vialte hna hmai le chun laicer ah cucu ka tuah lai.’”
13 David nih “Jehovah cung ah ka sual cang” tiah a ti tikah Nathan nih “Jehovah nih na sualnak cu aan ngaihthiam ko. Na thi lai lo.
14 Asinain hi kongkau ah Jehovah zeirel loin thil na tuah caah a chuakkami na fapate cu a thi hrimhrim lai” tiah a ti.
15 Cun Nathan cu inn ah a ṭin.
Uriah nupi nih David a hrinpiakmi fapate cu Jehovah nih dan a tat caah a zaw.
16 David nih ngakchiapa caah a hmaanmi Pathian cu a nawl i rawl a ul. Zanlei fatin a khaan ah a lut i zan khuadei ṭuang ah a ril tawn.
17 Kum upa a salle cu an ra i ṭuang cun an thawh nain a tho duh lo, rawl zong a ei duh lo.
18 A ni sarihnak ni ah ngakchiapa cu a thi. Ngakchiapa a thi timi kong kha a salle nih David an chim ngam lo. “Ngakchiapa a nun lio hmanh ah kan bia a ngaih duh ṭung lo. Atu ngakchiapa a thi ti cu zeitindah kan chimh ngam lai? Thil ṭhalo pakhatkhat a tuah sual lai” tiah an ti.
19 David nih a salle din tein an i ceih lenmi kha a hmuh tikah ngakchiapa a thi cang ti kha a hngalh. Cucaah a salle kha “Ngakchiapa cu a thi cang maw?” tiah a hal hna i “A thi cang” tiah an leh.
20 Cu tikah David cu ṭuang in a tho. Ti aa kholh, chiti aa thuh, a thil aa thleng, Jehovah inn ah a kal i Pathian kha a biak. Cun inn ah a ṭin ṭhan, rawl a serter hna i a ei.
21 A salle nih “Zeicah hitin na tuah? Ngakchiapa a nun lio vial ah cun rawl na ul i na ṭap lengmang. Asinain a thihle cangka na tho i rawl na ei” tiah an ti.
22 David nih “Jehovah nih a ka zaangfah lai i ngakchiapa hi a nunter ko hnga tiah ka ruah caah ngakchiapa a nun lioah rawl ka ulh i ka ṭah lengmangmi a si.
23 Atu cu a thi cang cu ta. Zeicah rawl ka ulh ti lai? Ka nunter ṭhan khawh ti ṭung lo. Keimah tu amah sinah ka kal lai. Amah cu ka sinah a rak kir ti lai lo” tiah a leh hna.
24 David nih a nupi Bathsheba cu a hnemh. A sinah a kal i a ihpi caah a caan a cut tikah fapate a hrin i Solomon* tiah min an sak. Jehovah nih Solomon cu a dawt.
25 Jehovah nih ngakchiapa cu a dawt caah profet Nathan kha a thlah i Jedidiah* tiah min a sak.
26 Joab nih Ammon mi hna khua Rabbah kha a doh lengmang i siangpahrang umnak hmun kha a lak.
27 Joab nih David sinah lamkal a hei thlah hna i “Rabbah khua cu ka doh i ti laknak hrampi* kha ka lak khawh cang.
28 Atu a taangmi ralkap pawl kha pum hna, khua hi rak do law rak la. Cu lo ahcun khua a latu cu keimah ka si lai i keimah tu minṭhatnak ka hmu sual lai” tiah bia a cah.
29 Cucaah David nih ralkap vialte cu a pumh hna, Rabbah khua cu a va doh i a lak.
30 Cun Malkam milem lu i sui bawiluchin kha a lak, sui cu talent 1* a rit i a dang lung mansung zong in ṭamh a si. Mah kha David cu an chinh. Cun David nih khua chung in a dang hranchaw tampi zong a lak.
31 Khuami kha a tlaih hna i lung ahnak rian, a haarmi thir hriamnam le thir hreitlung in ṭuanmi rian a ṭuanter hna i tlakrawh a serter hna. A dang Ammon khuami vialte zong kha cutin a tuahter hna. A donghnak ah David le a ralkap pawl cu Jerusalem ah an kir ṭhan.
Footnotes
^ “Daihnak” tiah sullam a ngeimi Hebru biafang in a rami a si.
^ A sullam “Jah Dawtmi.”
^ A hrampi, “ti khualipi.”
^ Talent pakhat cu 34.2 kg he aa tluk. Thlaihhlei B14 ah zoh.
