Samuel Pahnihnak 1:1-27
1 Saul a thih hnuah David nih Amalek mi kha a tei hna. Cun a rak kir i Ziklag ah ni hnih a um.
2 A ni thumnak ni ah Saul riahhmun in pa pakhat cu a thil thleh buin le a lu ah leidip i phulh buin a ra. David hmai a phanh tikah vawlei ah a kun i a bawk.
3 David nih “Khoika in dah na rat?” tiah a hal tikah “Israel riahhmun in ka rak zam” tiah a ti.
4 “Thil sining cu zeidah a lawh? Rak ka chim” tiah a hal tikah cu pa nih “Raltuknak in ralkap pawl cu an zam i mi tampi an thi. Saul le a fapa Jonathan zong an thi” tiah a leh.
5 David nih thawngpang a rak phortu mino pa cu “Saul le a fapa Jonathan an thi ti cu zeitindah na hngalh?” tiah a hal.
6 Mino pa nih “Ruahlopi in Gilboa Tlang ah ka va phan. Cuka ah Saul cu a fei i hngatchan in a rak um. Rangleng le rangcung ralkap nih an rak naih cuahmah cang.
7 A hun i mer i a ka hmuh tikah a ka auh. ‘Ka bawipa, zeidah kaan tuahpiak lai?’ ka ti tikah,
8 ‘Ahodah na si?’ tiah a ka hal i ‘Amalek mi ka si’ tiah ka leh.
9 Cu tikah ‘Ra law rak ka that. A fah ka tuar kho ti lo. A thih zong ka thi kho fawn lo’ tiah a ka ti.
10 Cucaah a sinah ka va kal i ka thah. Zeicahtiah a hma he a rak ril i a nung kho ti lai lo ti kha ka hngalh. Cun a bawiluchin le a banhrolh kha ka lak i ka bawipa na sinah ka rak put” tiah a ti.
11 Cu tikah David nih aa hrukmi thilpuan kha a thleh, a sinah a ummi vialte zong nih cutin an tuah ve.
12 Saul le a fapa Jonathan, Jehovah miphun le Israel mi tampi cu vainam in thah an si caah an ṭah hna i zanlei tiang rawl an ul.
13 David nih thawngpang a rak phortu mino pa kha “Khoika in dah na rat?” tiah a hal tikah “Kei cu Israel ram ah ramdang mi in khua a sami Amalek miphun ka si” tiah a leh.
14 Mah tikah David nih “Jehovah chiti thuhmi kha na thah ngam ko tih!” tiah a ti.
15 Cun mi pakhat kha a auh i “Amah hi that tuah!” tiah a ti tikah a thah i a thi.
16 David nih “Jehovah chiti thuhmi kha keimah hrimhrim nih ka thah tiah nangmah theng nih na ti caah na thihmi cu nangmah ruang ah a si ko”* tiah a ti.
17 Cun David nih Saul le a fapa Jonathan caah ṭah hla a lawh.
18 “Likuk” tiah auhmi ṭah hla kha Judah mi zong a cawnter hna. Jashar cauk ah aa ṭialmi mah hla cu hihi a si:
19 “Maw Israel, na mi lianngan cu hmunsang ah thah an si cang.
Na miṭhawng cu an ril dih cang!
20 Cu kong cu Gath khua ah chim hlah u;Ashkelon lam zong ah thanh hlah u,Filistin mi hna fanule cu an i nuam tuk sual lai,Cuarpar tan lomi hna i an fanule zong an i lawm sual lai.
21 Maw Gilboa tlang hna,Nan cung ah dap tla hlah seh law ruah sur hlah seh,Pathian sin pekchanh dingmi theitlai vui hlah seh,Zeicahtiah cuka ah miṭhawng hna an phaw cu thurter a si cang,Saul a phaw cu chiti thuh a si ti lo.
22 Jonathan likuk le Saul vainam cu,Ral hna thisen ah aa hnim i miṭhawng hna pum ah a tleng,Zeitik hmanh ah an sung lo.
23 Saul le Jonathan cu an nun chung ah dawtmi le sunsakmi an si,An thih tik hmanh ah an i ṭhen lo.
Mupi nakin an rang deuh i,Chiandeih nakin an ṭhawng deuh.
24 Maw Israel fanu hna, Saul kha ṭah u,Anih cu puan sen dawhdawh in aan thuamhtu hna le,Nan thilthuam cung ah sui hlawn aan serhtu hna a si.
25 Miṭhawng hna cu raldohnak ah an thi cang!
Jonathan cu nan hmunsang ah thah a si cang!
26 Ka u Jonathan, ka lungthin a kuai dih cang;Ka u, kaan dawt tuk hringhran.
Na ka dawtnak nih ngaknu dawtnak kha a lonh.
27 Miṭhawng hna cu an thi dih cang,An raldohnak hriamnam cu a rawk dih cang!”
Footnotes
^ A hrampi, “na thisen cu na lu cung ah a tla ko.”
