Samuel Pahnihnak 24:1-25
24 Pakhatkhat* nih “Israel mi le Judah mi kha milu va rel hna” tiah David a forh tikah Jehovah thinhunnak cu Israel mi cung ah a alh ṭhan.
2 David nih a pawng ah a ummi ralbawi Joab kha “Dan in Beersheba tiang Israel phun dihlak sinah va kal law mi* pa zeizat dah an um ti ka hngalh nakhnga min cazin va la hna” tiah a ti.
3 Asinain Joab nih “Jehovah na Pathian nih mi kha a let za khat in karhter ko hna seh. Mah kha na mit hrimhrim nih hmu ko seh. Asinain hi thil hi cu zeicah tuah na duh?” tiah a ti.
4 Asinain David bia nih Joab le a dang ralbawi pawl bia kha a tei hna caah Israel mi min cazin lak awkah an i thawh.
5 Jordan Tiva kha an tan i Aroer khua pawng horkuang laifang ah a ummi khua orhlei kam ah riahhmun an khuar. Cuka in Gath mi hna ram kha tan in Jazer khua ah an kal.
6 Cun Gilead ram le Tahtim-hodshi ram ah an kal. Cu hnuah Dan-jaan le Sidon khua lei ah an kal.
7 Cun Tair ralhruang, Hiv mi hna le Kanaan mi hna khua vialte ah an kal. A donghnak ah Judah ram Negeb ah a ummi Beersheba an phan.
8 Cuticun ram pumpi an cul i thla 9 le ni 20 hnuah Jerusalem ah an rak phan ṭhan.
9 Joab nih milu relnak cazin kha David cu a pek. Israel phun ah vainam aa tlaihmi ralkap 800,000 le Judah phun ah 500,000 an um.
10 Milu a rel hna hnuah David cu a lungthin* nih sual a phawt. Cucaah “Ka sualnak hi a ngan tuk. Jehovah Pathian, hrut ngai in thil ka tuah cang i na salpa sualnak hi zaangfahnak in rak ka ngaithiam ko” tiah Jehovah sinah a nawl.
11 Zinglei i David a thawh tikah langhnak kong a chimtu profet Gad sinah Jehovah bia a phan, hitin a ti:
12 “David sinah va kal law ‘“Thim ding pathum kaan pek lai. Dantatnak pakhat in i thim” tiah Jehovah nih aan ti’ tiin va chim.”
13 Gad cu David sinah a ra i “Kum sarih chung ram ah mangṭam tlun maw na duh asiloah ral nih dawi ruang ah thla thum chung zam maw na duh asiloah ram chung ah ni thum chung rai tlun maw na duh? A ka thlahtu kha ka leh khawh ṭhan nakhnga ṭha tein ruat” tiah a ti.
14 Cu tikah David nih “Ka si a vang tuk hringhran. Asinain Jehovah zaangfahnak cu a ngan caah amah nih dan rak kan tat ko seh, minung nih cun rak ka tat hna hlah seh” tiah a ti.
15 Cu tikah Jehovah nih zinglei in rikhiahmi caan a dih tiang Israel ram ah rai a tlunter. Cucaah Dan in Beersheba tiang mi 70,000 an thi.
16 Vancungmi nih Jerusalem khua hrawh awkah a kut a samh tikah Jehovah cu rai a tluntermi cung ah aa ngaichih.* Cucaah mi a hrawktu vancungmi kha “A za cang! Na kut kha ṭhum cang” tiah a ti. Mah lioah Jehovah vancungmi cu Jebus mi Araunah ta a simi phuhri pawng ah a phan.
17 Mi a thattu vancungmi kha David nih a hmuh tikah “A sualmi le palhnak a tuahtu cu keimah hi ka si. Hi mi hna* nih cun zeidah an tuah? Keimah le ka pa chungkhar tu hi dan rak kan tat hram ko” tiah Jehovah kha a ti.
18 Cu ni ah Gad cu David sinah a ra i “Jebus mi Araunah ta a simi phuhri ah Jehovah caah biakṭheng pakhat in va ser” tiah a ti.
19 Cucaah David cu Gad bia ning in, Jehovah nawl peknak ning in a va kal.
20 Araunah nih khua a hei zoh i siangpahrang le a salle pawl an ratmi kha a hmuh tikah a va chuak colh i siangpahrang hmaiah cun a bawk.
21 Araunah nih “Ka bawipa siangpahrang, zeicah na salpa sinah hin na rat?” tiah a hal tikah David nih “Na phuhri cawk awkah ka ra, cuka ah Jehovah caah biakṭheng pakhat ka ser lai. Mah lawng ah mi cung ah rai a tlung ti lai lo” tiah a ti.
22 Asinain Araunah nih “Ka bawipa siangpahrang, phuhri cu i lak law a ṭha na ti ning paoh in raithawinak cu pe ko. Khangh thawinak caah caw zong an um ko. Cun thing caah facang cilnak thingpheng le caw hngawngkual zong an um.
23 Maw siangpahrang, mah vialte hi keimah Araunah nih kaan pek ko. Na Pathian Jehovah nih mithmai ṭha in pe ko seh” tiah a ti.
24 Asinain David nih “A si kho lo, a man pek in kaan cawk a hau. A man zeihmanh liam loin ka Pathian Jehovah sinah khangh thawinak ka pe lai lo” tiah a ti i phuhri le caw cu ngun shekel* 50 in a cawk.
25 Cuka ah David nih Jehovah caah biakṭheng pakhat a ser i khangh thawinak le hawikomhnak thawinak kha a pekchanh. Israel ram caah David nawlnak kha Jehovah nih a ngaih i rai a tlung ti lo.
