Samuel Pahnihnak 2:1-32
2 David nih Jehovah cu “Judah khua pakhatkhat ah ka va kir lai maw?” tiah a hal tikah Jehovah nih “Va kir” tiah a ti. “Khoika khua ah dah ka kir lai?” tiah a hal tikah “Hebron khua ah” tiah a leh.
2 Cucaah David cu a nupi pahnih, Jezreel khuami Ahinoam le Nabal nupi a rak si balmi Karmel khuami Abigail he an kir.
3 Cun a mi hna le an chungkhar pawl zong aa kirpi hna i Hebron le a pawngkam khua hna ah an um.
4 Judah pa hna cu an ra i David kha Judah phun siangpahrang in chiti an thuh.
Annih nih David cu “Saul a vuitu cu Jabesh-gilead khuami an si” tiah an chimh.
5 Cucaah David nih Jabesh-gilead khuami sinah lamkal a hei thlah hna i “Siangpahrang Saul nan vuinak thawng in a fekmi dawtnak nan langhter caah Jehovah nih thluachuah in pe ko hna seh.
6 Jehovah nih nan cung ah a fekmi dawtnak langhter seh law zumhawktlak tein um ko seh. Nan tuahmi ṭhatnak caah nan cung ah zaangfahnak ka langhter ve lai.
7 Siangpahrang Saul cu a thi cang nain Judah mi nih keimah hi siangpahrang in chiti an ka thuh caah ṭhawng ngai le ralṭha ngai in um ko u” tiah bia a cah hna.
8 Asinain Ner fapa Saul ralbawi Abner nih Saul fapa Ishbosheth kha tiva khattalei ral ah a ummi Mahanaim ah a kalpi.
9 Cun Gilead ram, Ashur mi, Jezreel khua, Efraim ram, Benjamin ram le Israel ram pumpi uktu siangpahrang ah a ser.
10 Saul fapa Ishbosheth cu kum 40 a si ah Israel siangpahrang a ṭuan i kum 2 chung a uk. Judah mi tu cu David lei ah an ṭang.
11 David nih Hebron khua in Judah mi cu kum sarih le thla ruk chung a uk hna.
12 A hnuah Ner fapa Abner le Saul fapa Ishbosheth salle cu Mahanaim in Gibeon ah an kal.
13 Zeruiah fapa Joab le David salle zong an rak chuak ve i Gibeon tikhor ah an i tong. Tikhor khattalei kam ah phu khat, a dang khattalei kam ah phu khat tiin an ṭhu.
14 Abner nih Joab cu “Kan ralkap hna hi kan hmaiah i ṭhua tuah hna seh” tiah a ti tikah Joab nih “A ṭha, i ṭhua hna seh” tiah a leh.
15 Cucaah Saul fapa Ishbosheth salle lakin Benjamin mi 12 le David salle lakin mi 12 cu hmaiah an chuak.
16 Pakhat le pakhat an lu in an i tlai i an hnak ah vainam in an i sawh caah an dihlak in an thi. Cucaah Gibeon ah a ummi cuka hmun cu Helkath-hazzurim tiah an auh.
17 Cu ni ah fakpi in an i do chap i Abner le Israel mi cu David salle nih an tei hna.
18 Cuka ah Zeruiah fapale pathum Joab, Abishai le Asahel zong an um ve. Asahel cu ramlak sazuk bantuk in tlik a rang.
19 Asahel nih Abner cu a dawi, amah lawng kha ngol loin a dawi.
20 Abner cu hnulei aa her i “Asahel maw na si?” tiah a ti tikah “Ka si ko” tiah a leh.
21 Abner nih “Keimah cu rak ka dawi ti hlah. Ralkap pakhat kha tlai law a thilri kha i lak ko” tiah a ti nain Asahel nih a duh lo i a dawi chih.
22 Abner nih “Rak ka dawi ti hlah. Kaan thah sual lai. Kaan thah sual ahcun na upa Joab hmai ka khap lai lo” tiah a ti ṭhan.
23 Asinain a duh lo i a dawi chih caah Abner nih a fei tawlei in a paw ah a sawh i fei cu a kenglei ah a tleng. Asahel cu cuka ah a ril i a thi colh. Mi cu Asahel a tluk i a thihnak hmun an rak phanh tikah an dir i an zoh.
24 Asinain Joab le Abishai nih Abner cu an dawi. Nitlak lai ah Gibeon ramlak lei kalnak Giah hmaiah a ummi Ammah tlangbo ah an phan.
25 Benjamin ralkap hna cu Abner sinah an rak i pum. Bukhat ah an i ser i tlangbo pakhat cung ah an dir.
26 Abner nih Joab cu “Zei can tiang dah pakhat le pakhat kan i doh lai? Hitin kan i doh ahcun thil ṭhalo lawng a chuak lai ti kha na hngal lo maw? An unau pawl dawi lo awkah na mi pawl cu na thlauh ti hna lai lo maw?” tiah a au hnawh.
27 Cu tikah Joab nih “A hmaanmi Pathian a nun bang in ka chim lai. Hitin chim hlah law cu zinglei tiang an unau pawl kha an dawi hna hnga?” tiah a ti.
28 Cun saki a tum tikah a mi hna nih Israel mi cu an dawi ti hna lo i an i dohnak cu a dai.
29 Abner le a mi hna cu Arabah hmun in zan khuadei an kal hnuah Jordan Tiva kha an tan, cun horkuang* hrawn in an kal i a donghnak ah Mahanaim an phan.
30 Abner an dawinak in an rak kir hnuah Joab nih ralkap vialte kha a pumh hna tikah Asahel leng ah David sal 19 an bau.
31 Asinain David salle nih Benjamin mi le Abner a mi 360 kha an thah hna.
32 Asahel ruak kha an lak i Bethlehem khua a pa thlan ah an vui. Cu hnuah Joab le a mi hna cu zan khuadei an kal i khuadei ah Hebron an phan.
Footnotes
^ Asiloah “Bithron” ti zong a si kho.
