Samuel Pahnihnak 15:1-37
15 A hnuah Absalom nih aa cit awkah rangleng pakhat, rang hna le a hmaiah a tlitu ding mi 50 kha aa chiah hna.
2 Absalom cu zingka tein a tho i khua hauka pawng lamkam ah a dir tawn. Siangpahrang nih biaceihpiak awk buainak a ngeimi pakhatkhat a rat tikah a auh i “Khoika in dah na rat?” tiah a hal. Anih nih “Na salpa cu Israel phun pakhat chung mi ka si” tiah a leh tikah,
3 Absalom nih “Na chimmi cu a hmaan i aa tlakmi a si. Asinain na bia ngaihpiak awkah siangpahrang nih rian a pekmi ahohmanh an um lo” tiah a ti tawn hna.
4 Cun “Hika ram ah keimah hi biaceihtu in rian pek hei si ning law taza cuai a duhmi le biaceihpiak a duhmi paoh ka sinah an ra lai i ding tein bia ka ceihpiak ko hna hnga” ti zong in a ti tawn.
5 Mi pakhat cu a ra i a kunpiak hnik tikah Absalom nih a hei tlaih i a hnamh.
6 Biaceihpiak awkah siangpahrang sin a rami, Israel mi vialte cung ah cutin a tuah. Cuticun Israel mi vialte amahlei ah an ṭan nakhnga a lem hna.*
7 Kum li* a rauh hnuah Absalom cu David sinah a kal i “Jehovah sin ka biakamnak ning in tuah awkah Hebron khua ah ka kalter ko.
8 Siria ram Geshur i ka um lioah ‘Jehovah nih Jerusalem ah a ka kirpi ṭhan ahcun Jehovah sinah raithawinak ka pek lai’ tiah fek tein bia kaa rak i kam” tiah a nawl.
9 David nih “Lungdai tein va kal” tiah a ti i Hebron ah cun a kal.
10 Absalom nih Israel phun vialte sinah a thli tein mi a thlah hna i “Saki tum thawng nan theihle cangka ‘Absalom cu Hebron ah siangpahrang a si cang!’ tiin thanh u” tiah bia a cah hna.
11 Absalom nih a sawm hna caah Jerusalem in a zul vemi pa 200 an um. Annih nih thil sining zeihmanh hngal loin lungthiang tein an zulh.
12 Cun raithawinak a pek lioah Absalom nih David ruahnak cheutu a simi Ahithofel kha a khua Giloh ah a va auhter hna. Siangpahrang rawiphiarnak ah Absalom lei a ṭangmi cu an tam chinchin.
13 A hnuah mi pakhat cu David sinah a ra i “Israel mi cu Absalom lei ah an ṭang dih cang” tiah a chimh.
14 Cu tikah David nih Jerusalem ah a ummi a salle vialte kha “Tho u, zam u sih. Absalom kut in kan luat nakhnga tli zokzok u sih! Cu lo ahcun a kan phanh lai, harnak a kan pek lai i khuami vialte cu vainam in a thah dih sual hna lai” tiah a ti colh hna.
15 A salle nih “Siangpahrang, na biakhiahnak ning in tuah awkah timhcia kan si ko” tiah an leh.
16 Cucaah siangpahrang cu a innchungkhar mi vialte he an zam. Asinain nuchun pahra kha inn zohkhenh awkah a chiahtak hna.
17 David le a mi pawl cu an kal i Beth-merhak* ah an i din.
18 A sinah a kal vemi a salle, Khereth mi, Peleth mi, Gath khua in a zulmi Gath mi 600 cu a hmai in horkuang an tan tikah David nih a zoh hna.
19 David nih Gath khuami Ittai kha “Zeicah kan sinah na rat ve? Va kir law siangpahrang thar sinah va um, nang cu na ram in a zammi ramdang mi na si.
20 Nizan, tihni te ah pei na rak phanh cu. Nihin ah khoika ah kan zam lai ti hmanh a hngal lomi kan sinah zeicah kan in kalpi ve lai? Na unau pawl kha i auh hna law va kir ṭhan u. Jehovah nih na cung ah a fekmi dawtnak langhter seh law zumhawktlak tein um ko seh!” tiah a ti.
21 Asinain Ittai nih “Jehovah a nun bang in le ka bawipa siangpahrang na nun bang in ka chim lai. Na salpa hi ka thih ding a si hmanh ah na kalnak hmun paoh ah ka kal ve lai” tiah a ti.
22 David nih “A si ahcun kal ve law horkuang hi tan” tiah a ti tikah Gath khuami Ittai, a mi pawl le an fale nih horkuang cu an tan.
23 David a mi hna nih horkuang an tan lioah rammi vialte cu aw thangpi in an ṭap. Siangpahrang David cu Kidron Horkuang kam ah a dir. A mi hna nih horkuang cu an tan i ramcar lei kalnak lam ah an phan.
24 Zadok le Abiathar cu a hmaanmi Pathian biakamnak kuang a phortu Levi mi hna he cuka ah an um ve. David a mi hna khua chung in an chuah i horkuang an tan dih hlan tiang biakamnak kuang kha a tang ah an ṭhumh.
25 David nih tlangbawi Zadok cu “A hmaanmi Pathian biakamnak kuang kha khua chung ah luhpi ṭhan. Jehovah mithmai ṭha ka hmuh ahcun kei zong hika ah a ka kirpi lai i biakamnak kuang le a umnak hmun kha a ka hmuhter ṭhan lai.
26 Asinain ‘Ka mithmai ṭha na hmu lo’ a ka ti ahcun a ṭha a ti ning paoh in ka cung ah tuah ko seh” tiah a ti.
27 Cun “Nang cu hmutu na si lo maw? Abiathar he khua chung ah va kir ṭhan u. Na fapa Ahimaaz le Abiathar fapa Jonathan zong i kirpi hna. Nan tlamtling ko seh.
28 Nan sinin thawngpang ka theih hlan lo ramcar i Jordan Tiva ti puanhnak pawng ah ka rak um lai” tiah a ti.
29 Cucaah Zadok le Abiathar nih a hmaanmi Pathian biakamnak kuang cu Jerusalem ah an kirpi i cuka ah an um.
30 David cu a lu aa khuh i a ṭah buin Oliv Tlang ah a ke lawng in a kai. A sinah a kalmi vialte zong an lu an i khuh i an ṭah buin an kai ve.
31 “Absalom lei a ṭangmi hna lakah Ahithofel zong aa tel ve” timi thawng kha David nih a theih tikah “Maw Jehovah, Ahithofel ruahnak cheuhnak kha mihrut ruahnak cheuhnak bantuk ah canter hram ko!” tiah a nawl.
32 David cu mi nih Pathian an biak* tawnnak tlangpar a phanh tikah Arkhi mi Hushai cu a angki thleh bu le a lu ah leidip phulh buin a sinah a ra.
33 David nih Hushai cu “Ka sinah na kal ve ahcun na ka bawm kho lai lo.
34 Khua chung ah va kir law Absalom kha ‘Maw siangpahrang, kei cu na sal ka si, a hlanah na pa sal ka rak si nain atu cu na sal ka si cang’ tiah na ti ahcun Ahithofel ruahnak cheuhnak kha pakpalawng ah na canter khawh lai i na ka bawmh khawh lai.
35 Tlangbawi Abiathar le Zadok zong cuka ah an um ve. Siangpahrang inn i na theihmi vialte kha anmah cu na chimh hna lai.
36 Cun Zadok fapa Ahimaaz le Abiathar fapa Jonathan zong an um ve. Na theihmi vialte kha anmah sinin thawng rak ka thanh” tiah a ti.
37 David hawi* Hushai cu Jerusalem khua chung ah a lut. Mah lioah Absalom zong a rak lut ve.
